قازاقستان رەسپۋبليكاسى ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ الماتى قالاسىنداعى جاس سايلاۋشىلار كلۋبىنىڭ مۇشەلەرىمەن كەزدەستى.
ءىس-شارا ناۋرىزباي اۋدانىنداعى «الەم» مەكتەپ وقۋشىلارىنىڭ يننوۆاسيالىق شىعارماشىلىق ورتالىعىندا ءوتتى. كەزدەسۋ بارىسىندا جاس سايلاۋشىلار كلۋبىنىڭ قىزمەتى، جاستاردىڭ سايلاۋ ۇدەرىستەرىنە قاتىسۋى، سونداي-اق جاستار باستامالارىنىڭ سايلاۋ تەتىكتەرىن ءتۇسىنۋ مەن ۇعىنۋداعى ماڭىزى تالقىلاندى. بۇل ءىس-شارا جىل سايىن اقپان ايىنىڭ ءبىرىنشى بەيسەنبىسىندە اتالىپ وتەتىن دۇنيەجۇزىلىك سايلاۋ كۇنىنە وراي ۇيىمداستىرىلدى.
– بىرىككەن ۇلتتار ۇيىمى مويىنداعان 193 مەملەكەت بار جانە ونىڭ ىشىنە قازاقستان دا كىرەدى. وسى ۇلكەن حالىقارالىق قوعامداستىقتىڭ ءبىر بولىگى بولا وتىرىپ، بىزدە دە كەز كەلگەن مەملەكەتتە سەكىلدى ءوزىمىزدىڭ سايلاۋ جۇيەمىز بار. سوندىقتان دۇنيەجۇزىلىك سايلاۋ كۇنى – ەلىمىزدە دە اتاپ وتىلەدى. ورتالىق سايلاۋ كوميسسياسى، سونداي-اق جەرگىلىكتى جەرلەردەگى كوميسسيالار – ءبارىمىز بىرگە وسى مەملەكەتتىك جانە قوعامدىق ماڭىزى بار مىندەتتى شەشۋدى قامتاماسىز ەتۋگە تىرىسامىز، – دەدى ول.
كەزدەسۋ بارىسىندا نۇرلان ءابدىروۆ ورتالىق سايلاۋ كوميسسياسىنىڭ (وسك) جۇمىسىنا توقتالدى. ونىڭ ايتۋىنشا، ءتوراعانى قوسقاندا وسك-نىڭ 7 مۇشەسى بولادى. ولاردىڭ ۇشەۋىن پرەزيدەنت، ەكەۋىن سەنات، تاعى ەكەۋىن ءماجىلىس تاعايىندايدى. وكىلەتتىك مەرزىمى – 5 جىل. ال جالپى وسك اپپاراتىنىڭ 37 مەملەكەتتىك قىزمەتشىسى جانە ينجەنەرلىك-تەحنيكالىق ورتالىعىنىڭ 75 قىزمەتكەرى بار. ال ەل بويىنشا 247 اۋماقتىق سايلاۋ كوميسسياسى بار. ولاردىڭ قۇرامىندا 1729 ادام جۇمىس ىستەيدى. سونداي-اق، ءارتۇرلى دەڭگەيدەگى سايلاۋلاردى ۇيىمداستىراتىن 13 مىڭنان استام كوميسسيانىڭ قۇرامىندا 85 716 كوميسسيا مۇشەسى جۇمىس ىستەيدى. ءبىراق ءارتۇرلى دەڭگەيدەگى كوميسسيالاردىڭ 85 مىڭنان استام مۇشەسى – بۇل سايلاۋ كوميسسيالارىنىڭ كاسىبي قىزمەتكەرلەرى ەمەس. ولار ناۋقان كەزىندە كەلىپ جۇمىس ىستەيدى.
– سايلاۋ ناۋقاندارىنىڭ تاريحىنا توقتالساق، ەلىمىز تاۋەلسىزدىك العاننان بەرى 4 رەسپۋبليكالىق رەفەرەندۋم، 7 پرەزيدەنت سايلاۋى، 11 سەنات دەپۋتاتتارىن سايلاۋ، 8 ءماجىلىس دەپۋتاتتارىن سايلاۋ، 8 ءماسليحات دەپۋتاتتارىن سايلاۋ ءوتتى. ال 2021 جىلدان باستاپ اۋىل اكىمدەرىنىڭ تىكەلەي سايلاۋ جانە 2025 جىلدان باستاپ بارلىق اۋداندار مەن وبلىستىق قالالاردىڭ اكىمدەرىن سايلاۋ ءوتىپ كەلەدى، – دەدى ول.
نۇرلان ءابدىروۆ ءماسليحات دەپۋتاتتىعىنا 20 جاستان اسقان، ءماجىلىس دەپۋتاتتىعى مەن اۋىل اكىمى لاۋازىمىنا 25-تەن اسقان، سەنات دەپۋتاتتىعىنا 30 جاستان اسقان، ق ر پرەزيدەنتتىگىنە 40 جاستان اسقان ەل ازاماتتارى سايلاۋعا تۇسە الاتىنىن اتاپ ءوتتى. ايتۋىنشا، ەل ىشىندەگى ەڭ جاس اۋىل اكىمى اباي وبلىسى، جاڭاسەمەي اۋدانى، ەرتىس اۋىلىندا سايلانعان. ونىڭ جاسى – 26-دا. ال ەڭ جاس ءماسليحات دەپۋتاتى قوستاناي وبلىسى، قامىستى اۋدانىندا 23 جاسىندا سايلانعان. ەڭ جاس ءماسليحات دەپۋتاتىنىڭ جاسى – 28-دە.
سونىمەن قاتار، نۇرلان ءابدىروۆ ورتالىق سايلاۋ كوميسسياسى وڭتۇستىك كورەيا، رەسەي، تۇركيا، ازەربايجان، ماجارستان سىندى 14 مەملەكەتپەن ىنتىماقتاستىق تۋرالى مەموراندۋم جاسالعانىن ايتتى. وسك ءتوراعاسىنىڭ بايانداماسىنان كەيىن جاس سايلاۋشىلار كلۋبىنىڭ مۇشەلەرى وعان سۇراق قويىپ، قىزىقتىرعان ساۋالدارىنا جاۋاپ الدى.