«Dostyq» قازاقستان–پاكىستان سپورت ورتالىعى سالتاناتتى تۇردە اشىلدى. بۇل شارا ق ر پرەزيدەنتى قاسىم-جومارت توقايەۆتىڭ پاكىستانعا مەملەكەتتىك ساپارى اياسىندا ءوتتى، دەپ حابارلايدى aqshamnews.kz ق ر توعىزقۇمالاق فەدەراسياسىنىڭ باسپا ءسوز قىزمەتىنە سىلتەمە جاساپ.
2026 جىلعى 2–4 اقپان ارالىعىندا يسلاماباد قالاسىندا قازاقستان رەسپۋبليكاسى تۋريزم جانە سپورت مينيسترلىگىنىڭ جانە قازاقستان رەسپۋبليكاسىنىڭ توعىزقۇمالاق فەدەراسياسىنىڭ وكىلدەرى پاكىستان يسلام رەسپۋبليكاسىنا جۇمىس ساپارىمەن باردى. ساپار پاكىستانعا جوسپارلانعان مەملەكەتتىك ساپارعا دايىندىق اياسىندا ۇيىمداستىرىلدى.
ساپاردىڭ نەگىزگى ماقساتى – قازاقستان مەن پاكىستان اراسىنداعى ينتەللەكتۋالدىق سپورت تۇرلەرى، ونىڭ ىشىندە توعىزقۇمالاقتى حالىقارالىق دەڭگەيدە دامىتۋ، بىرلەسكەن ءبىلىم بەرۋ جانە سپورتتىق جوبالاردى ىسكە اسىرۋ، سونداي-اق سپورتتىق ديپلوماتيانى نىعايتۋ بولدى.
دەلەگاسيا قۇرامى
قازاقستان تاراپىنان ساپارعا ق ر تۋريزم جانە سپورت ۆيسە-مينيسترى راپيكوۆ باۋىرجان سەريكباي ۇلى ، مينيسترلىك وكىلدەرى، قازاقستان رەسپۋبليكاسىنىڭ توعىزقۇمالاق فەدەراسياسىنىڭ باسشىلىعى مەن جەتەكشى سپورتشىلارى قاتىستى.
دەلەگاسيا قۇرامىندا دۇنيەجۇزىلىك توعىزقۇمالاق فەدەراسياسىنىڭ ۆيسە-پرەزيدەنتى– ق ر توعىزقۇمالاق فەدەراسياسىنىڭ پرەزيدەنتى اكىم تۇرسۇن، توعىزقۇمالاقتان 3 دۇركىن الەم چەمپيونى سەرىك اقتايەۆ، ق ر توعىزقۇمالاق فەدەراسياسىنىڭ اتقارۋشى ديرەكتورى ازامات قالدىبايەۆ جانە حالىقارالىق دارەجەدەگى سپورت شەبەرلەرى، ۇلتتىق زياتكەرلىك سپورت ءتۇرىن ناسيحاتتاۋشى ماماندار بولدى.
نەگىزگى ءىس-شارالار
3 اقپان كۇنى يسلاماباد قالاسىنداعى Pakistan Sports Board بازاسىندا ورنالاسقان قازاقستان–پاكىستان «Dostyq» سپورت ورتالىعى سالتاناتتى تۇردە اشىلدى.
اشىلۋ راسىمىندە قازاقستان رەسپۋبليكاسى مەن پاكىستان يسلام رەسپۋبليكاسىنىڭ مەملەكەتتىك ءانۇراندارى ورىندالدى. پاكىستاننىڭ پروۆينسياارالىق ۇيلەستىرۋ جونىندەگى فەدەرالدى حاتشىسى جانە ق ر تۋريزم جانە سپورت ۆيسە-مينيسترى قۇتتىقتاۋ ءسوز سويلەدى. وسى جەردە توعىزقۇمالاق پەن شاحمات سىنىپتارىنىڭ رەسمي تانىستىرىلىمى ءوتتى. قازاقستاندىق ماماندار توعىزقۇمالاقتىڭ تاريحى، ەرەجەلەرى جانە حالىقارالىق دامۋ پەرسپەكتيۆالارى تۋرالى بايانداما جاسادى.
سونىمەن قاتار، توعىزقۇمالاقتان 3 دۇركىن الەم چەمپيونى سەرىك اقتايەۆ پاكىستاندىق سپورتشىلار مەن جاتتىقتىرۋشىلارعا ارناپ شەبەرلىك ساباعىن وتكىزدى. ساباق بارىسىندا ويىننىڭ ستراتەگيالىق ەرەكشەلىكتەرى، وقۋ-جاتتىعۋ ادىستەمەلەرى جانە حالىقارالىق جارىستارعا دايىندىق تاجىريبەسىمەن ءبولىستى.
قۇجاتتارعا قول قويۋ
ساپار بارىسىندا ينتەللەكتۋالدىق جانە ۇلتتىق سپورت تۇرلەرىن دامىتۋعا باعىتتالعان كەلەسى ماڭىزدى قۇجاتتارعا قول قويىلدى.
قازاقستان–پاكىستان «Dostyq» سپورت ورتالىعىن قۇرۋ تۋرالى مەموراندۋم ءتۇزىلدى. قازاقستان مەن پاكىستان اراسىنداعى 2026 جىلعا ارنالعان سپورتتىق ءىس-شارالار جول كارتاسى، ونىڭ ىشىندە توعىزقۇمالاق بويىنشا بىرلەسكەن تۋرنيرلەر مەن وقۋ سەمينارلارىن وتكىزۋ كەلىسىلدى. توعىزقۇمالاقتى پاكىستان اۋماعىندا دامىتۋعا باعىتتالعان ىنتىماقتاستىق جونىندەگى ۋاعدالاستىقتار جاسالدى.
مادەني باعدارلاما
رەسمي ىس-شارالارمەن قاتار، دەلەگاسيا يسلاماباد قالاسىنداعى «لوك ۆيرسا» حالىقتىق مۇرا مۋزەيىن جانە پاكىستان مونۋمەنتىن ارالادى. پاكىستاندىق ارىپتەستەر تاراپىنان رەسمي قابىلداۋلار مەن جۇمىس كەزدەسۋلەرى ۇيىمداستىرىلدى.
ساپاردىڭ ماڭىزى
بۇل ساپار قازاقستان مەن پاكىستان اراسىنداعى دوستىق قارىم-قاتىناستى نىعايتىپ قانا قويماي، توعىزقۇمالاقتى حالىقارالىق دەڭگەيدە ىلگەرىلەتۋگە، بىرلەسكەن وقۋ-جاتتىعۋ جيىندارىن، تۋرنيرلەر مەن ءبىلىم بەرۋ باعدارلامالارىن وتكىزۋگە جاڭا مۇمكىندىكتەر اشتى.
قازاقستان رەسپۋبليكاسىنىڭ توعىزقۇمالاق فەدەراسياسى ءۇشىن بۇل ساپار ۇلتتىق زياتكەرلىك سپورت ءتۇرىن وڭتۇستىك ازيا ايماعىندا تانىتۋ جولىنداعى ماڭىزدى قادام بولدى.