2026 جىلعى 6–22 اقپانى ارالىعىندا ميلاندا قورعانىس مينيسترلىگى ارميا ورتالىق سپورت كلۋبىنىڭ اسكەري قىزمەتشىلەرى قىسقى وليمپيادا ويىندارىندا قازاقستاننىڭ اتىنان سايىسقا تۇسەدى.
ۇلتتىق قۇرامانىڭ قاتارىنا رەسپۋبليكالىق جانە حالىقارالىق دەڭگەيلەردە ايتارلىقتاي جەتىستىكتەرى بار جەتى ارميا سپورتشىسى – بياتلونشىلار مەن شاڭعىشىلار كىردى.
بياتلون جارىسىندا ەفرەيتور ۆلاديسلاۆ كيرەيەۆ – سپرينتتە 2025 جىلعى قىسقى ازيا ويىندارىنىڭ چەمپيونى، ازيادا-2025 ەرلەر ەستافەتاسىنىڭ كۇمىس جۇلدەگەرى، ازيا چەمپيوناتىنىڭ التىن جانە قولا مەدالدارىنىڭ يەگەرى سىنعا تۇسەدى. الەم كۋبوگى ماۋسىمىندا ول قازاقستاندىق بياتلونشىلار اراسىندا ۇزدىك ناتيجە كورسەتىپ، كەزەڭدەردىڭ بىرىندە ۇزدىك 20 سپورتشىنىڭ قاتارىنا كىرگەن بولاتىن.
بۇدان وزگە ەل نامىسىن قورعايتىندار ساپىندا 2025 جىلعى قىسقى ازيا ويىندارىنىڭ كۇمىس جۇلدەگەرى، دۇنيەجۇزىلىك ۋنيۆەرسيادانىڭ ەكى دۇركىن كۇمىس جۇلدەگەرى، حالىقارالىق دارەجەدەگى سپورت شەبەرى اسەت دۇيسەنوۆ؛ «ازيا بالالارى» حالىقارالىق جاسوسپىرىمدەر جارىستارىنىڭ قولا جۇلدەگەرى، حالىقارالىق دارەجەدەگى سپورت شەبەرى ايشا راقىشيەۆا؛ IBU كۋبوگى كەزەڭدەرىنىڭ بىرنەشە دۇركىن قاتىسۋشىسى ميلانا گەنيەۆا دا بار.
ۇلتتىق كوماندا ءۇشىن شاڭعى جارىستارىندا دۇنيەجۇزىلىك ۋنيۆەرسيادانىڭ قولا جۇلدەگەرى، 2022 جىلعى وليمپيادا ويىندارىنىڭ قاتىسۋشىسى، 2025 جىلعى قىسقى ازيا ويىندارى ەستافەتاسىنىڭ كۇمىس جۇلدەگەرى نادەجدا ستەپاشكينا؛ حالىقارالىق دارەجەدەگى سپورت شەبەرى، 2025 جىلعى ازيا ويىندارىنىڭ كۇمىس جۇلدەگەرى، دۇنيەجۇزىلىك ۋنيۆەرسيادانىڭ ەكى دۇركىن قولا جۇلدەگەرى، 2022 جىلعى وليمپيادا ويىندارىنىڭ قاتىسۋشىسى كسەنيا شالىگينا؛ شاڭعى جارىسى بويىنشا قازاقستان كۋبوگىنىڭ جەڭىمپازى، ۇلتتىق جانە حالىقارالىق جارىستاردىڭ بىرنەشە دۇركىن جۇلدەگەرى اننا مەلنيك باعىن سىنايدى.
اسكەر سپورتشىلارىنىڭ وليمپيادا ويىندارىنا قاتىسۋى كوپ جىلعى تىنىمسىز ءارى جۇيەلى ەڭبەكپەن كەلگەن ديىندىقتىڭ، تەمىردەي ءتارتىپ پەن كاسىبي دەڭگەيدىڭ جوعارى ناتيجەسى ەكەنى ءسوزسىز.