الماتىنىڭ №2 بالالار قالالىق كلينيكالىق اۋرۋحاناسىندا قول، مويىن جانە كەۋدە تۇسى قاتتى كۇيىپ قالىپ، سونىڭ اۋىر زاردابىن تارتىپ كەلە جاتقان بالاعا جاسالعان اسا كۇردەلى بىرەگەي وتا ساتىمەن اياقتالدى.
وپەراسيا تۋا بىتكەن جانە جۇرە پايدا بولعان پاتولوگياسى بار بالالارعا ارنالعان رەكونسترۋكتيۆتى حيرۋرگيا بويىنشا حالىقارالىق «شەبەرلىك ساباعى» شەڭبەرىندە جۇزەگە اسىرىلدى. ونى Samruk Kazyna Trust كورپوراتيۆتىك قورىنىڭ قولداۋىمەن «ەرىكتى قايىرىمدىلىق قوعامى» قوعامدىق قورى ۇيىمداستىردى.
ناۋقاس 1 جاس 8 ايلىق. وسىدان سەگىز اي بۇرىن ۇستىنە قايناعان سۋ توگىلىپ، قاتتى كۇيىپ قالعان. ناتيجەسىندە وڭ قولىندا، كەۋدەسىندە جانە مويىندا ايتارلىقتاي تىرتىقتار پايدا بولىپ، وڭ قولدىڭ بىلەزىك بۋىن مەن باس بارماعى تىرتىققا تارتىلىپ شىعىپ كەتكەن، ساۋساق قوزعالىسسىز.
№2 بالالار قالالىق كلينيكالىق اۋرۋحاناسىنىڭ تراۆماتولوگ-ورتوپەد دارىگەرى ۇلجان سولتانبەكوۆا تۇسىندىرگەندەي، مۇنداي حيرۋرگيالىق ارالاسۋلار كوپ جاعدايدا كۇيىكتەن 6 اي وتكەننەن كەيىن، تىرتىق تۇراقتالعاندا جاسالادى. وسىلايشا، بۇل جولى وتا كۇيىكتەن سەگىز اي وتكەن سوڭ جاسالدى. ءبىراق كەيدە اياق-قولدىڭ جۇمىسىن ەرتەرەك قالپىنا كەلتىرۋ قاجەت بولادى. ويتكەنى ۋاقىت وتە كەلە سىڭىرلەردىڭ، تامىرلار مەن نەرۆتەردىڭ قىسقارۋى، بۋىنداردىڭ دەفورماسياسى جانە سۇيەكتەردىڭ قيسىق ءوسۋى بايقالادى. ال ودان كەيىنگى حيرۋرگيالىق ەمدەۋ ايتارلىقتاي كولەمدى، بىرنەشە رەتتىك جانە كۇردەلى بولۋى ىقتيمال.
وتا كەزىندە دارىگەرلەر كىشكەنتاي ناۋقاستىڭ تىرتىق ءتىنىن الىپ تاستاپ، باس بارماعىن تۇزەتىپ، قالپىنا كەلتىردى. پايدا بولعان تەرى اقاۋىن جابۋ ءۇشىن كارى جىلىك ارتەرياسىمەن قانداناتىن تەرى جىلجىتىلدى. دونورلىق ايماق شات ايماعىنان الىنعان تەرىمەن جابىلدى.
ءقازىر بالانىڭ جاعدايى تۇراقتى. كەلەسى ايدا دارىگەرلەردىڭ باقىلاۋىندا بولادى، ال قولى 3-4 اپتا بويى گيپسپەن بەكىتىلەدى. قاجەت بولسا، بولاشاقتا سىرتقى ءتۇرىن، ەستەتيكالىق ناتيجەسىن جاقسارتۋ ءۇشىن قوسىمشا تۇزەتۋ وتاسى جاسالۋى مۇمكىن.
ساراپشىلار وسىنداي كۇردەلى وتالار حيرۋرگتىڭ جوعارى بىلىكتىلىگى مەن ۇلكەن تاجىريبەسىن قاجەت ەتەتىنىن اتاپ ءوتتى. مۇندا كارى جىلىك نەرۆتىڭ جاقىن ورنالاسۋىنا جانە ارتەريانىڭ وتا ۇستىندە دۇرىس ءبولىپ الۋ كۇردەلىلىگىنە بايلانىستى اسا ساقتىق، دالدىك قاجەت.
كۇردەلى وتانى №2 بقكا-نىڭ دارىگەرلەر توبى رەسەيلىك جەتەكشى مامان – پلاستيكالىق جانە قول حيرۋرگى سەرگەي يۆانوۆيچ گولياننىڭ باسشىلىعىمەن جۇرگىزدى.
«مۇنداي حالىقارالىق «شەبەرلىك ساباعىنا» قاتىسۋ الماتىلىق دارىگەرلەرگە زاماناۋي ەمدەۋ ادىستەرىن جەتىك مەڭگەرۋگە جانە كلينيكالىق تاجىريبەدە بىلىكتىلىگىن ارتتىرۋعا مۇمكىندىك بەرەدى. ءبىزدىڭ ماماندار الداعى ۋاقىتتا زاماناۋي ميكروحيرۋرگيالىق تەحنولوگيالاردى قولدانا وتىرىپ، وسىنداي رەكونسترۋكتيۆتىك وتالاردى ءوز بەتىنشە ورىنداپ، قازاقستاندىق بالالارعا كومەكتەسە الۋعا قاۋقارلى. ءبىز ۇنەمى يننوۆاسيالىق تەحنولوگيالاردى ۇيرەنۋگە، دامۋعا جانە وسى باعىتتا العا جىلجۋعا ۇمتىلاتىن بولامىز»، – دەپ اتاپ ءوتتى №2 بقكا ديرەكتورى مارات راباندياروۆ.
وتادان باسقا، وسى «شەبەرلىك ساباعى» شەڭبەرىندە 20 پاسيەنتكە ءمامس اياسىندا تەگىن كەڭەس بەرىلدى. الماتى جانە قازاقستان وڭىرلەرىنىڭ مەديسينالىق ۇيىمدارىنان 15 مامان بىلىكتىلىگىن ارتتىرىپ، تاجىريبە الماسۋدان ءوتتى.
مۇنداي «شەبەرلىك ساباقتارى» اۋىر دياگنوزى بار بالالارعا شەتەل اسپاي-اق حالىقارالىق دەڭگەيدەگى جوعارى تەحنولوگيالىق مەديسينالىق كومەك الۋعا مۇمكىندىك بەرەدى.