الماتى قالاسىنىڭ «باقشاساراي» قابىلداۋ ۇيىندە قمدب «حالال دامۋ» ستاندارتتاۋ جانە سەرتيفيكاتتاۋ مەكەمەسىنىڭ ۇيىمداستىرۋىمەن HALAL EXPO-2025 حالىقارالىق كورمەسى باستالدى، دەپ حابارلايدى aqshamnews.kz
كورمەنىڭ رەسمي اشىلۋىنا قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى ارنايى قاتىستى.
- حالال يندۋسترياسى بۇگىندە تەك مۇسىلمان قاۋىمىنا عانا ەمەس، بۇكىل ادامزات ءۇشىن ادالدىق پەن تازالىقتىڭ بەلگىسىنە اينالدى. بۇل كورمە – كاسىپكەرلەردىڭ، عالىمداردىڭ، تەحنولوگتار مەن تۇتىنۋشىلاردىڭ باسىن قوسىپ، تاجىريبە بولىسۋگە، جاڭا سەرىكتەستىك ورناتۋعا جانە ادال ونىمدەر نارىعىن كەڭەيتۋگە جول اشاتىن ماڭىزدى الاڭ،- دەدى ناۋرىزباي قاجى تاعان ۇلى.
سونداي-اق باس ءمۇفتي سالتاناتتى راسىمدە ۇزدىك حالال كاسىپورىندار مەن قىزمەتكەرلەردى ارنايى ماراپاتتادى. «ۇزدىك حالال كاسىپورىن» نوميناسيا بويىنشا 8 كاسىپورىن، «ۇزدىك ماماندار» نوميناسيا بويىنشا 8 قىزمەتكەر ماراپاتتالدى.
كورمەدە وتاندىق كاسىپكەرلەرمەن بىرگە قىرعىزستان، وزبەكستان، رەسەي، بەلارۋس، موڭعوليا، يندونەزيا مەن مالايزيا مەملەكەتتەرىنەن كەلگەن 100-گە جۋىق كاسىپورىننىڭ ونىمدەرى قويىلعان. شارا اياسىندا حالال سالاسىنا قاتىستى سەمينار-ترەنينگتەر ءوتىپ جاتىر.