بۇل تۋرالى يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ايتتى.
سونىمەن قاتار بيىل الماتى قالاسىنىڭ اۋەجايىندا جاڭا جولاۋشىلار تەرمينالىنىڭ قۇرىلىسى باستالدى، دەپ حابارلايدى Almaty-akshamy.kz
«بيىل 1 تامىزداعى جاعداي بويىنشا، «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسىن ىسكە اسىرۋعا 650،1 ملرد تەڭگە ءبولىندى، ونىڭ ىشىندە رەسپۋبليكالىق بيۋدجەت 440،4 ملرد تەڭگەنى، بيۋدجەتتەن تىس قاراجات 155،8 ملرد تەنگەنى جانە جەرگىلىكتى بيۋدجەت 53،9 ملرد تەنگەنى قۇرايدى. جوسپار كەستەسىنە سايكەس بارلىق بيۋدجەت تولىق كولەمدە يگەرىلدى»، - دەدى ق. وسكەنبايەۆ.
ءمينيستردىڭ ايتۋىنشا، ينفراقۇرىلىمدى كەشەندى دامىتۋ مىندەتى بويىنشا 79،3 ملرد تەڭگە تولىق يگەرىلدى نەمەسە 99%-دى پايىزدى قۇرادى. «ىشكى كولىك جەلىسىن دامىتۋ» مىندەتىندە 301،2 ملرد تەڭگە يگەرىلگەن. ولار رەسپۋبليكالىق ماڭىزى بار اۆتوموبيل جولدارىن سالۋعا، رەكونسترۋكسيالاۋعا جانە جوندەۋگە، جەرگىلىكتى ماڭىزى بار اۆتوموبيل جولدارىن سالۋعا، رەكونسترۋكسيالاۋعا جانە جوندەۋگە باعىتتالعان.
«قالىپتى جاعدايداعى جول ساپاسىنىڭ كورسەتكىشى جىل سوڭىنا دەيىن رەسپۋبليكالىق جەلى بويىنشا 91%-عا دەيىن، ال جەرگىلىكتى جەلى بويىنشا 85%-عا دەيىن جەتەدى. شىمكەنت جانە قوستاناي قالالارىنداعى اۋەجايلاردىڭ جەرۇستى ينفراقۇرىلىمى جاڭعىرتىلادى. سونداي-اق بيىل الماتى قالاسىنىڭ اۋەجايىندا جاڭا جولاۋشىلار تەرمينالىنىڭ قۇرىلىسى باستالدى»، - دەپ ءتۇسىندىردى ق. وسكەنبايەۆ.