قازاقستان رەسپۋبليكاسى مەن وزبەكستان رەسپۋبليكاسى اراسىنداعى مەملەكەتتىك شەكارانى دەماركاسيالاۋ تۋرالى كەلىسىم بۇۇ-نىڭ جارعىسىنىڭ 102-بابىنا سايكەس، بۇۇ حاتشىلىعىندا تىركەلۋ جانە جاريالانۋ ءۇشىن قۇجاتتار تاپسىرىلدى. بۇل تۋرالى قازاقستاننىڭ سىرتقى ىستەر مينيسترلىگى مالىمدەدى، دەپ حابارلايدى aqshamnews.kz
قوس مەملەكەتتىڭ پرەزيدەنتتەرى اتالعان كەلىسىمگە 2022 جىلدىڭ جەلتوقسان ايىندا قازاقستان پرەزيدەنتىنىڭ تاشكەنتكە رەسمي ساپارى بارىسىندا قول قويعان بولاتىن. كەلىسىم 2023 جىلدىڭ 4 شىلدەسىندە كۇشىنە ەندى.
2023 جىلعى 25 قىركۇيەكتە نيۋ-يوركتە وتكەن بۇۇ باس اسسامبلەياسى سەسسياسى اياسىنداعى كەزدەسۋدە ەكى ەلدىڭ سىرتقى ىستەر مينيسترلەرى بۇل كەلىسىمدى بۇۇ-دا تىركەۋدىڭ ورتالىق ازيا وڭىرىندەگى مۇنداي قۇجاتتار بويىنشا بۇرىن-سوڭدى بولماعان تاجىريبە ەكەنىن اتاپ ءوتتى.