سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي كوممۋنالدىق شارۋاشىلىق ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ ماقۇلداندى، دەپ حابارلايدى اlmaty-akshamy.kz BAQ.KZ-كە سىلتەمە جاساپ.
زاڭدا كوندومينيۋم وبەكتىسىن باسقارۋدىڭ جەكە نىسانىن – تىكەلەي بىرلەسىپ باسقارۋ نىسانىن قۇرۋ كوزدەلەدى. بۇل نىسان پاتەرلەر سانى ون التىدان اسپايتىن تۇرعىن ۇيگە قاتىستى قولدانىلادى. جاي سەرىكتەستىك قۇرۋ ءۇشىن دە پاتەرلەر سانىن شەكتەۋ ۇسىنىلادى. ول وتىز پاتەردەن اسپايتىن تۇرعىن ۇيلەردە قۇرىلۋى مۇمكىن. قالعان كوپپاتەرلى تۇرعىن ۇيلەر ءۇشىن مۇلىكتىڭ مەنشىك يەلەرى بىرلەستىگى نىسانى قولدانىلۋى ءتيىس. زاڭدا اۋىلدا، كەنتتە ءوز قىزمەتكەرلەرى ءۇشىن تۇرعىن ءۇي سالاتىن جۇمىس بەرۋشىلەردىڭ شىعىندارىن سۋبسيديالاۋ ەنگىزىلەدى. بۇل نورما مەملەكەت باسشىسى قاسىم-جومارت توقايەۆتىڭ اۋىلدا جالعا بەرىلەتىن ۇيلەر سالۋ كەزىندە جۇمىس بەرۋشىلەردىڭ شىعىندارىن سۋبسيديالاۋ تەتىگىن ەندىرۋ جونىندەگى تاپسىرماسىن ىسكە اسىرۋ ماقساتىندا ازىرلەندى، - دەپ اتاپ ءوتتى ەكونوميكالىق ساياسات، يننوۆاسيالىق دامۋ جانە كاسىپكەرلىك كوميتەتىنىڭ ءتوراعاسى سۇيىندىك الداشيەۆ.
زاڭدى قازاقستان رەسپۋبليكاسى پارلامەنتىنىڭ سەناتىندا تالقىلاۋ بارىسىندا كوميتەتتەردىڭ ەسكەرتۋلەرى مەن ۇسىنىستارىن ەسكەرە وتىرىپ، ءماجىلىس قابىلداعان زاڭعا مىنا باعىتتار بويىنشا وزگەرىستەر مەن تولىقتىرۋلار ەنگىزۋ قاجەتتىلىگى تۋىندادى:
- ەگەر پاتەردىڭ، تۇرعىن ەمەس ءۇي-جايدىڭ مەنشىك يەسى مەملەكەت قاتىساتىن ۇيىم بولىپ تابىلسا، وندا كوندومينيۋم وبەكتىسىن باسقارۋعا جانە كوندومينيۋم وبەكتىسىنىڭ ورتاق مۇلكىن كۇتىپ-ۇستاۋعا ارنالعان شىعىستاردى تولەۋ كەزىندە «مەملەكەتتىك ساتىپ الۋ تۋرالى» قازاقستان رەسپۋبليكاسى زاڭىنىڭ قولدانىسى قولدانىلمايدى دەگەن نورما ەنگىزىلەدى؛
- بيۋدجەت قاراجاتىنىڭ قايتارىلۋىن قامتاماسىز ەتۋدى ەسكەرە وتىرىپ، ءتيىستى حاتتامانى رەسىمدەۋ ارقىلى وسى كىرەبەرىس تۇرعىندارىنىڭ شەشىمى بويىنشا كوپپاتەرلى تۇرعىن ءۇي كىرەبەرىستەرىنىڭ بىرىندەگى ءليفتىنى بيۋدجەت قاراجاتى ەسەبىنەن اۋىستىرۋ مەن جوندەۋدى ۇيىمداستىرۋ جانە قارجىلاندىرۋ تەتىگى زاڭنامامەن بەكىتىلەدى؛
- كوندومينيۋم وبەكتىسىنىڭ ورتاق مۇلكىن جەكە مەنشىككە يەلىكتەن شىعارۋعا تىيىم سالىنادى؛
- ورىنتۇراق ورىندارىنىڭ جانە قويمالاردىڭ مەنشىك يەلەرىنىڭ قۇقىقتارى مەن مىندەتتەرى ناقتىلانادى؛
- كوپپاتەرلى تۇرعىن ءۇي تىركەلگەن كۇننەن باستاپ التى اي ىشىندە كوپپاتەرلى تۇرعىن ءۇيدىڭ تاپسىرىس بەرۋشىسىنىڭ (قۇرىلىس سالۋشىسىنىڭ) كوپپاتەرلى تۇرعىن ءۇيدىڭ سىرتقى ينجەنەرلىك جەلىلەرى مەن قۇرىلىستارىن كوممۋنالدىق مەنشىككە وتەۋسىز بەرۋدى قامتاماسىز ەتۋ مىندەتى رەگلامەنتتەلەدى.