بۇگىن الماتىدا زاماناۋي Digital Fest Almaty فەستيۆالى وتۋدە. ۇلكەن ينتەراكتيۆتى الاڭعا اينالىپ شىعا كەلگەن پانفيلوۆ كوشەسىنە جينالعان الماتىلىقتار مەن شاھار مەيماندارىنا روبوتتار قىزمەت كورسەتۋدە.
قالا كۇنىن مەرەكەلەپ جۇرگەن تۇرعىندار سيفرلىق ايماقتا جاڭا تەحنولوگيامەن جابدىقتالعان ەرەكشە كەڭىستىكتەگى دروندار ورنالاسقان “بولاشاق سفەراسىن”، الماتىنىڭ سيمۆولىنا اينالعان "سيفرلىق المانى" تاماشالاۋدا. VR-ويىندار مەن تاقىرىپتىق فوتوايماقتاردا كەزەككە تۇرعاندار قاراسى دا از ەمەس.
ءيا، قالا كۇنىندە دەمالۋعا، سەرۋەندەۋگە شىققان تۇرعىنداردى قاس قاعىم ساتتە-اق پورترەتىڭىزدى سالىپ بەرەتىن سۋرەتشى-روبوت، مەرەكەنىڭ مەزەتتەرىن ماڭگىلىك ەستەلىككە اينالدىرىپ بەرەتىن فوتوگراف-روبوت پەن ەرەكشە ساتتەرىڭىزدى بەينەبايانعا تۇسىرە قوياتىن وپەراتور-روبوت تا قارسى الۋدا.
جارق-جۇرق ەتكەن ايماقتا قىدىرىپ جۇرگەن ۇلكەن دە، كىشى دە كوڭىلدى. ولار سيفرلىق كەيىپكەرلەرمەن بىرگە مەرەكەلىك اتموسفەراعا ەنىپ كەتۋدە. بۇل فەستيۆال وزىق تەحنولوگيا مەن مادەنيەت مايەگىن توعىستىرىپ، وتباسىلىق دەمالىسقا، ينتەراكتيۆتى ويىندارعا جانە بالالاردىڭ يننوۆاسيالار الەمىمەن تانىسۋىنا مۇمكىندىك بەرەدى دەيدى ۇيىمداستىرۋشىلار.
پرەزيدەنتىمىزدىڭ كۇنى كەشە جاريالانعان جولداۋىندا ەلىمىزدى تولىققاندى سيفرلىق مەملەكەتكە اينالدىرۋ – ستراتەگيالىق مىندەت رەتىندە بەلگىلەنگەن، ال بۇل ۇدەرىستە الماتىنىڭ ءرولى بۇرىنعىدان دا ماڭىزدى بولا تۇسپەك. سەبەبى، مەگاپوليسىمىز ەلىمىزدەگى سيفرلىق ترانسفورماسيانىڭ الدىڭعى شەبىندە تۇر.
_”ءبىزدىڭ كەزىمىزدە سيفرلاندىرۋ دەگەن ۇعىم بولعان جوق. نەمەرەلەرىم ەرەكشە كوزىلدىرىكتەر كيىپ، ءتۇرلى ويىندار ويناپ ءماز بولدى. “كالەيدوسكوپ” دەگەن فوتوزوناسى دا كەرەمەت ەكەن. جاشىكتەگى المالاردى بالالارعا روبوتتىڭ الىپ بەرىپ جاتقانى ءتىپتى قىزىق. زاماناۋي كوشتەن قالماي، وسىلاي جاھاندانىپ جاتقانىمىز الماتىداي الىپ قالا ءۇشىن دە، ونى دامىتاتىن بولاشاق ۇرپاق ءۇشىن دە ماڭىزدى"، – دەيدى قالا تۇرعىنى، زەينەتكەر راۋشان ەسكەرمەسوۆا.
زاماناۋي ينتەراكتيۆتى Digital Fest Almaty فەستيۆالى كەشكە دەيىن جالعاسادى.