سيفرلىق تەحنولوگيالار ارقىلى ءبىز ازاماتتاردىڭ كۇندەلىكتى ءومىرىن بارىنشا جەڭىلدەتۋگە جانە بارلىعىنا تەڭ مۇمكىندىكتەرگە قول جەتكىزۋگە نيەتتىمىز. ول ءۇشىن مەملەكەتتىك باسقارۋدى سيفرلاندىرۋدىڭ ساپالى جاڭا فورماتىنا كوشۋ كەرەك.
قاسىم-جومارت توقايەۆ.
2024 جىلى ەلىمىزدە سيفرلىق ترانسفورماسيانىڭ نورماتيۆتىك جانە ءادىسنامالىق نەگىزدەرى ازىرلەندى، ساراپتامالىق بازا قالىپتاستىرىلدى جانە ءتۇرلى سالالاردا اۋقىمدى رەفورمالار ىسكە قوسىلدى. مەملەكەت باسشىسىنىڭ تاپسىرماسىن ىسكە اسىرۋدا ايتارلىقتاي ناتيجەلەرگە قول جەتكىزىلدى.
وتكەن جىلدىڭ باستى جەتىستىگى – مەملەكەتتىك قىزمەتتەردى سيفرلاندىرۋ دەڭگەيى ارتتى. بۇۇ دەرەكتەرىنە سايكەس، قازاقستان ونلاين-قىزمەتتەر يندەكسى بويىنشا توپ-10 ەلدىڭ قاتارىنا كىرىپ، سيفرلاندىرۋ دەڭگەيى بويىنشا 193 مەملەكەتتىڭ ىشىندە 24ء-شى ورىندى يەلەندى.
بۇگىنگى تاڭدا حالىقتىڭ 93%-تەن استامى eGov پورتالى ارقىلى ەلەكتروندىق قىزمەتتەرگە قول جەتكىزە الادى. مەملەكەتتىك قىزمەتتەردىڭ 90،8%-ى سمارتفوندار ارقىلى قولجەتىمدى. بيومەتريالىق سايكەستەندىرۋ مەن QR-قولتاڭبالاردى ەنگىزۋ ەلەكتروندىق قىزمەتتەردى الۋ پروسەسىن جەڭىلدەتتى – ءبىر جىل ىشىندە قازاقستاندىقتار QR-كودتار ارقىلى 23 ميلليوننان استام قۇجاتقا قول قويعان ەكەن.
ونلاين-قىزمەتتىڭ ءبىر مىسالى – الماتى كىتاپحانالارىنىڭ سيفرلاندىرۋ سالاسىنداعى جەتىستىگى. مەگاپوليستىڭ كىتاپحانالار جەلىسىندە كوزى ناشار كورەتىن جانە زاعيپ جانداردىڭ كىتاپ وقىپ، عالامتوردان قاجەتتى اقپارات الۋىنا مۇمكىندىك بەرەتىن تەحنيكا ورنالاستىرىلعان. برايل ديسپلەيى – نۇكتەلى-بەدەرلى قارىپپەن كوزى كورمەيتىن ادامعا ساۋساعىمەن ءتۇرتىپ وقۋعا مۇمكىندىك بەرىپ تۇراتىن قۇرال. برايل پرينتەرىنىڭ ماڭىزى وتە زور. نەگە دەسەڭىز، كەز كەلگەن مالىمەتتى برايل قارپىمەن كەز كەلگەن تىلدە شىعارىپ الۋعا بولادى.
سيفرلاندىرۋدىڭ تاعى ءبىر كورىنىسى – قالاداعى اۆتونومدى كىتاپحانالار. وقىرماندارعا كىتاپحانالىق قىزمەتتەردى پايدالانۋ جۇيەسىن جەڭىلدەتۋ ماقساتىندا قوعامدىق ورىنداردا 20-دان اسا اۆتونومدى كىتاپحانا ورناتىلعان. بۇل – وقىرماننىڭ وز-وزىنە قىزمەت كورسەتۋى دەگەن ءسوز. جاڭا قۇرىلعى كىتاپحاناعا بارماي-اق كىتاپ الۋعا جانە ونى قايتارۋعا مۇمكىندىك بەرەدى. جاڭا اۆتونومدى ءموبيلدى كىتاپحانادا 300 كىتاپ قورى بار. كەز كەلگەن وقىرمان بيلەتى بار قالا تۇرعىنى كەلىپ، كىتاپ الۋىنا مۇمكىندىگى بار. كىتاپ ەكى اپتاعا بەرىلەدى. ءدال وسىنداي 24 قۇرىلعى قالانىڭ قوعامدىق ورىندارىندا، ياعني كوپشىلىك كوپ جۇرەتىن جەردە جانە ساۋدا ورىندارى مەن مەترو ستانسالارىندا ورناتىلعان.
سيفرلىق ترانسفورماسيا مەملەكەتتىك قىزمەتتەردى نەعۇرلىم قولايلى، قولجەتىمدى جانە ءتيىمدى ەتۋگە باعىتتالعان. قازاقستاندىقتار ءۇشىن ناقتى پايداسىن كورسەتكەن، ازاماتتاردىڭ ءومىرىن جاقسارتقان سيفرلىق شەشىمدەر مىنالار:
• ساندىق اسكەري بيلەت قاعاز قۇجاتتارىن تولىعىمەن اۋىستىردى.
• بالاباقشالارعا ونلاين تىركەلۋ ۆاۋچەرلىك قارجىلاندىرۋ جۇيەسىنىڭ ارقاسىندا پروسەستى اشىق ەتتى.
• «ەۋروپالىق حاتتامانى» ەنگىزۋ ساقتاندىرۋ تولەمدەرىن الۋ مەرزىمىن 40 كۇننەن 5 كۇنگە دەيىن قىسقارتىپ، پوليسيانىڭ قاتىسۋىنسىز جكا رەسىمدەۋگە مۇمكىندىك بەردى.
• اتقارۋشىلىق ءىس جۇرگىزۋدى اۆتوماتتاندىرۋ ازاماتتارعا قارجىلىق جۇكتەمەنى ازايتا وتىرىپ، جەكە سوت ورىنداۋشىلارىنىڭ قاتىسۋىن بولدىرمادى.
• سيفرلاندىرۋ بالاباقشالارعا، مەكتەپتەرگە، جوعارى وقۋ ورىندارى مەن جاتاقحانالارعا ءتۇسۋدى جەڭىلدەتتى، سونداي-اق دەنساۋلىق ساقتاۋ، الەۋمەتتىك قورعاۋ جانە تىركەۋ قىزمەتتەرىندەگى پروسەستەردى وڭتايلاندىردى.
2025 جىلى 44 مەملەكەتتىك قىزمەتتىڭ مەرزىمىن قىسقارتۋ، 20 مەملەكەتتىك قىزمەتتى پرواكتيۆتى فورماتقا اۋىستىرۋ، سونداي-اق 35 مەملەكەتتىك قىزمەتتى ترانسفورماسيالاۋ جوسپارلانعان.
سيفرلىق ترانسفورماسيانىڭ ناتيجەلەرى بۇگىندە ميلليونداعان قازاقستاندىقتار ءۇشىن ايقىن. ءاربىر جوبا مەملەكەتتىك قىزمەتتەردىڭ ىڭعايلىلىعىن، اشىقتىعىن جانە قولجەتىمدىلىگىن ارتتىرۋعا باعىتتالعان. سيفرلاندىرۋ دەڭگەيىن ارتتىرۋ ءبىلىم بەرۋگە، دەنساۋلىق ساقتاۋعا جانە الەۋمەتتىك قىزمەتتەرگە قولجەتىمدىلىكتى جاقسارتادى، ولاردى ىڭعايلى جانە ءادىل ەتەدى. ءقازىر كوپتەگەن مەملەكەتتىك قىزمەت ونلاين-فورماتتا، كەزەكسىز جانە قوسىمشا بيۋروكراتيالىق راسىمدەرسىز قولجەتىمدى.