«بوزقىراۋ»، «ۇلكەن قاراشا»، «قاۋىس» سياقتى ءقاۋىپتى امالدار ءوتتى. اپتا سوڭىندا قىستىڭ العاشقى امالى – «قىرباستىڭ قىزىلى» تۇر. وسى اپتادا «قۇس جولىنىڭ» باۋىرى (سۋرەتتە) اعارىپ تۇرادى
ايدىڭ 23 كۇنى مەرگەن جۇلدىزدار شوعىرى تورگە وزىپ، توبەگە شىقتى. ول «قۇس جولىندا» ورنالاسقان. گالاكتيكا ورتالىعى مەرگەننىڭ باعىتىندا ورىن تەپكەن. مەرگەن جۇلدىزى اياسىندا ومىرگە كەلگەندەردى مەرەكە-دۋماننىڭ ادامى دەپ ايتۋعا بولادى. ولار - ءومىردى ەرەكشە سۇيەتىن، اينالاسىنداعىلارعا كوتەرىڭكى كوڭىل-كۇي سىيلاي بىلەتىن جاندار.
ەلىمىزدەگى ءىرى كومپانيالار مەن مەملەكەتتىك قىزمەتتە جوعارى لاۋازىمدا جۇرگەن ادامدار اراسىندا مەرگەندەر از ەمەس. ولار قارجىلىق ەليتا اراسىندا دا تىعىز ورنالاسقان. مەرگەندەر ەش ۋاقىتتا ساراڭدىق تانىتپايدى، تيىن ساناۋدى دا ۇناتپايدى. ونىڭ بويىنداعى وپتيميستىك جانە سوزشەڭدىك قاسيەتى ءتۋابىتتى بەرىلگەن. كۇندەلىكتى تىرشىلىك ولاردىڭ ءىشىن پىستىرادى...
«ۇلكەن قاراشا» امالى ءالى ءجۇرىپ جاتىر. ايدىڭ 28-ىنە دەيىن كورىنىس بەرەدى. وسى ايدىڭ 20-سىنان باستالعان «قاۋىس» امالى، وتكەندە ايتقانىمىزداي، قاراشانىڭ 25-ىندە توقتايدى. امال بويىنشا، وسى كەزدە جەڭىل ءارى جۇمساق قار جاۋاتىن بولعان. اۋا رايى بىرتىندەپ سۋىيدى. «قاۋىس» ءسوزى «اق قار» دەگەن ماعىنانى بىلدىرەدى ەكەن.
قاراشانىڭ 25-ىنەن ۇركەر باتىپ، قىس توقساننىڭ باسى باستالادى. سول سەبەپتەن الداعى سۋىقتارعا شىدامايتىن كارى-قۇرتاڭ، كوتەرەم مالداردى سويىپ، «كۇز-سوعىم» جاسايدى.
«قاراشا كەلمەي، قار جاۋماس» دەيدى. قار قاراشانىڭ العاشقى كۇندەرىندە ءتۇسىپ، ەرىمەي جاتىپ قالسا، قىس ۇزاق بولادى دەپ بولجاعان. «وسى ايدا ادامدى، مالدى ىقتىرىپ، بەت قاراتپايتىن سۋىق جەل سوعادى، ونى ەل اراسىندا «ىقتىرما جەل» دەپ اتايدى» دەيدى پايىمدا. مۇنداي جاعداي الماتىدا اي باستالعالى كورىنىس بەرگەن جوق. ەلىمىزدىڭ شىعىسى مەن سولتۇستىگىندە تولىق دەڭگەيدە ورىن الدى. ونى اقپاراتتاردان ەستىپ جاتىرمىز.
قاراشا-جەلتوقسان ايلارىنىڭ تاعى ءبىر ەرەكشەلىگى - كيىكتەر ۇيىرگە تۇسەدى. حالىقتىڭ باقىلاۋى بويىنشا، كيىكتىڭ ۇيىرگە تۇسەتىن كەزىندە كۇن رايىندا ايتارلىقتاي وزگەرىس بولادى. سولاردىڭ اسەرىنەن «كيىكتىڭ مويىن جۋارى»، «كيىكتىڭ ماتاۋى»، «كيىكتىڭ بەلباسارى» ءتارىزدى ۇعىمدار پايدا بولعان. بۇلار - تابيعات قۇبىلىسى مەن كيىك تىرشىلىگى اراسىنداعى بايلانىستى اڭعارتاتىن اتاۋلار.
كيىكتىڭ ۇيىرگە ءتۇسۋ مەرزىمى بايتاق دالامىزدىڭ بارلىق جەرىندە بىردەي بولمايدى، ءار ايماقتىڭ تابيعي ەرەكشەلىگىنە بايلانىستى ءبىر جەردە ەرتە، ال ءبىر جەردە كەش ءوتىپ جاتادى. كيىكتىڭ ماتاۋى – كيىكتەر ۇيىرگە تۇسەتىن مەزگىل. كيىك، اقبوكەندەر بۇل كەزدە ۇلكەن توپ قۇرىپ، قورالانىپ جينالادى دا، ماتالادى، ياعني ۇيىرگە تۇسەدى.
جەلتوقساننىڭ باسىندا بولاتىن العاشقى ايازدى جۇرت «قىرباستىڭ قىزىلى» دەيدى جانە امال كەزىندە قاتتى اياز، بەت قاراتپايتىن سۋىق بولادى.
بۇگىن قولدانىستاعى كۇنتىزبە بويىنشا، ايدىڭ – 24ء-ى. اي ەسەبىمەن –29-ى، قازاقشا - 15ء-ى. اپتا ايدىڭ ورتاسى مەن اياعىنا سايكەس كەلىپ تۇر. بۇل الداعى اپتادا (قاراشا ايىنىڭ 24–30 ارالىعىندا) اۋا رايى قۇبىلمالى بولادى دەگەندى بىلدىرسە كەرەك. جاۋىن-شاشىن ورىن الادى. ءبىراق ايتارلىقتاي ىزعار بولمايتىن سىڭايلى. دەگەنمەن، اپتانىڭ سوڭىن الا كەلە جاتقان «قىرباستىڭ قىزىلى» امالىنىڭ ءقاۋپىن ۇمىتپاعان ءجون.
بابالار بولجامى
كۇن قيمىلىنا قاراپ جاسالعان جورامال:
*ەرتەڭگى كۇن قۇلاقتانسا، ەلىڭدى جاۋ شاپقانداي قورىق.
*كەشكى كۇن قۇلاقتانسا، كەلىنىڭ ۇل تاپقانداي قۋان.
*كۇن قۇلاقتانىپ شىقسا، نە بوران، نە ايازدىڭ بەلگىسى.
*كۇن قۇلاقتانىپ باتسا، اۋا رايى جىلى بولادى.
*كۇن قورالانسا، كۇرەگىڭدى سايلا.