الماتىدا ەلدەگى ەڭ ءىرى ادەبي فەستيۆالدەردىڭ ءبىرى KitapFest 2025 باستالدى، دەپ حابارلايدى aqshamnews.kz
ول قالا كۇنىنە وراي ۇيىمداستىرىلىپ وتىر. نەگىزگى الاڭ اربات بولدى: مۇندا تاڭنان بەرى شابىت پەن شىعارماشىلىققا تولىپ، پىكىرلەسۋ ورنىنا اينالدى.
بيىلعى فەستيۆالدىڭ اۋقىمى ەرەكشە اسەر قالدىرادى: 60 باسپادان 10 مىڭنان استام كىتاپ ۇسىنىلدى. ونىڭ ىشىندە 2 مىڭنان استام جاڭا تۋىندىلار العاش رەت كوپشىلىككە كورسەتىلدى. ءىس-شارا اياسىندا بەلگىلى اقىن-جازۋشىلارمەن كەزدەسۋ ءوتتى. اتاپ ايتساق، وقىرمان قاۋىم ساۋلە دوسجان، اقبەرەن ەلگەزەك، ماقسات مالىك، ناتاليا گورياچيەۆا، ليۋدميلا لازاريەۆا، ۆاسيليي شۋپەيكين جانە ت.ب. جۇزدەستى. ولار تۋىندىسىن تانىستىرىپ، ولەڭ وقىپ، وقىرمانداردىڭ سۇراعىنا جاۋاپ بەرىپ، جاستاردى شىعارماشىلىققا جەتەلەدى.
قوناقتاردى «جاندى كىتاپحانا» جوباسى ەلەڭ ەتكىزدى، مۇندا ابايدان باستاپ شەكسپيرگە دەيىنگى الەمدىك ادەبيەت كلاسسيكتەرى اكتەرلەردىڭ ورىنداۋىندا «جان ءبىتىپ» كورەرمەنمەن جۇزدەستى. بالالار ءۇشىن قيال-عاجايىپ دەكوراسيالار مەن ادەبي كۆەستتەر ۇيىمداستىرىلعان Estelik Zone ايماعى دا كوپتىڭ كوڭىلىنەن شىقتى.
«KitapFest — بۇل جاي عانا كىتاپ مەرەكەسى ەمەس. بۇل ۇرپاقتار اراسىنداعى سۇحبات ورنايتىن، ءسوزدىڭ قايتادان جاندى سيپاتقا ەنەتىن، ادەبيەتتىڭ قالا ءومىرىنىڭ ءبىر بولىگىنە اينالاتىن ورىن»، — دەدى جازۋشى، قازاقستاننىڭ ەڭبەك سىڭىرگەن قايراتكەرى ساۋلە دوسجان.
فەستيۆال كىتاپ ادامداردى تابىستىراتىن، ويدى دامىتاتىن ءارى مادەني بايلانىستى نىعايتاتىن كەڭىستىك ەكەنىن تاعى ءبىر مارتە دالەلدەدى. الماتى ادەبيەتتى قادىرلەيتىنىن جانە ونى ناسيحاتتاۋعا جاعداي جاسايتىنىن ايقىن كورسەتتى.
KitapFest 2025 قىركۇيەكتىڭ 21-ىنە دەيىن جالعاسادى. ساعات 20.00-گە دەيىن اشىق شىعارماشىلىق پەن ادەبيەت الەمىن سۇيەتىن بارشا جاندى شاقىرادى.