الماتى قالاسى اكىمدىگى مەن «قازاقستاندى كوگالداندىرۋ» قاۋىمداستىعى جەتىسۋ اۋدانىنىڭ «كوكجيەك» ىقشاماۋدانىندا «Almaty Clean & Green» اتتى قالالىق ەكولوگيالىق اكسياسىن ۇيىمداستىردى. جەرگىلىكتى اكىمدىك شارانى ۇيىمداستىرۋشىلارعا قاجەتتى جابدىقتاردى ۇسىنىپ (قولعاپ، قاپ، كۇرەك، تىرما)، اكسياعا قاتىسۋشىلاردى اۋىز سۋمەن جانە تاماقپەن قامتاماسىز ەتتى.
– بۇگىنگى ۇيىمداستىرىلعان ءىس-شارا قالامىز ءۇشىن ۇلكەن مەرەكە دەپ ايتساق تا بولادى. كوكتەم كەلگەندە بارلىعىمىز دا بەلسەندى جۇمىستارعا كىرىسەمىز، ءۇيىمىزدى جيناپ، اعاش وتىرعىزىپ، كوشەلەردى تازالايمىز. بۇل سەنبىلىك اكسياسى قالامىزدىڭ قىستان كەيىن تازارىپ، كوركەيۋى ءۇشىن قاجەت. قالامىزدىڭ تۇرعىندارىنا ايتارىم، ەڭ الدىمەن تازالىقتى وزىمىزدەن باستاۋىمىز كەرەك. قوقىستاردى جيناپ، ارنايى جاشىكتەرگە سالىپ جۇرسەك، مۇنىڭ ءوزى سۇيىكتى قالامىزدىڭ تازا بولۋى ءۇشىن ۇلكەن كومەك بولادى، – دەدى قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى نازيرا توعىزبايەۆا.