ق ر پارلامەنتى سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى مۇحتار قۇل-مۇحاممەد رەسەيدىڭ تەلەارناسىندا سولوۆيەۆ جۇرگىزگەن باعدارلاماداعى رەسەيلىك ساراپشىلاردىڭ سوزدەرىنە تۇسىنىكتەمە بەردى، دەپ حابارلايدى Almaty-akshamy.kz.
«سۇمىراي سولوۆيەۆ الەمنىڭ كوپتەگەن ەلدەرىندە بۇرىننان نون گراتا العان ادام بولاتىن جانە ءقازىر بۇكىل جەردەگى سانكسيالىق قارا تىزىمدەردە كوش باستاپ كەلەدى. سوندىقتان ىزا-كەكتىڭ بۋىنان ول ەلدىڭ بارىنە جارماسىپ «ۋلى سىلەكەيىن» شاشىپ ءجۇر. بۇرىن «روسسيا 1» ارناسىندا ول الماتىعا بومبا «تاستاپ جىبەرۋ» تۋرالى دا ايتقان بولاتىن. باعدارلامانىڭ قوناعى – مەملەكەتتىك دۋمانىڭ دەپۋتاتى ونيششەنكو دا ودان قاتتى شوشىنىپ قالعان ەدى»، - دەدى مۇحتار قۇل-مۇحاممەد.
سونداي-اق، ول سولوۆيەۆتىڭ بارشانى جەك كورۋى كەسىرىنەن كوبىنەسە وزەۋرەپ ءوزى سويلەپ، باعدارلامانىڭ مەيماندارىن جانجال مەن ارانداتۋعا يتەرمەلەيتىنىن اتاپ ءوتتى. ونىڭ ءبارى تىكەلەي ەفيردە جانە ەسۋاس كەيپىندە بولاتىنىن تىلگە تيەك ەتتى.
«رەسەيلىك ساياساتتانۋشى دروبنيسكييدىڭ «كەلەسى ماسەلە قازاقستان بولۋى مۇمكىن. ويتكەنى ۇلتشىلدىق ۇردىستەرى سول جەردە دە باستالۋى ىقتيمال» دەگەن سوزىنەن ءبىزدىڭ ەلىمىزگە تىكەلەي قاتەر ءتوندىرۋ انىق بايقالىپ وتىر.
ەگەر ول ەۋرازيالىق ەكونوميكالىق وداق پەن ۇقشۇ-دا بىزبەن بىرگە تۇرعان وزىمىزگە دوس رەسەيدىڭ مەملەكەتتىك ارناسىنىڭ ەفيرىندە كورسەتىلمەسە، ءدۇدامال ساراپشى-فانتاست دروبنيسكيي-جۋكوۆتىڭ پىكىرىنە نازار اۋدارماس ەدىك. رەسەيلىك ساياساتكەرلەردىڭ وسىنداي ەكپىندى، ماقساتتى شابۋىلدارى سولوۆيەۆتىڭ شوۋىندا بۇرىننان جۇيەلى تۇردە جالعاسىپ كەلە جاتقاندىقتان، ولار رەسەي فەدەراسياسىنىڭ فەدەرالدى بيلىگى تاراپىنان وبەكتيۆتى جاۋاپقا لايىق»، - دەپ باعا بەردى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى.
ءسوز سوڭىندا مۇحتار قۇل-مۇحاممەد قازاقستان 30 جىلدان استام ۋاقىت بويى تاۋەلسىز مەملەكەت ەكەنىن، سولوۆيەۆ پەن سول سەكىلدى ساياساتكەرلەردىڭ شىنايى شىندىقتى ءتۇسىنىپ، جاڭا گەوساياسي اقيقاتپەن ساناسۋدى ۇيرەنەتىن ۋاقىت كەلگەنىن اتاپ ءوتتى.
ايتا كەتەيىك، جوعارىدا ايتىلعان رەسەيلىك ساياساتتانۋشى دروبنيسكييدىڭ «كەلەسى ماسەلە قازاقستان بولۋى مۇمكىن. ويتكەنى ۇلتشىلدىق ۇردىستەرى سول جەردە دە باستالۋى ىقتيمال» دەگەن پىكىرى «روسسيا 1» ارناسىنداعى سولوۆيەۆتىڭ شوۋىندا ايتىلعان بولاتىن.