قىتايدا اتوم ەنەرگەتيكاسىنىڭ دامۋى 1990 جىلدارى باستالىپ، بۇگىنگى كۇنى ەلدە 57 يادرولىق رەاكتور جۇمىس ىستەيدى. العاشقى اتوم ەلەكتر ستانسيالارى ىسكە قوسىلعاننان بەرى ەلدە بىردە-بىر اپات تىركەلمەگەن. ساراپشىلار بۇل كورسەتكىشتى قاۋىپسىزدىك شارالارىنىڭ قاتاڭ ساقتالۋىمەن بايلانىستىرادى.
قازىرگى ۋاقىتتا قىتايدا ءۇشىنشى بۋىن رەاكتورلارى قولدانىستا. ولاردىڭ ىشىندە ەڭ ءىرى ستانسيالاردىڭ ءبىرى – سولتۇستىك-شىعىستا ورنالاسقان تيانۆان اەس-ى. ستانسيا 300 گەكتاردان استام اۋماقتى الىپ جاتىر جانە تەڭىز جاعالاۋىندا ورنالاسقان. ونىڭ اۋماعىندا تولىققاندى قالالىق ينفراقۇرىلىم بار: جول بەلگىلەرى، باعدارشامدار، اسحانا، دۇكەندەر مەن كافەلەر جۇمىس ىستەيدى. اەس ماڭىندا 146 مىڭعا جۋىق حالقى بار ونداعان ەلدى مەكەن ورنالاسقان.
اەس سالىنعانعا دەيىن ايماقتاعى تۇرعىنداردىڭ نەگىزگى تابىس كوزى بالىق اۋلاۋ بولاتىن. الايدا ستانسيانىڭ ىسكە قوسىلۋىمەن كوپتەگەن ادامدار تۇراقتى جۇمىسقا يە بولدى. اسىرەسە، جاس ماماندار اراسىندا جۇمىسقا ورنالاسۋ مۇمكىندىگى ارتتى. تيانۆان اەس-ى جەرگىلىكتى حالىقتىڭ تۇرمىسىن جاقسارتىپ قانا قويماي، ينفراقۇرىلىمنىڭ دامۋىنا دا سەرپىن بەردى.
ليۋحى اۋىلىندا وسكەن گۋي مياۋ اەس قۇرىلىسىنا كۋا بولعان 6 جاسار قىز ەدى، ال ءقازىر ول وقۋىن اياقتاپ، ستانسيادا جۇمىس ىستەپ ءجۇر. ول بىلاي دەيدى: «بۇگىنگى تاڭدا بالىق اۋلاۋمەن تەك ۇلكەن كىسىلەر اينالىسادى. بۇرىن بالىق اۋلاپ كۇن كورگەن جاستار ءقازىر اەس-تە جۇمىس ىستەيدى. ولار جاقسى جالاقى الادى. ءبىزدىڭ اۋىل اەس-كە ەڭ جاقىن ورنالاسقان. مەن وسى اۋىلدا ءوستىم، بۇرىن مۇندا جارىق تا، جول دا جوق ەدى. جاڭبىر جاۋسا، بالشىققا باتىپ، جۇرە المايتىنبىز. كولىك تە از بولاتىن. ءقازىر كوپىر سالىنىپ، جاعدايىمىز جاقساردى. ەڭ باستىسى، جۇمىسسىزدىق ازايدى».
تيانۆان اەس-ىنىڭ دامۋى ايماقتاعى حالىقتىڭ ءومىر ساپاسىن جاقسارتىپ، ەكونوميكالىق دامۋعا دا وڭ اسەر ەتتى.