ءماجىلىس دەپۋتاتى ەربولات ساۋرىقوۆ ءوزىنىڭ دەپۋتاتتىق ساۋالىندا اۋىلدىق ەلدى مەكەندەردەگى تۇرعىن ءۇي تاپشىلىعى ماسەلەسىن كوتەردى، دەپ حابارلايدى aqshamnews.kz
ونىڭ ايتۋىنشا، اۋىلدىق ەلدى مەكەندەرگە جاساعان جۇمىس ساپارلارى بارىسىندا تۇرعىندار تاراپىنان ەڭ ءجيى كوتەرىلەتىن ماسەلەلەردىڭ ءبىرى اۋىلداعى تۇرعىن ءۇي تاپشىلىعى بولىپ وتىر.
"كەزدەسۋلەردە اۋىل حالقى، اسىرەسە جاستار مەن جاس وتباسىلار، "ءۇي بولسا، اۋىلدا قالار ەدىك"، "تۇراتىن باسپانا جوق بولعاندىقتان قالاعا كوشۋگە ءماجبۇرمىز" دەگەن ۋاجدەرىن اشىق ايتۋدا. بۇل ماسەلە اۋىلدان جاستاردىڭ جاپپاي كوشۋىنە، كادر تاپشىلىعىنا جانە اۋىلدىق اۋماقتاردىڭ الەۋمەتتىك-ەكونوميكالىق السىرەۋىنە تىكەلەي اسەر ەتۋدە. اۋىلدىق اۋماقتاردى دامىتۋدىڭ 2023–2027 جىلدارعا ارنالعان تۇجىرىمداماسىندا جانە "اۋىل – ەل بەسىگى" جوباسى اياسىندا ينفراقۇرىلىمدى دامىتۋعا باسىمدىق بەرىلگەنىمەن، اۋىلدىق جەرلەردە تۇرعىن ءۇي سالۋعا تىكەلەي باعىتتالعان جەكە مەملەكەتتىك باعدارلاما ءالى كۇنگە دەيىن قالىپتاستىرىلماعان. قولدانىستاعى باعدارلامالار نەگىزىنەن ينجەنەرلىك ينفراقۇرىلىم مەن الەۋمەتتىك نىسانداردى قامتيدى، ال تۇرعىن ءۇي ماسەلەسى جۇيەلى تۇردە شەشىلمەي وتىر"،- دەدى ول.
دەپۋتاتتىڭ ايتۋىنشا، حالىقارالىق تاجىريبە كورسەتكەندەي، اۋىلدىق جەرلەردە تۇرعىن ءۇي سالۋعا باعىتتالعان ماقساتتى باعدارلامالار اۋىلدى ساقتاۋدىڭ جانە دامىتۋدىڭ ءتيىمدى قۇرالى بولىپ تابىلادى.
"ەلىمىزدەگى وڭ تاجىريبەگە توقتالساق. قىزىلوردا وبلىسى – قازاقستاندا بالاماسى جوق باستامالاردى قولعا العان بىرەگەي ايماق. ءوڭىر باسشىلىعى قۇرىلىس قارقىنىنا ساراپتاما جاساي كەلىپ، قالادا تۇرعىن ءۇي نەعۇرلىم كوپ سالىنعان سايىن، سوعۇرلىم اۋىلدان جاستاردىڭ قالاعا كوشۋ كورسەتكىشى دە وسەتىنىن بايقاعان. ونىڭ ناتيجەسىندە، ورتالىقتا ەمەس، اۋىل-ايماقتاردا تۇرعىن ءۇي سالۋ جۇمىستارىنا باسىمدىلىق بەرۋ قاجەتتىلىگى تۋرالى شەشىم قابىلدانعان. ناتيجەسىندە، سوڭعى 3 جىلدا قىزىلوردا وبلىسىنىڭ بارلىق اۋداندارىندا جاڭا تۇرعىن ۇيلەر سالىنىپ، العاش رەت 1800-گە جۋىق پاتەر پايدالانۋعا بەرىلگەن. بيىل 3600 پاتەرلىك تۇرعىن ۇيلەر سالۋعا بيۋدجەتتەن 58،7 ملرد تەڭگە ءبولىندى"،- دەپ مالىمدەدى دەپۋتات.
وسىعان بايلانىستى،ول ۇكىمەتكە تومەندەگىدەي ناقتى ۇسىنىستار ەنگىزدى:
ءبىرىنشى - اۋىلداردىڭ دەموگرافيالىق، ەكونوميكالىق جانە الەۋمەتتىك الەۋەتىن ەسكەرە وتىرىپ، اۋىلدىق ەلدى مەكەندەردىڭ ءبىرىڭعاي كارتاسىن ازىرلەۋ. بۇل كارتا ءار اۋىلدىڭ دامۋ باعىتىن ايقىنداۋعا، تۇرعىن ءۇي قۇرىلىسى مەن مەملەكەتتىك قولداۋ شارالارىن ءدال جوسپارلاۋعا مۇمكىندىك بەرەدى.
ەكىنشى - اۋىلدىق ەلدى مەكەندەرگە ارنالعان، تۇرعىن ءۇي سالۋعا تىكەلەي باعىتتالعان جەكە مەملەكەتتىك تۇرعىن ءۇي باعدارلاماسىن ازىرلەۋ. اتالعان باعدارلاما "اۋىل – ەل بەسىگى" جوباسىن تولىقتىرىپ، اۋىلدا تۇراقتى ءومىر سۇرۋگە ناقتى جاعداي جاساۋعا باعىتتالۋى ءتيىس.
ءۇشىنشى - اۋىلدا جۇمىس ىستەپ، سول جەردە ءۇي سالىپ، تۇرمىسىن جاقسارتقىسى كەلەتىن جاستار مەن جاس وتباسىلاردى قولداۋعا ارنالعان "تۋعان جەر، تۋعان ەل، ءوز اۋىلىم" سەكىلدى ارنايى جوبالاردى ەنگىزۋ. بۇل جوبالاردى ىسكە اسىرۋعا بيزنەس وكىلدەرىن تارتۋ ارقىلى مەملەكەتتىك-جەكەمەنشىك ارىپتەستىكتى كەڭەيتۋ دە ۇسىنىلادى.
ءتورتىنشى - مەملەكەت ەسەبىنەن سالىناتىن تۇرعىن ۇيلەردى الەۋمەتتىك ساناتتار بويىنشا ءبولۋ. اتاپ ايتقاندا، الەۋمەتتىك از قامتىلعان وتباسىلارعا، جاس وتباسىلارعا، اۋىلعا كوشىپ كەلگىسى كەلەتىن ازاماتتارعا ارنالعان جەكە قولداۋ تەتىكتەرىن (جەڭىلدىكتەر، كرەديتتىك سحەمالار، ينجەنەرلىك ينفراقۇرىلىمعا قولجەتىمدىلىك، جۇمىسپەن قامتۋ) قاراستىرۋ قاجەت.