«تازا قازاقستان» رەسپۋبليكالىق ەكولوگيالىق اكسياسى اياسىندا تۇركسىب جانە جەتىسۋ اۋداندارىنىڭ تۇرعىندارى مەن كوللەدج ستۋدەنتتەرى سەنبىلىككە قاتىستى، دەپ حابارلايدى aqshamnews.kz
بۇگىن الماتىدا وتكەن اۋقىمدى تازالىق شاراسى قالا كۇنىنە ارنالدى.
تۇركسىب اۋدانىندا نەگىزگى سانيتارلىق جۇمىستار باۋما توعايىندا جۇرگىزىلدى. سەنبىلىككە «اياجان» كوللەدجىنىڭ 200-دەن استام ستۋدەنتى، وقىتۋشىلار مەن اۋدان تۇرعىندارى قاتىستى. ولار بىرلەسە وتىرىپ شامامەن 100 قاپ قوقىس جينادى.
«مەن ءوزىمنىڭ توپتاستارىممەن جانە دوستارىممەن بىرگە وسىنداي شارالارعا ۇنەمى قاتىسۋعا تىرىسامىن. بۇل — بارشانى بىرىكتىرەتىن جانە ەكولوگيالىق مادەنيەتتى دامىتۋعا سەپ بولاتىن جاقسى ءداستۇر»، — دەدى ەكىنشى كۋرس ستۋدەنتى يكرام احمەتجانوۆ. ونىڭ ايتۋىنشا، ءوزى مۇنداي اكسيالارعا ون رەتتەن ارتىق قاتىسقان: «مەن ءۇشىن بۇل مەكتەپ كەزىنەن-اق ادەتكە اينالدى. ەڭ باستىسى — ءوز قالاڭ مەن ەلىڭە قۇرمەتپەن قاراۋ. كەيدە جاي عانا بوس بوتەلكەنى قوقىس جاشىگىنە دەيىن اپارىپ تاستاۋ — تازالىققا قوسقان ۇلەسىڭ».
تۇركسىب اۋدانى اكىمدىگى اپپاراتىنىڭ ينسپەكتورى وسمان ۋبۋلوۆتىڭ ايتۋىنشا، مۇنداي شارالار اۋداندا تۇراقتى تۇردە وتكىزىلىپ تۇرادى.
— ءبىز ءار سەنبى سايىن قوقىس جينالعان جەرلەردى — ساي-سالا، وزەن، پارك پەن سكۆەرلەردى تازالايمىز. ادامداردا وزىندىك سانا قالىپتاسۋى ماڭىزدى: تازالىق ءار اۋلا مەن ءار وتباسىنان باستالادى. سەنبىلىك — جاي عانا تازالاۋ ەمەس، بۇل — قوعامدى تاربيەلەۋدىڭ جانە بىرىكتىرۋدىڭ ماڭىزدى بولىگى. بۇل — بالالارىمىزدىڭ بولاشاعىنا قوسقان ۇلەس، سەبەبى تازا تابيعات — ەلگە دەگەن قۇرمەتتىڭ كورىنىسى، — دەدى ول.
اكسياعا بالالارىمەن بىرگە اتا-انالار دا كەلدى.
— مەن بۇل جەرگە ۇلىم ايسۇلتان مەن قىزىم ايلينمەن بىرگە كەلدىم. بالالارعا كىشكەنتايىنان ۇلگى كورسەتۋ كەرەك دەپ ويلايمىن. ەكولوگيالىق مادەنيەتتى تاربيەلەۋ — تاجىريبەسىز مۇمكىن ەمەس. بالا ءوزى تازالىق جۇمىسىنا قاتىسقاندا، تازالىقتىڭ قۇندىلىعىن تۇسىنەدى، — دەدى ايگەرىم ومبەتالييەۆا.
ەكولوگيالىق اكسيا جەتىسۋ اۋدانىندا دا بەلسەندى ءوتتى. اۋداننىڭ اباتتاندىرۋ ءبولىمىنىڭ مامانى نۇربول ەربول ۇلىنىڭ ايتۋىنشا، قالا كوشەلەرىن تازالاۋ جۇمىستارى ولاردا تۇراقتى تۇردە جۇرگىزىلەدى:
— ءار اپتا سايىن ءبىزدىڭ بريگادالار كوشەلەر مەن اۋلالاردى تازارتادى. تەك ءبىر عانا اۋماقتان 10 جۇك كولىگىنە جۇك بولاتىنداي قوقىس شىعاردىق. ءبىراق تۇرعىنداردىڭ سانالى كوزقاراسىنسىز ءتارتىپتى ساقتاۋ وتە قيىن، — دەپ قورىتىندىلادى ول.