تايم-مەنەدجمەنت – بۇل جۇمىستى جۇيەلى جوسپارلاۋعا، ۋاقىتتى بارىنشا ءتيىمدى پايدالانۋعا كومەكتەسەتىن داعدىلار مەن ادىستەر جيىنتىعى. زاماناۋي كومپانيالار ءۇشىن تايم-مەنەدجمەنتتى ەنگىزۋ – قىزمەتكەرلەردىڭ ونىمدىلىگىن ارتتىرۋدىڭ، سترەسستى ازايتۋدىڭ جانە بيزنەس ناتيجەلەرىن جاقسارتۋدىڭ ماڭىزدى قۇرالى.
تايم-مەنەدجمەنت دەگەنىمىز نە؟
تايم-مەنەدجمەنت (اعىلش. Time Management – ۋاقىتتى باسقارۋ) – جۇمىس ۋاقىتىن جوسپارلاۋ مەن ۇيىمداستىرۋعا ارنالعان داعدىلار، تەحنيكالار جانە قۇرالدار جۇيەسى. بۇل ءتاسىلدىڭ نەگىزگى ماقساتى – بارلىق ءىستى ءبىر ۋاقىتتا جاساۋ ەمەس، كەرىسىنشە، مىندەتتەردى دۇرىس رەتپەن قويىپ، ولاردى ءبىرىزدى جانە جۇيەلى تۇردە ورىنداۋدى ۇيرەنۋ.
تايم-مەنەدجمەنت ادىستەرىن ەنگىزۋ HR-ماماندار ءۇشىن ماڭىزدى مىندەت. ۇجىمداعى ۋاقىتتىڭ دۇرىس ۇيىمداستىرىلماۋى تاپسىرمالاردىڭ كەشىگۋىنە، جۇمىس ساپاسىنىڭ تومەندەۋىنە جانە قىزمەتكەرلەردىڭ كۇيزەلىسكە ۇشىراۋىنا اكەلەدى. مۇنىڭ سالدارىنان كومپانيانىڭ جالپى ونىمدىلىگى مەن تابىستىلىعى دا تومەندەيدى.
ءتيىمدى تايم-مەنەدجمەنت جۇمىس پروسەسىندەگى توقىراۋلاردىڭ الدىن الۋعا كومەكتەسەدى. ناقتى جوسپار، دۇرىس قويىلعان باسىمدىقتار مەن مىندەتتەردىڭ ۇتىمدى ءبولىنۋى كومپانيا رەسۋرستارىن وڭتايلاندىرىپ، قىزمەتكەرلەردىڭ تيىمدىلىگىن ارتتىرىپ، كومانداداعى احۋالدى جاقسارتادى.
تايم-مەنەدجمەنتتىڭ نەگىزگى قاعيداتتارى
جۇمىس ۋاقىتىن دۇرىس ۇيىمداستىرۋ بارشاعا تۇسىنىكتى ءارى ناقتى ەرەجەلەرگە نەگىزدەلۋى ءتيىس. ولاردىڭ نەگىزگى قاعيداتتارى تومەندەگىدەي:
جوسپارلاۋ.
جۇمىس پروسەسىن ءتيىمدى ۇيىمداستىرۋ ءۇشىن الدىمەن اتقارىلاتىن مىندەتتەردى انىقتاپ، ولاردىڭ ءارقايسىسىنا كەتەتىن ۋاقىت پەن كۇشتى باعالاۋ قاجەت. جوسپار قاتاڭ رەگلامەنت بولماۋى ءتيىس – كۇتپەگەن جاعدايلار ءۇشىن جۇمىس كۇنىنىڭ ءبىر بولىگى بوس قالدىرىلعانى دۇرىس.
ماقسات قويۋ.
ناقتى ءارى تۇسىنىكتى ماقسات – تاپسىرمانىڭ ساپالى ورىندالۋىنىڭ كەپىلى. قىزمەتكەر وزىنەن نە كۇتىلەتىنىن انىق بىلسە، ونىڭ جۇمىس تيىمدىلىگى دە ارتادى.
باسىمدىقتاردى انىقتاۋ.
بارلىق تاپسىرمالار بىردەي ماڭىزدى نەمەسە شۇعىل بولا بەرمەيدى. پارەتو زاڭى بويىنشا، كۇش-جىگەردىڭ 20%-ى ناتيجەنىڭ 80%-ىن بەرەدى. دۇرىس باسىمدىق قويۋ دەدلاينداردىڭ بۇزىلۋ ءقاۋپىن ازايتىپ، جۇمىس پروسەسىن جىلدامداتادى.
قۇرىلىمداۋ.
كۇردەلى تاپسىرمالاردى بىرنەشە شاعىن كەزەڭگە ءبولۋ جۇمىس بارىسىن باقىلاۋدى جەڭىلدەتىپ، مىندەتتەردى ءتيىمدى بولۋگە مۇمكىندىك بەرەدى.
جۇكتەمەنى رەتتەۋ.
دەمالىس – ارتىقشىلىق ەمەس، قاجەتتىلىك. ۇزدىكسىز جانە قارقىندى جۇمىس شارشاۋعا، كۇيزەلىسكە الىپ كەلەدى، بۇل ءوز كەزەگىندە جۇمىس ساپاسىنا كەرى اسەر ەتەدى.
تايم-مەنەدجمەنتتىڭ پراكتيكالىق ادىستەرى
جۇمىس تيىمدىلىگىن ارتتىرۋ ءۇشىن تايم-مەنەدجمەنتتىڭ ءتۇرلى ادىستەرى قولدانىلادى. ماڭىزدىسى – ءادىستى كەزدەيسوق تاڭداماي، الدىمەن كوماندانىڭ ءالسىز تۇستارىن تالداۋ. تومەندە كەڭ تارالعان تاسىلدەردىڭ بىرنەشەۋى بەرىلگەن:
ەيزەنحاۋەر ماتريساسى
تاپسىرمالاردى ءتورت ساناتقا بولۋگە كومەكتەسەدى:
– ماڭىزدى جانە شۇعىل
– ماڭىزدى، ءبىراق شۇعىل ەمەس
– شۇعىل، ءبىراق ماڭىزدى ەمەس
– ماڭىزدى ەمەس جانە شۇعىل ەمەس
Pomodoro تەحنيكاسى
جۇمىس پەن دەمالىستى ناقتى ۋاقىتقا ءبولۋ: ءار 25 مينۋت جۇمىس سايىن 5 مينۋتتىق ءۇزىلىس جاساۋ.
Kanban جۇيەسى
جۇمىس پروسەستەرىن ۆيزۋاليزاسيالاۋ ارقىلى تاپسىرمالاردىڭ ورىندالۋ كەزەڭدەرىن باقىلاۋعا مۇمكىندىك بەرەدى. ول ءۇشىن ارنايى تاقتالار نەمەسە سيفرلىق قۇرالدار قولدانىلادى.
Getting Things Done (GTD) – ديەۆيد اللەن ءادىسى
بارلىق اقپارات پەن تاپسىرمالاردى جۇيەلەپ، ولاردى سىرتقى تاسىمالداۋشىلار (جازبالار، قوسىمشالار) ارقىلى باسقارۋعا نەگىزدەلگەن ءادىس.
سيفرلىق شەشىمدەر جانە تايم-مەنەدجمەنت
سيفرلىق تەحنولوگيالار تايم-مەنەدجمەنتتى كومپانيا جۇمىسىنا ەنگىزۋدى ەداۋىر جەڭىلدەتەدى. بۇگىندە قاراپايىم جوسپارلاۋشى قوسىمشالار كوپفۋنكسيونالدى HCM جانە HRM-پلاتفورمالارعا ورىن بەرىپ كەلەدى. مۇنداي جۇيەلەر تاپسىرمالاردى جوسپارلاۋ، باقىلاۋ جانە قىزمەتكەرلەردىڭ ونىمدىلىگىن باسقارۋ مۇمكىندىكتەرىن بىرىكتىرەدى.