شاھار باسشىسى مەگاپوليستىڭ دامۋىنا ارنالعان بەس باسىم باعىتتى اتاپ ءوتتى، دەپ حابارلايدى aqshamnews.kz
بۇگىن الماتى ءوزىنىڭ باستى مەرەكەسىن — قالا كۇنىن اتاپ وتۋدە. وسى ايتۋلى كۇنى مەگاپوليس اكىمى دارحان ساتىبالدى قالا تۇرعىندارى مەن قوناقتارىنا ارناپ قۇتتىقتاۋ ءسوز سويلەپ، الماتىنىڭ تاريحي ماڭىزىن اتاپ ءوتىپ، ونىڭ دامۋىنداعى نەگىزگى باسىمدىقتاردى ايقىندادى.
«قىمباتتى الماتىلىقتار، ءقادىرلى قالا قوناقتارى! سىزدەردى قالا كۇنىمەن شىن جۇرەكتەن قۇتتىقتايمىن! الماتى — ەلىمىزدىڭ تاۋەلسىزدىگىنىڭ التىن بەسىگى، قازاقستان تاريحىنداعى جاڭا ءداۋىردىڭ باستاۋ العان قاسيەتتى مەكەنى. بۇگىندە ءبىزدىڭ قالامىز ءوزىنىڭ قايتالانباس رۋحاني-مادەني مۇراسىن ساقتاپ، زاماناۋي ءارى جايلى مەگاپوليس رەتىندە العا قادام باسىپ كەلەدى»، — دەدى دارحان ساتىبالدى.
اكىم الماتىنىڭ تەك مادەني جانە ءبىلىم بەرۋ ورتالىعى عانا ەمەس، سونىمەن قاتار ەل ەكونوميكاسىنىڭ باستى قوزعاۋشى كۇشى ەكەنىن ەرەكشە اتاپ ءوتتى. بۇگىندە مەگاپوليس ۇلتتىق ەكونوميكانىڭ بەستەن ءبىر بولىگىن جانە مەملەكەتتىك بيۋدجەت كىرىستەرىنىڭ شيرەگىنەن استامىن قامتاماسىز ەتىپ وتىر. ءبىر تۇرعىنعا شاققانداعى جالپى وڭىرلىك ءونىم 29 مىڭ اقش دوللارىنا جەتىپ، كەيبىر ەۋروپالىق ەلدەردىڭ دەڭگەيىنەن اسىپ ءتۇستى.
دارحان ساتىبالدىنىڭ ايتۋىنشا، بۇل جەتىستىكتەر وتە ماڭىزدى بولعانىمەن، قالانىڭ ەڭ باستى بايلىعى — ونىڭ تۇرعىندارى:
«الماتىنىڭ ەڭ باستى قۇندىلىعى — بۇل سىزدەر، ونىڭ تۇرعىندارى. سىزدەردىڭ ەڭبەكتەرىڭىز، جىگەرلەرىڭىز بەن بەلسەندىلىكتەرىڭىزدىڭ ارقاسىندا الماتى ءوز ەرەكشەلىگىن ساقتاپ قالىپ، وڭىردەگى الدىڭعى قاتارلى مەگاپوليستەردىڭ بىرىنە اينالۋدا».
سونداي-اق اكىم مەملەكەت باسشىسى قاسىم-جومارت توقايەۆ قويعان مىندەتتەرگە ارنايى توقتالدى. ونىڭ ايتۋىنشا، الماتىنى دامىتۋدا ەكولوگيا، قاۋىپسىزدىك جانە زاماناۋي قالالىق ورتانى قالىپتاستىرۋ باستى باسىم باعىتتار بولماق. الداعى جىلدارى اۋقىمدى ينفراقۇرىلىمدىق جوبالار ىسكە اسىرىلادى، كولىك جۇيەسى مەن سيفرلىق قىزمەتتەر دامىتىلادى، الەۋمەتتىك جانە مادەني ينفراقۇرىلىم جاڭعىرتىلادى.
قۇتتىقتاۋ ءسوزىنىڭ سوڭىندا دارحان ساتىبالدى قالا تۇرعىندارىنا اماندىق، باقىت پەن بەرەكە تىلەدى:
«الماتى — ءبارىمىزدىڭ ورتاق ءۇيىمىز. ءبىز بۇل قالانىڭ سۇلۋلىعىن، داستۇرلەرىن ساقتاپ، ونى وڭىردەگى ەڭ زاماناۋي، جاسىل جانە جايلى مەگاپوليستەردىڭ بىرىنە اينالدىرۋ ءۇشىن جۇمىلا ەڭبەك ەتۋىمىز كەرەك. قىمباتتى الماتى، كوركەيە بەر، ەلىمىزدىڭ بىرلىگى مەن دامۋ سيمۆولىنا اينالا بەر!»
ايتا كەتەيىك، بۇل — دارحان ساتىبالدىنىڭ الماتى قالاسىنىڭ اكىمى رەتىندە جاساعان العاشقى اۋقىمدى ۇندەۋى. بۇل سوزىندە ول قالا تۇرعىندارىن مەرەكەمەن قۇتتىقتاپ قانا قويماي، مەگاپوليستىڭ دامۋىنداعى بەس نەگىزگى باعىتتى دا اتاپ ءوتتى:
- كولىك جۇيەسىن جانە ەكولوگيانى دامىتۋ،
- جايلىلىق پەن قاۋىپسىزدىكتى ارتتىرۋ،
- ورنىقتى ەكونوميكالىق ءوسىم مەن كاسىپكەرلىكتى قولداۋ،
- الەۋمەتتىك ينفراقۇرىلىمدى جاڭعىرتۋ،
- اشىقتىق پەن تۇرعىندارمەن ءتيىمدى ديالوگ ورناتۋ.