الماتى – الەۋمەتتىك ينفراقۇرىلىمى قارقىندى دامىپ جاتقان مەگاپوليس

الماتى قالاسىندا الەۋمەتتىك ينفراقۇرىلىمدى جاڭعىرتۋ مەن دامىتۋعا ايرىقشا كوڭىل بولىنۋدە، دەپ حابارلايدى aqshamnews.kz

بۇل تۋرالى قالا اكىمى دارحان ساتىبالدى قالا كۇنى مەرەكەسىندە سويلەگەن سوزىندە اتاپ ءوتتى.

“بيىل ۇلتتىق جوبا اياسىندا 20 جاڭا مەكتەپ پايدالانۋعا بەرىلمەك. سونىمەن قاتار 65 بالاباقشا ىسكە قوسىلادى. بۇل قادام بالالارىمىزدىڭ ساپالى ءبىلىم الۋىنا كەڭ مۇمكىندىك اشادى. الداعى ەكى جىلدا دەنساۋلىق ساقتاۋ نىساندارى تولىق جاڭعىرتىلىپ، قالا تۇرعىندارى ءۇشىن جاڭا كوپسالالى اۋرۋحانالار، زاماناۋي پەرزەنتحانالار مەن پوليكلينيكالار سالۋ جوسپارلانعان”، — دەدى الماتى اكىمى دارحان ساتىبالدى.

اكىمنىڭ ايتۋىنشا، مادەنيەت پەن سپورت سالاسى دا جاڭا سەرپىن الماق. “جاقىن ارادا 35 مىڭ كورەرمەنگە ارنالعان UEFA تالاپتارىنا ساي كەلەتىن فۋتبول ستاديونىنىڭ قۇرىلىسى باستالادى. قازىرگى ورتالىق ستاديون جاڭعىرتىلىپ، حالىقارالىق ستاندارتتارعا سايكەستەندىرىلمەك. سونىمەن قاتار الەمگە ايگىلى «مەدەۋ» كەشەنى قايتا قۇرىلىپ، حالىقارالىق دەڭگەيدەگى سپورتتىق-تۋريستىك ورتالىققا اينالادى. ونىڭ جىلدىق كەلۋشىلەر سانى 1،5 ميلليون ادامعا دەيىن جەتەدى”، — دەدى قالا باسشىسى.

الماتى اكىمدىگى تۇرعىندارعا قولايلى جاعداي جاساۋ، ساپالى ءبىلىم مەن دەنساۋلىق ساقتاۋ قىزمەتىن قامتاماسىز ەتۋ، مادەنيەت پەن سپورتتى دامىتۋ باعىتىنداعى جوبالاردى جۇيەلى تۇردە جالعاستىرا بەرمەك.