1940 جىلى نەگىزى قالانعان «ALMATY POLYTECHNIC COLLEGE» ۇزاق جىلدان بەرى IT-سالاسى ءۇشىن جوعارى بىلىكتى كادرلار دايارلاۋعا ماماندانعان جەتەكشى ءبىلىم بەرۋ مەكەمەلەرىنىڭ ءبىرى.
كوللەدجدە «ەسەپتەۋ تەحنيكاسى جانە اقپاراتتىق جەلىلەر»، «اقپاراتتىق قاۋىپسىزدىك جۇيەلەرى»، «باعدارلامالىق قامتاماسىز ەتۋ»، «راديوتەحنيكا، ەلەكترونيكا جانە تەلەكوممۋنيكاسيالار»، «ماشينالار مەن جابدىقتاردى پايدالانۋ جانە تەحنيكالىق قىزمەت كورسەتۋ» ماماندىقتارى بويىنشا ساپالى ءبىلىم بەرۋ جۇزەگە اسىرىلىپ كەلەدى. كوللەدج 2017 جىلدان باستاپ جۇمىسشى ماماندىقتار دايارلايدى، ال 2019 جىلدان دۋالدى وقىتۋ جۇيەسى ەنگىزىلدى. وقۋ ورنىندا ەل ەكونوميكاسىنىڭ قاجەتتىلىكتەرىنە ساي كاسىبي كادرلار دايارلاۋ جولعا قويىلعان.
بۇگىنگى تاڭدا كوللەدجدە 1600-دەن استام ستۋدەنت وقيدى، ونىڭ 246-سى جۇمىسشى ماماندىقتارى بويىنشا ءبىلىم السا، ال 220-سى دۋالدى جۇيە بويىنشا ءبىلىم الادى. كوللەدج ۇزاق جىلدار بويى تۇراقتى سەرىكتەستىكتەر نەگىزىندە قالىپتاسىپ، كاسىپورىندارمەن تىعىز بايلانىس ورناتىلعان. ونىڭ ءبىر مىسالى –دۋالدى وقىتۋ اياسىندا وندىرىستىك تاجىريبەدەن وتۋگە 98 كومپانيامەن ءۇشجاقتى 467 كەلىسىم-شارت جاسالدى. وقۋ جوسپارىنا سايكەس ستۋدەنتتەر جىل سايىن كاسىبي پراكتيكادان ءوتىپ، تەوريالىق بىلىمدەرىن ءىس جۇزىندە قولدانۋ مۇمكىندىگىنە يە بولادى.
كوللەدج جۇمىس بەرۋشىلەرمەن بەلسەندى ىنتىماقتاستىق، ءبىرقاتار كومپانيالارمەن تىعىز قارىم-قاتىناس ورناتقان.
ماسەلەن، قازىرگى ۋاقىتتا ستۋدەنتتەر او «قازاقتەلەكوم» كومپانياسىنىڭ ينتەرنەت ساپاسىن جاقسارتۋعا باعىتتالعان «SAPA+» جوباسى بويىنشا بەلسەندى جۇمىس جۇرگىزىپ جاتىر. جوبا اياسىندا قولدانۋشىلارعا زاماناۋي كۇشەيتكىشتەر تەگىن ۇسىنىلىپ، 5G ينتەرنەت جەلىسىنە قوسىلۋ مۇمكىندىگى جاسالدى. ستۋدەنتتەر ناتيجەلى جۇمىستارىنىڭ ارقاسىندا جالاقى الىپ، ەڭ باستىسى ەڭبەك جولىندا ۇلكەن تاجىريبە جيناقتاپ جاتىر. سونىمەن قاتار، ەلەكتروندىق قۇرىلعىلاردى جوندەۋ جانە قىزمەت كورسەتۋ سالاسىنداعى، درونداردى ساتۋ، وپەراتورلاردى وقىتۋ جانە جوندەۋ جۇمىستارىمەن اينالىساتىن، باسپا ىسىمەن شۇعىلداناتىن ءبىرقاتار ۇيىمداردا تاجىريبەدەن ءوتىپ جاتىر.
كاسىپورىنداردىڭ قاجەتتىلىكتەرىن ەسكەرە وتىرىپ، ماقساتتى دايىنداۋ شەڭبەرىندە 65 ستۋدەنت ءبىلىم الۋدا. كادرلاردى دايارلاۋعا ءبىرقاتار ءىرى كاسىپورىندار قولداۋ كورسەتەدى.
تاقىرىپقا وراي
مەدەت وماربەكوۆ،
«Almaty polytechnic college» ديرەكتورى:
ماقسات – مامانداردىڭ جاڭا بۋىنىن دايارلاۋ
كوللەدجدىڭ جىلدار بويى قالىپتاسقان جۇمىس ىستەۋ تاسىلدەرى مەن تاجىريبەلەرى بار. وقۋ اياقتالعاننان كەيىن ستۋدەنتتەردى جۇمىسقا ورنالاستىرۋ بويىنشا جۇيەلى جۇمىس جۇرگىزىلەدى. بۇل پروسەسس جوعارى وقۋ ورىندارىمەن جانە كاسىپورىندارمەن تىعىز بايلانىس ورناتۋدى تالاپ ەتەدى. سونىمەن قاتار، ءبىزدىڭ مەكەمە تۇلەكتەردى جۇمىسقا ورنالاستىرۋ ءۇشىن ءتۇرلى مامانداندىرىلعان جارمەڭكەلەر مەن كەزدەسۋلەر ۇيىمداستىرىپ وتىرادى. بۇل دا ستۋدەنتتەردىڭ كاسىبي سالادا جولىن تابۋىنا ۇلكەن كومەگىن تيگىزەدى. تۇلەكتەرىمىزدىڭ 90%-دان استامى وقۋ اياقتالعاننان كەيىن ءوز ماماندىقتارى بويىنشا جۇمىسقا ورنالاسادى.
كوللەدجدە «اقپاراتتىق-كوممۋنيكاسيالىق تەحنولوگيالار» باعىتى بويىنشا قۇزىرەتتىلىك ورتالىعى جانە IT-حاب Arena جۇمىس ىستەيدى. قۇزىرەتتىلىك ورتالىعى ستۋدەنتتەردى بەدەلدى چەمپيوناتتارعا، سونىڭ ىشىندە ۇلتتىق جانە حالىقارالىق WorldSkills چەمپيوناتىنا قاتىسۋعا دايىنداۋدىڭ ماڭىزدى الاڭى بولىپ تابىلادى. IT-حاب Arena جاڭا يدەيالاردى ىزدەۋگە، شىعارماشىلىق شەشىمدەردى ازىرلەۋگە جانە ولاردى ناقتى ومىردە ءساتتى جۇزەگە اسىرۋعا ارنالعان كەڭىستىككە اينالىپ وتىر.
ءبىزدىڭ ماقساتىمىز – جاڭا بۋىن ماماندارىن دايارلاپ، ولاردىڭ ەل ەكونوميكاسىنىڭ دامۋىنا ەلەۋلى ۇلەس قوسۋىنا جاعداي جاساۋ.