الماتىدا تاجىكستان رەسپۋبليكاسىنىڭ حاتلون وبلىسىنان كەلگەن فەرمەرلەردىڭ اۋىلشارۋاشىلىق جارمەڭكەسى ءوتىپ جاتىر، دەپ حابارلايدى aqshamnews.kz
ءىس-شارا قالا كۇنىنە وراي ۇيىمداستىرىلعان.
الماتى اكىمى دارحان ساتىبالدى جارمەڭكەدە ۇسىنىلعان ونىمدەرمەن تانىسىپ، وندىرۋشىلەر جانە كەلۋشىلەرمەن سويلەستى. ونىمەن بىرگە حاتلون وبلىسىنىڭ ءتوراعاسى سايد داۆلاتالي دە جارمەڭكەگە قاتىستى. بۇعان دەيىن ولار رەسمي كەزدەسۋ وتكىزىپ، الماتى مەن حاتلون وبلىسى اراسىنداعى ىنتىماقتاستىقتىڭ بولاشاعىن، سونىڭ ىشىندە ساۋدا-ەكونوميكالىق بايلانىستاردى دامىتۋ ماسەلەلەرىن تالقىلاعان بولاتىن.
جارمەڭكەگە حاتلون وبلىسىنان 40 فەرمەر قاتىسىپ، 200 توننادان استام جاڭا ءونىم اكەلدى. قالا تۇرعىندارى ءۇشىن كوكونىستەردىڭ، جەمىستەردىڭ، تابيعي قۇرعاق جەمىستەر مەن شىعىس تاتتىلەرىنىڭ كەڭ تاڭداۋى ۇسىنىلعان. بارلىق تاۋارلار تىكەلەي وندىرۋشىلەردەن جەتكىزىلىپ، جوعارى ساپا مەن قولجەتىمدى باعا قامتاماسىز ەتىلۋدە.
جارمەڭكە قازاقستان مەن تاجىكستان اراسىنداعى ساۋدا-ەكونوميكالىق ىنتىماقتاستىقتى نىعايتۋعا باعىتتالعان. الداعى ۋاقىتتا قۇرعاق جەمىستەر مەن ەرتە پىسەتىن جەمىس-كوكونىستەردى الماتى نارىعىنا ماۋسىمارالىق كەزەڭدە تىكەلەي جەتكىزۋ جوسپارلانىپ وتىر.
ايتا كەتەيىك، جارمەڭكە 20–21 قىركۇيەك كۇندەرى الاتاۋ اۋدانىنداعى «الاتاۋ» تەاترىنىڭ الدىنداعى الاڭدا، مومىش ۇلى مەن ۋنيۆەرسيادا كوشەلەرىنىڭ قيىلىسىندا وتەدى.