حالىقارالىق اۋەجايدا دەمالىس كۇندەرى «الماتىنىڭ سيمۆولى – سىيلىققا» اتتى اكسيا ءوتتى. شەتەلدىك مەيماندارعا حوش ءيىستى الماتى اپورتى ۇسىنىلدى. ءىس-شارانى قالا كۇنىنە وراي الماتىنىڭ تۋريزم باسقارماسى ۇيىمداستىردى.
اپورت – جاي عانا جەمىس ەمەس. ول شاھار تاريحىنان سىر شەرتەتىن، مىنەزىن ايشىقتايتىن، تالايدىڭ بالالىق شاعىن ەسكە تۇسىرەتىن ءدام. قالانىڭ وتكەنى مەن بۇگىنىن، سالتى مەن ءداستۇرىن قىسقاشا اڭگىمەلەپ بەرگەن ساتتە المانىڭ ءدامى ەرەكشە اسەر قالدىردى.
ەكى كۇن ىشىندە اكسيا اياسىندا حالىقارالىق رەيستەرمەن كەلگەن 5 مىڭنان استام جولاۋشى وسىنداي ەرەكشە سىي-سياپاتقا يە بولدى. بىرەۋلەر ءۇشىن بۇل قازاق مادەنيەتىمەن العاش تانىسۋ بولسا، ەندى بىرەۋلەر ءۇشىن قايتا ورالۋعا سەبەپ بولاتىن جىلى ەستەلىككە اينالدى.
الماتىعا دەگەن قىزىعۋشىلىق ارتىپ كەلەدى: 2025 جىلدىڭ العاشقى جارتىجىلدىعىندا قالاعا كەلگەن تۋريستەر سانى 6،5% ءوسىپ، 1 ميلليون 140 مىڭنان استى. قالانىڭ ءيميدجىن ىلگەرىلەتۋ، اۋقىمدى ءىس-شارالاردى وتكىزۋ جانە اۋە قاتىناسىن كەڭەيتۋ الماتىنى وڭىردەگى ەڭ تارتىمدى تۋريستىك ورتالىقتاردىڭ بىرىنە اينالدىرىپ وتىر.