الىپ شاھاردىڭ تازالىعى - كۇن تارتىبىندە تۇرعان نەگىزگى جۇمىستاردىڭ ءبىرى.
بۇگىندە قالانىڭ بارلىق اۋداندارىندا تازالىق جۇمىستارى قارقىندى ءجۇرىپ جاتىر، دەپ حابارلايدى Almaty-akshamy.kz
الماتى قالاسىنىڭ اكىمدىگى اۆتوموبيل جولدارىن، تروتۋارلار مەن ارىق جەلىلەرىن سانيتارلىق تازالاۋ جۇمىستارىنىڭ تيىمدىلىگىن ارتتىرۋ بويىنشا شارالار قابىلداۋدا.
باسىلىم تىلشىلەرى كەشە مەدەۋ اۋدانىنداعى جۇرگىزىلىپ جاتقان تازالىق جۇمىستارىن باقىلاپ قايتتى.
«مەدەۋ اۋدانى بويىنشا تازالىققا جاۋاپ بەرەتىن 5 بريگادا بار. وزدەرىڭىز دە بايقاپ وتىرسىزدار، قالا كوشەلەرىندە جاسىل جەلەك جايقالعانىمەن، اپتاپ ىستىق سالدارىنان جاپىراقتار سارعايىپ ءتۇسىپ جاتىر. مىنە، سولاردى تازالاپ جاتىرمىز. بۇگىن جوسپار بويىنشا دوستىق داڭعىلى مەن ءال-فارابي داڭعىلدارىنىڭ بويىن، شيەۆچەنكو، قونايەۆ جانە ماقاتايەۆ كوشەلەرىنە دەيىن جول جيەگىن، سۋاعارلاردى تازارتامىز. اۋداندا تازالىق جۇمىستارى تاۋلىك بويى جۇرگىزىلەدى. نەگىزگى جۇمىستاردىڭ باسىم بولىگى كۇندىزگى ۋاقىتتا جۇزەگە اسىپ، تۇنگى ۋاقىتتا ارنايى كولىكپەن كەزەكشىلىك ۇيىمداستىرىلادى»، – دەيدى بريگادا جەتەكشىسى «الماتى تازالىق» مكك-نىڭ مەدەۋ اۋدانى بويىنشا ءبولىم باسشىسى اسەت تولەگەنوۆ.
اعاشتاردان تۇسكەن جاپىراقتاردى بىلەك سىبانا كىرىسىپ تازالاپ جاتقان جۇمىسشىلاردىڭ اراسىندا كوزىمىزگە تۇسكەن اعامىزدى سوزگە تارتتىق.
«جاسىم 66-دا. ەسىمىم – دونەسباي. ءبىراق، مەنى بارلىعى لاقاپ اتىممەن «دەنيس» دەپ اتايدى. ويتكەنى، كوبى ورىس ءتىلدى بولعان سوڭ تىلدەرى كەلمەيدى. «الماتى تازالىقتا» جۇمىس ىستەپ جۇرگەنىمە 10 جىلدان استى. «ەكى قولعا ءبىر كۇرەك» ۇستايتىنداي شامام بار. سوندىقتان ۇيدە بوس جاتا المايمىن. جۇمىس مۇرىن قانايتىنداي اۋىر ەمەس. مىندەتىمىز – جاياۋ جۇرگىنشىلەر جولىن تازارتىپ، قوقىستى جيناۋ. ءبىزدىڭ قالا تۇرعىندارىنا "قوعامدىق ورىنداردى لاستاماڭىزدار، اسىرەسە، ايالدامالاردا قوقىستى بەي-بەرەكەت شاشپاي، ارنايى قوقىس جاشىكتەرىنە سالىڭىزدار" دەپ ءوتىنىش ايتامىز. ال ءبىز وزىمىزگە تاپسىرىلعان مىندەتتى ءتيىستى دەڭگەيدە ورىنداپ ءجۇرمىز دەپ ويلايمىز. ونىڭ دالەلى سول - قالا تۇرعىندارى ءجيى العىس ايتىپ جاتادى»، – دەيدى دونەسباي البەتوۆ.
قالا اكىمدىگى باسپا ءسوز قىزمەتىنىڭ حابارلاۋىنشا، بۇگىنگى تاڭدا مەگاپوليستە قىزمەت كورسەتىلەتىن جولداردىڭ جالپى اۋدانى 25 ملن شارشى مەتردەن استام اۋماقتى قۇرايدى. مەگاپوليستىڭ 2318 كوشەسىندە تازالىق جۇمىستارى كۇن سايىن جۇرگىزىلەدى. ونىڭ ىشىندە 2 706،5 شاقىرىم جول، 1 303،8 شاقىرىم تروتۋار جانە 1167،4 شاقىرىم ارىق جەلىلەرى بار. سونداي-اق، قالانىڭ كوشە-جول جەلىسىن قاداعالاپ، تازالىعىن باقىلاپ وتىراتىن «الماتى تازالىق» مكك-مەن بىرگە، 14 مەردىگەرلىك ۇيىم جۇمىس ىستەيدى.
سۋ باسۋدىڭ الدىن الۋ ماقساتىندا دا جۇرگىزىلىپ جاتقان شارۋا كوپ. 60-تان استام ارنايى تەحنيكا مەن مەردىگەرلىك ۇيىمداردىڭ 300 جول جۇمىسشىسى ارىق جەلىلەرى مەن ارىق وتكەلدەرىن تازارتۋمەن اينالىسادى.
ماگيسترالدىق كوشەلەردى جۋۋ تاۋلىگىنە ەكى رەت ۇيىمداستىرىلادى. ال اۋداندىق ماڭىزى بار كوشەلەردى جانە جالپى پايدالانۋ ورىندارىن جۋۋ – اۋدان اكىمدىكتەرى بەكىتكەن تەحنيكالىق ەرەكشەلىككە سايكەس كۇن سايىن جۇرگىزىلەدى. جولداردى جۋۋ جۇمىستارى جاياۋ جۇرگىنشىلەردىڭ ءجۇرىپ-تۇرۋىنا كەدەرگى كەلتىرمەيدى. ياعني جۇرگىنشىگە سۋ شاشىراتپاۋ، سونداي-اق اۆتوموبيل دوڭگەلەكتەرىمەن ىلعالدانعان سمەتانىڭ تارالۋىن ازايتۋ ماقساتىندا جۇمىستار نەگىزىنەن تۇنگى ۋاقىتتاردا جۇزەگە اسىرىلادى.
جولدىڭ ءجۇرۋ بولىگىن سۋارۋ-جۋۋ ماشينالارىمەن جۋعاننان كەيىن، جول جيەگىنە شەگەلەنگەن قوقىستى جول جۇمىسشىلارى جيناپ، قوقىس ۇيىندىسىنە شىعارادى. سونىمەن قاتار، قوقىس جيناۋ ءۇشىن سوقالى ششەتكا مەحانيزمدەرى قولدانىلادى. شاڭدى ازايتۋ ءۇشىن جولدارعا الدىن الا سۋ سەبىلەدى. مامانداردىڭ ايتۋىنشا، جولدار مەن تروتۋارلاردى جۋۋعا تاۋلىگىنە 5 مىڭ تەكشە مەتر سۋ جۇمسالادى.
جۇمىسشىلار تاڭ اتىسىمەن ءوز شارۋالارىنا كىرىسەدى. «الماتى تازالىق» مكك جاز ماۋسىمىندا كوشەلەردى تازالاۋ، اباتتاندىرۋ، جول بويىن جۋۋ، قوقىستاردى شىعارۋ سياقتى جۇمىستاردى اتقارادى. اتاپ ايتقاندا، اپتاپ ىستىق كەزىندە جول جيەكتەرىنە سۋ شاشۋ جۇمىستارى جۇرگىزىلەدى. ول جولداعى شاڭنىڭ ازايۋىنا سەپ. جالپى، جاز ۋاقىتىندا كوشەلەردى تازالاۋ جۇمىستارىنا قالانىڭ بارلىق اۋدانىندا ۇزدىكسىز تازالىق جۇمىستارى جۇرگىزىلەدى. جۇمىسشىلار جۋۋ قۇرىلعىلارى، جول سىپىرۋعا، سۋ شاشۋعا ارنالعان تەحنيكالار، جۇك تيەگىشتەر مەن جۇك تاسىمالداعىشتارمەن قامتاماسىز ەتىلگەن. كوممۋنالدىق قىزمەت وكىلدەرى ءۇشىن جۇمىس كۇنى تاڭعى ساعات 6-دان باستالادى.
كۇن سايىن قالا كوشەلەرىندە 866 ارنايى تەحنيكا (سونىڭ ىشىندە «الماتى تازالىق» – 609 تەحنيكا) جۇمىس ىستەەپ، 1413 جول جۇمىسشىسى كۇشىمەن 90 توننادان استام قوقىس شىعارىلادى.