بۇل مىڭداعان الماتىلىققا مەديسينالىق كومەكتى جىلدام ءارى ساپالى الۋعا مۇمكىندىك بەرەدى، دەپ حابارلايدى aqshamnews.kz
اۋرۋحانادا پروفيلاكتيكالىق سكرينينگ ورتالىعى جۇمىسىن باستادى. ەندى تۇرعىندار ءبىر ساعات ىشىندە «ءبىر تەرەزە» قاعيداسى بويىنشا كەشەندى تەكسەرۋدەن ءوتىپ، مامانداردىڭ كەڭەسىن الا الادى. مۇنداي ءتاسىل اۋرۋلاردى ەرتە انىقتاۋ مەن دەنساۋلىقتى ساقتاۋعا ايتارلىقتاي مۇمكىندىك بەرەدى.
ديسپانسەرلىك ناۋقاستارعا ەرەكشە كوڭىل بولىنۋدە. مۇندا سوزىلمالى اۋرۋلاردى باسقارۋ ورتالىعى اشىلدى. وندا تەلەمەديسينا تەحنولوگيالارى قولدانىلىپ، پاسيەنتتەردىڭ دەنساۋلىعىن قاشىقتان باقىلاۋعا جانە ۇيدەن شىقپاي تەكسەرۋدەن وتۋگە جاعداي جاسالعان.
سونىمەن قاتار گەپاتولوگيا جانە ەندوسكوپيا ورتالىعى قۇرىلدى. ورتالىقتا باۋىر مەن اسقازان-ىشەك جولى اۋرۋلارىن ەرتە كەزەڭدە انىقتاپ، ءتيىمدى ەم تاعايىنداۋعا كومەكتەسەتىن زاماناۋي فيبروسكانەرلەۋ اپپاراتى ورناتىلدى.
الماتىلىق لور-ماماندار حيرۋرگياعا جاڭا تەحنولوگيالاردى ەنگىزۋدە. العاش رەت Osteomatrix بيوكومپوزيسيالىق ماتەريالىنىڭ كومەگىمەن دابىل قۋىسىنا قايتا جاڭعىرتۋ جاسالدى، بۇل پاسيەنتتىڭ ەستۋ قابىلەتىن ساقتاۋعا مۇمكىندىك بەرەدى. بۇدان بولەك، Islam Alobid ءادىسى بويىنشا مۇرىن پەردەسىنىڭ تەسىلۋ اقاۋلارىنا ەندوسكوپيالىق جابۋ تاجىريبەسى ەنگىزىلدى. بۇل ءتاسىل تەز ءارى سەنىمدى ناتيجەگە قول جەتكىزەدى.
تاۋلىك بويى جۇمىس ىستەيتىن رەابيليتاسيا بولىمىندە دە جاڭا قالپىنا كەلتىرۋ تەحنولوگياسى ەنگىزىلگەن. ولاردىڭ قاتارىندا تىنىس الۋ جۇيەسى اۋرۋلارى بار ناۋقاستارعا ارنالعان ۆيبرواكۋستيكالىق ماسساج جانە ويىق جارالاردىڭ الدىن الا، كۇتىمدى جەڭىلدەتەتىن فۋنكسيونالدى توسەكتەر بار.
بۇل جاڭالىقتاردىڭ بارلىعى قالالىق مەديسينانى دامىتۋعا باعىتتالعان اۋقىمدى جۇمىستىڭ ءبىر بولىگى بولىپ تابىلادى. يننوۆاسيالار، زاماناۋي جابدىقتار مەن جاڭا تاسىلدەر الماتىداعى مەديسينالىق كومەكتى ءار تۇرعىنعا قولجەتىمدى، ساپالى ءارى جاقىن ەتۋدە.