تۇزەتۋلەردىڭ ءبىر بلوگى وتاندىق تاۋار وندىرۋشىلەردى ىنتالاندىرۋعا باعىتتالعان.
24 قاراشادا سەناتتىڭ جالپى وتىرىسىندا «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكسىنە جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكسىن قولدانىسقا ەنگىزۋ تۋرالى» ق ر زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قابىلداندى، دەپ حابارلايدى Almaty-akshamy.kz Baq.kz cىلتەمە جاساپ.
زاڭعا سايكەس، كونستيتۋسيالىق سوتتىڭ قۇرىلۋىنا بايلانىستى كونستيتۋسيالىق سوتقا جۇگىنگەن كەزدەگى مەملەكەتتىك باجدى بەلگىلەۋ جانە حالىقتىڭ الەۋمەتتىك وسال توپتارىن بوساتۋ ۇسىنىلادى.
سونداي-اق 2024 جىلدان باستاپ مەملەكەتتىك بالانستى جۇرگىزۋ توقتاتىلادى. قورلار جاڭا جۇيە بويىنشا باعالاناتىن بولادى.
وسىعان بايلانىستى پايدالى قازبالاردى ءوندىرۋ سالىعىن سالۋ وبەكتىسىن وزگەرتۋ ۇسىنىلادى.
تۇزەتۋلەردىڭ ءبىر بلوگى وتاندىق تاۋار وندىرۋشىلەردى ىنتالاندىرۋعا باعىتتالعان.
«بالىق اۋلاۋ كاسىپورىندارى بالىقتى وڭدەۋ كەزدە قوسىلعان قۇن سالىعىن 70%-عا ازايتۋى تۋرالى نورما ۇسىنىلادى. ءقازىر مۇنداي جەڭىلدىكتى بالىق ءوسىرۋشى قوجالىقتار قولدانادى. قانت ءوندىرىسىن ىنتالاندىرۋ ءۇشىن شيكى قانت يمپورتىن قوسىلعان قۇن سالىعىنان بوساتۋ، سونداي-اق قانت وندىرۋشىلەر ءۇشىن قوسىلعان قۇن سالىعى بويىنشا جەڭىلدىكتىڭ قولدانىلۋ مەرزىمىن ۇزارتۋ ۇسىنىلادى»، – دەپ اتاپ ءوتتى زاڭعا قاتىستى بايانداما جاساعان ۇلتتىق ەكونوميكا ءمينيسترى الىبەك قۋانتىروۆ.
ايتۋىنشا، زاڭنىڭ ءبىر نورماسى تازارتىلعان التىندى ساتۋعا قاتىستى. ءقازىر ۇلتتىق بانككە مۇنداي التىندى ساتۋ قوسىلعان قۇن سالىعىنان بوساتىلادى. وسى نورمانى التىندى زەرگەرلەرگە دە ساتۋ كەزىندە قولدانۋ ۇسىنىلادى.
سونداي-اق ەلەكتر جەلىلەرىن ىرىلەندىرۋ ماسەلەسى شەشىلەدى. ەنەرگيا بەرۋشى ۇيىمنىڭ ەلەكتر جەلىلەرىن وتەۋسىز الۋى كەزىندە سالىق مىندەتتەمەلەرىنىڭ تۋىنداۋىن بولدىرماۋ قامتىلعان.
«تۇزەتۋلەردىڭ تاعى ءبىر بلوگى كولىك جۇيەسىن ودان ءارى دامىتۋ شارالارىن كوزدەيدى. تەمىرجول كولىگى سالاسىندا نولدىك ءتاريفتى قولدانا وتىرىپ، جولاۋشىلار تاسىمالداۋشىلارىنا ماگيسترالدىق تەمىرجول جەلىسى قىزمەتتەرىن كورسەتۋ كەزىندە سالىق سالۋ ماسەلەلەرىن رەتتەۋ كوزدەلگەن. سونداي-اق ترانزيتتىك اۋە كەمەلەرىنە جانارماي قۇيۋ كەزىندە قوسىلعان قۇن سالىعىنىڭ نولدىك مولشەرلەمەسىن قولدانۋدى كەڭەيتۋ ۇسىنىلادى. ءقازىر جەڭىلدىكتى تەك اۋەجايلار قولدانا الادى. اۆتوموبيل تاسىمالدارىن دامىتۋ ءۇشىن شىعارىلعان جىلى 7 جىلدان اسپايتىن ەرشىكتى تارتقىشتاردى باستاپقى تىركەۋ ءۇشىن الىمنان بوساتۋ ۇسىنىلادى»، - دەپ ءتۇسىندىردى مينيستر.
سونداي-اق زاڭ جەكە تۇلعالاردىڭ تولەمدەرىنە قاتىستى بولىپ وتىر.
«چەك بەرمەۋ فاكتىلەرى تۋرالى حابارلاعانى ءۇشىن سىياقى الۋ، يپوتەكالىق كرەديت بويىنشا بەرەشەكتى ەسەپتەن شىعارۋ، جالداۋ قۇنىن تومەندەتۋ جانە تۇرعىن ءۇيدى جالعا الۋعا بيۋدجەتتىك سۋبسيديالار العان كەزدەگى سالىقتىق تاۋەكەلدەر الىپ تاستالادى. سونداي-اق سالىقتىق اكىمشىلەندىرۋدى وڭايلاتۋ، سونداي-اق ناقتىلاۋ جانە رەداكسيالىق سيپاتتاعى نورمالار ۇسىنىلادى. بۇل نەگىزگى وزگەرىستەر»، - دەدى ۆەدومستۆو باسشىسى.