قما-نىڭ استانا قالاسى بويىنشا دەپارتامەنتى زاڭسىز كاسىپكەرلىكپەن اينالىسۋ جانە قىلمىستىق جولمەن كەلگەن اقشانى زاڭداستىرۋ بويىنشا بلوگەرلەر ەربولات جانابىلوۆ پەن ەلميرا تولەگەنوۆاعا قاتىستى سوتالدى تەرگەپ-تەكسەرۋدى اياقتادى، - دەپ حابارلايدى aqshamnews.kz ءتىلشىسى.
قما مالىمەتىنشە، Instagram جەلىسىندە (15 ميلليوننان اسا وقىرمانى بار) كوپ اۋديتورياعا يە ەرلى-زايىپتى ءوز وقىرماندارىنىڭ سەنىمىن زاڭسىز تابىس تابۋ ماقساتىندا پايدالانعان.
"2025 جىلى ولار ونلاين كۋرستاردى ساتۋ دەگەن جەلەۋمەن زاڭسىز سحەما ۇيىمداستىرعان. بۇل كۋرستاردى ساتىپ الۋدىڭ نەگىزگى سەبەبى قىمبات سىيلىقتار ۇتىسىنا قاتىسۋ بولعان. تاراتىلعان بەينەماتەريالداردىڭ باسىم بولىگى اشىق دەرەككوزدەن، سونىڭ ىشىندە YouTube پلاتفورماسىنان الىنعان. بۇل كۋرستاردىڭ ناقتى ءبىلىم بەرۋ قۇندىلىعى بولماعان جانە ولار زاڭسىز لوتەرەيا قىزمەتىن جاسىرۋ ءۇشىن عانا پايدالانىلعان. جۇلدە قورى جاريا تۇردە مالىمدەلگەندەي جەكە قاراجاتى ەسەبىنەن ەمەس، ونلاين كۋرستارعا اقى تولەۋ تۇرىندە قاتىسۋشىلاردان تۇسكەن اقشا ەسەبىنەن جيناقتالعان. ەلەكترون "ساتتىلىك بارابانىنىڭ" پارامەترلەرىن وزگەرتۋ دەرەگى انىقتالدى، سونىڭ ناتيجەسىندە 5 000 تەڭگەلىك جۇلدەنى ۇتىپ الۋ ىقتيمالدىعى جاساندى تۇردە ارتتىرىلىپ، ال قۇندى جۇلدەلەردى ۇتىپ الۋ مۇمكىندىگى ەداۋىر تومەندەتىلگەن"، - دەپ جازىلعان حابارلامادا.
اگەنتتىك مالىمەتىنە سۇيەنسەك، كۇدىكتىلەر جاريا تۇردە ەڭ كوپ رەپوست جاساعان قاتىسۋشىعا 11-كولىك تابىستالعانىن مالىمدەپ، اكسيانىڭ قامتۋ اياسىن كەڭەيتۋ مەن نازار اۋدارۋ ماقساتىن كوزدەگەن. الايدا ءىس جۇزىندە جەڭىمپاز انىقتالماعان جانە سىيلىق تابىستالماعان.
قاراجاتتىڭ جالپى سوماسى
ازاماتتاردان Zhana Business جشس-نىڭ باقىلاۋىنداعى شوتتارعا تۇسكەن قاراجاتتىڭ جالپى سوماسى - 247،5 ملن تەڭگە، ونىڭ 60 ملن تەڭگەسى دەپوزيت شوتتارىنا سالىنعان.
سوت سانكسياسىمەن 17 iPhone ۇيالى تەلەفونىنا، Lamborghini Urus، Lexus LX 600 كولىكتەرىن قوسقاندا جالپى 10 كولىككە تىيىم سالىنعان.
كۇدىكتىلەرگە ءۇيقاماق تۇرىندەگى بۇلتارتپاۋ شاراسى تاڭدالعان. ءقازىر كۇدىكتىلەر قىلمىستىق ءىس ماتەريالدارىمەن تانىسۋعا كىرىسكەنى بەلگىلى بولدى.