الماتى اكىمى دارحان ساتىبالدى تۇرعىنداردان كوپتەگەن شاعىم تۇسكەن ءبىرقاتار پروبلەمالىق نىسانداردى ارالاپ شىقتى، دەپ حابارلايدى aqshamnews.kz
ول ينجەنەرلىك جەلىلەر، جول ينفراقۇرىلىمى جانە قالا تۇرعىندارىنىڭ قاۋىپسىزدىگى ماسەلەلەرى ءوز باقىلاۋىندا ەكەنىن اتاپ ءوتتى.
بوستاندىق اۋدانىنداعى ەرمەنساي شاعىناۋدانىندا اكىم نوسەر جاۋىننان كەيىن بۇلىنگەن ينجەنەرلىك جەلىلەردى قالپىنا كەلتىرۋ جۇمىستارىن جەدەلدەتۋدى تالاپ ەتىپ، اتالعان جۇمىستاردى جەلتوقسانعا دەيىن تولىق اياقتاۋدى جانە كۇن سايىن ساپاسى مەن مەرزىمىن تەكسەرۋدى تاپسىردى.
ۇلكەن الماتى وزەنىنىڭ ارناسىن قايتا قۇرۋ بارىسىندا گرانيت پليتالارىن پايدالانۋ كەزىندە زاڭبۇزۋشىلىقتار مەن داۋلى جايتتار انىقتالدى. دارحان ساتىبالدى مەردىگەرلەردەن تۇسىنىكتەمە بەرۋدى تالاپ ەتىپ، قۇرىلىس زاڭناماسىن قاتاڭ ساقتاۋ قاجەتتىگىن اتاپ ءوتتى. اكىم بۇل نىساننىڭ قۇقىق قورعاۋ ورگاندارىنىڭ قاتىسۋىمەن جەكە باقىلاۋدا بولاتىنىن ەسكەرتتى.
اۋەزوۆ اۋدانىنداعى امانجول كوشەسىندە 16 قىركۇيەكتە جول توسەمى وپىرىلىپ، 13 اۆتوكولىك زاقىمداندى. وسىعان بايلانىستى اكىم مەرزىمنىڭ سوزىلىپ كەتكەنىن ەسكە سالىپ، مەردىگەرگە زارداپ شەككەن تۇرعىندارعا كەلتىرىلگەن شىعىندى وتەۋدى مىندەتتەدى.
دارحان ساتىبالدى بارلىق پروبلەمالىق نىسان اكىمدىكتىڭ ەرەكشە باقىلاۋىندا ەكەنىن اتاپ ءوتتى. «جۇمىس ساپالى ءارى ۋاقىتىندا ورىندالۋعا ءتيىس. باقىلاۋ قاتاڭ بولادى، مەردىگەرلەر تولىق جاۋاپ بەرەدى جانە تۇرعىندارعا كەلگەن شىعىندى وتەۋگە مىندەتتى»، — دەدى قالا اكىمى.
الماتى اكىمدىگى ينجەنەرلىك جەلىلەردى قايتا جاڭارتۋ، توتەنشە جاعدايدىڭ سالدارىن جويۋ جانە قالالىق ينفراقۇرىلىمدى جاڭعىرتۋ جۇمىستارىن جالعاستىرۋدا.
ەسكە سالساق، الماتى اكىمى جول توسەمىنىڭ شوگۋى مەن جيەكتاستى اۋىستىرۋعا بايلانىستى اۋەزوۆ جانە مەدەۋ اۋداندارىنىڭ اكىمدەرىنە، سونداي-اق ەكولوگيا باسقارماسىنىڭ باسشىسىنا سوگىس جاريالاپ، بوستاندىق اۋدانى اكىمىنىڭ ورىنباسارىن ءتيىستى باقىلاۋ جۇرگىزبەگەنى ءۇشىن قىزمەتىنەن بوساتقان بولاتىن. اسفالتتىڭ وپىرىلۋى مەن گرانيت پليتالارىن زاڭسىز پايدالانۋعا قاتىستى قىزمەتتىك تەرگەۋ جۇرگىزىلۋدە.