الماتى قالاسىنداعى اپورت-مولل ساۋدا ورتالىعىندا «ەسىك» مەملەكەتتىك تاريحي-مادەني مۋزەي-قورىعىنىڭ «جارتاس سۋرەتتەرى – كونە ءداۋىر دەرگى» اتتى فوتوكورمەسى كورەرمەندەرگە جول تارتتى.
كورمە ماقساتى جارتاس سۋرەتتەرى ارقىلى ەجەلگى زامان ادامدارىنىڭ ءومىر سالتىن، نانىم-سەنىمىن، تۇرمىس-تىرشىلىگىن تانىستىرۋ. جارتاستارعا سالىنعان بەينەلەردى تاريحي دەرەككوز رەتىندە تانىپ، ونىڭ ارحەولوگيالىق جانە مادەني ماڭىزىن ءتۇسىندىرۋ.
جارتاس سۋرەتتەرى – ادامزات وركەنيەتىنىڭ ەڭ ەرتە كەزەڭىنەن جەتكەن مادەني جانە تاريحي مۇرا. بۇل بەينەلەر ءبىر جاعىنان كونە ءداۋىر سۋرەتشىلەرىنىڭ ەستەتيكالىق كوزقاراسىن تانىتسا، ەكىنشى جاعىنان ەجەلگى ادامداردىڭ كوگنيتيۆتىك قابىلەتتەرى مەن دۇنيەتانىمىن، تۇرمىس-تىرشىلىگىن جانە نانىم-سەنىم جۇيەسىن كورسەتەتىن ماڭىزدى تاريحي دەرەككوز بولىپ تابىلادى.
جارتاس سۋرەتتەرى جازۋ پايدا بولماي تۇرعان كەزەڭدە، ءتىپتى جازۋمەن قاتار قولدانىستا بولعان اقپارات الماسۋ قۇرالى بولدى. ياعني ەجەلگى ادامدار ءوز ويى مەن تاجىريبەسىن، سەنىمىن تاس بەتىنە بەينەلەۋ ارقىلى جەتكىزگەن.
جەتىسۋ وڭىرىندەگى تامعالى، ەشكىولمەس، بايانجۇرەك سەكىلدى بەلگىلى ارحەولوگيالىق كەشەندەرمەن قاتار قىزەمشەك، قاراكۇنگەي، كەتپەنتاۋ جانە باسقا دا ەسكەرتكىشتەردەن مىڭداعان جىلدار بۇرىنعى تۇرعىنداردىڭ ءومىر سالتىن بەينەلەيتىن پەتروگليفتەر انىقتالدى.
قازىرگى تاڭدا جارتاس بەتىنە سالىنعان سۋرەتتەردىڭ مازمۇنىن، ولاردىڭ استارىندا جاسىرىلعان كوممۋنيكاتيۆتىك ءارى اقپاراتتىق دەرەكتەردىڭ قۇپيا كودتارىن اشۋ عىلىمدا كۇردەلى ماسەلەلەردىڭ ءبىرى بولىپ وتىر. ءبىز بۇل تۋىندىلارداعى كومپوزيسيالىق قۇرىلىمدار مەن سيمۆولداردىڭ سەمانتيكالىق ماعىناسىن تەرەڭ تۇسىنۋگە ۇمتىلعانىمىزبەن، كوبىنەسە تەك جالپىلاما تۇجىرىمدارمەن شەكتەلەمىز.
وسىعان بايلانىستى، ەجەلگى مادەني مۇرالاردى جان-جاقتى زەرتتەۋ مەن زەردەلەۋ كەلەشەكتە دە وزەكتىلىگىن جويمايدى دەگەن ويدامىز. سول سەبەپتى ەجەلدەن جەتكەن وسى رۋحاني-مادەني مۇرانى بولاشاق ۇرپاققا ءتۇسىندىرۋدىڭ ءبىر جولى ادامدار كوپ شوعىرلاناتىن، دەمالىس كۇندەرىن وتكىزەتىن ورىندارعا كورمەلەردى ورانالاستىرۋ.
كورمە ەكسپوزيسياسىندا ءار جىلدارى جەتىسۋ جەرىنەن (كەتپەن جوتاسى، قۇرايلى، قىزەمشەك جانە ت.ب تاۋلارىنان) جاڭا اشىلعان جارتاس سۋرەتتەرىنىڭ فوتولارى مەن ەستامپاجدارى حرونولوگيالىق تارتىپپەن ورنالاستىرىلدى. قولا ءداۋىرى مەن ورتا عاسىر ارالىعىن قامتىعان بۇل جارتاس سۋرەتتەرىندە اڭشىلىق كورىنىستەرى، سالتتىق بيلەر، تۇرمىستىق قۇرالدار، جانۋارلار مەن ءتۇرلى تاڭبالار، ابستراكتىلى سيمۆولدار، تۋ ۇستاعان سالت اتتىلار، تۇيەكەشتەر، كەرۋەنشىلەر بەينەلەنگەن.
سونىمەن قاتار، كورمەنىڭ تارتىمدىلىعى مەن اقپاراتتىلىعىن قامتاماسىز ەتەتىن ارنايى زاماناۋي كوركەم ينتەرپرەتاسيا جانە مۋزەيلىك اقپاراتتار سيفرلىق فورماتتا – QR-كودتار ارقىلى ءۇش تىلدە ۇسىنىلدى.
كورمەنى الماتى قالاسىنىڭ تۇرعىندارى مەن قوناقتارى 20 قىركۇيەك پەن 20 قازان ارالىعىندا تاشكەنت تراكتى، 17ك مەكەنجايىندا ورنالاسقان Aport Mall West ساۋدا-ويىن-ساۋىق ورتالىعىنان تاماشالاي الادى.
«ەسىك» مەملەكەتتىك تاريحي-مادەني مۋزەي-قورىعىنىڭ ۇجىمى تاريحي مۇرامىزدى ۇلىقتاۋعا جانە مادەني قۇندىلىقتاردى كەڭىنەن ناسيحاتتاۋعا كورسەتكەن قولداۋى مەن ۇلەسى ءۇشىن Aport Mall باسشىلىعى مەن ۇجىمىنا ەرەكشە العىسىن بىلدىرەدى.
اسەل امارگازييەۆا،
«ەسىك» مەملەكەتتىك تاريحي-مادەني مۋزەي-قورىعىنىڭ
اعا عىلىمي قىزمەتكەرى،
ءال-فارابي اتىنداعى قازۇۋ دوكتورانتى