قالا كۇنىنە ارنالعان نەگىزگى سالتاناتتى ءىس-شارا مەگاپوليستىڭ استانا الاڭىندا وتۋدە. ەل الدىنا شىعىپ ءسوز سويلەگەن الماتى اكىمى دارحان ساتىبالدى جينالعان قاۋىمدى قالا كۇنىمەن قۇتتىقتادى.
سونداي-اق تاريحى تەرەڭ قالامىزدىڭ تاۋەلسىزدىكتىڭ تالبەسىگى رەتىندە ايرىقشا ورىنعا يە ەكەنىن، ءدال وسى جەردە ەگەمەن ەلىمىزدىڭ تالاي تاعدىرلى شەشىمى قابىلدانىپ، مەملەكەت دامۋىنا تىڭ سەرپىن بەرگەنىن اتاپ ءوتتى.
اۋا رايى دا جارقىراپ تۇرعاندىقتان بولار، مەرەكە مەزەتتەرىنە كۋا بولۋعا اسىققان الماتىلىقتار مەن قالا قوناقتارىندا سان جوق. ارداگەرلەر، مەملەكەت جانە قوعام قايراتكەرلەرى، زيالى قاۋىم وكىلدەرى دە توردەن ورىن الدى.
_”الماتى مادەنيەت پەن ءبىلىمنىڭ بەرەكەلى وشاعى عانا ەمەس، ۇلكەن وركەنيەتتىڭ دە باستاۋى. قالا جاڭا تەحنولوگيا، جاساندى ينتەللەكت پەن ينۆەستيسيانىڭ ورتالىعىنا اينالۋدا. بۇل ورايدا جەمىستى جەتىستىكتەر جالعاسىن تابا بەرەدى، ول ءۇشىن بارلىق جاعدايدى جاساۋدامىز"، – دەدى شاھار باسشىسى.
جارقىن كوڭىل كۇيدەگى ۇلكەن-كىشى باس قوسقان استانا الاڭىن وتاندىق جۇلدىزداردىڭ ءان-جىرى تەربەپ تۇر ءقازىر. مەرەكەلىك ساحنادا روزا رىمبايەۆا، اڭىزعا اينالعان "دوس-مۇقاسان"، زارينا التىنبايەۆا، ءجاميلا سەركەبايەۆا، ءبىرجان حاسانعالييەۆ، باۋىرجان مۋسين، ارۋجان دانىشپان، ەرلان باينازاروۆ، “Il canto" كۆارتەتى جانە باسقا دا ارتيستەر ونەر كورسەتتى. كوپتىڭ ىقىلاس-قوشامەتى دە مەرەكەنىڭ اجارىن ايشىقتاي ءتۇستى.