بۇل تۋرالى قۇجاتت ەندى سەناتتىڭ قاراۋىنا ەنگىزىلەدى.
بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمدا ماقۇلداندى، دەپ حابارلايدى Almaty-akshamy.kz
زاڭ جوباسى كىرىستەردى جىلىستاتۋعا جانە تەرروريزمدى قارجىلاندىرۋعا قارسى ءىس-قيمىلدىڭ ۇلتتىق جۇيەسىن جاقسارتۋ، سونداي-اق اقشانى جىلىستاتۋعا قارسى كۇرەستىڭ قارجىلىق شارالارىن ازىرلەۋ توبىنىڭ حالىقارالىق ستاندارتتارىن ىسكە اسىرۋ ماقساتتارىندا ازىرلەندى.
قۇجات زاڭدى تۇلعالاردىڭ بەنەفيسيارلىق مەنشىك يەلەرىن اشۋ مىندەتىن بەلگىلەۋگە، كىرىستەردى جىلىستاتۋعا قارسى ءىس-قيمىل تۋرالى زاڭنامانى شەت مەملەكەتتىڭ زاڭناماسىنا سايكەس قۇرىلعان تراستتارعا نەمەسە باسقا دا كورپوراتيۆتىك قۇرىلىمدارعا قولدانۋعا باعىتتالعان. سونىمەن قاتار زاڭ جوباسىندا تەرروريزمدى جانە ەكسترەميزمدى قارجىلاندىرۋمەن بايلانىستى ۇيىمدار مەن تۇلعالاردىڭ تىزبەسىنە، سونداي-اق جاپپاي قىرىپ-جويۋ قارۋىن تاراتۋدى قارجىلاندىرۋمەن بايلانىستى ۇيىمدار مەن تۇلعالاردىڭ تىزبەسىنە ەنگىزىلگەن سۋبەكتىلەردىڭ تىكەلەي نەمەسە جاناما باقىلاۋىنداعى قاراجات پەن وزگە دە اكتيۆتەردى توقتاتۋ ەسكەرىلگەن.
قۇجات اياسىندا قىلمىستىق جولمەن الىنعان قاراجاتتى زاڭداستىرعانى ءۇشىن قىلمىستىق جاۋاپكەرشىلىكتى كۇشەيتۋ جانە فاتف ۇسىنىمدارىندا ايقىندالعان ءبىرقاتار قىلمىستىق قۇقىقبۇزۋشىلىقتار ءۇشىن «مۇلىكتى تاركىلەۋ» تۇرىندەگى قىلمىستىق جازانى بەلگىلەۋ قاراستىرىلعان.
مۇنىمەن قوسا، زاڭ جوباسى «تەرروريستىك ارەكەت» ۇعىمىن كەڭەيتۋ ماقساتىندا «تەرروريزمگە قارسى ءىس-قيمىل تۋرالى» زاڭنىڭ ەرەجەسىن قىلمىستىق كودەكستىڭ ەرەجەلەرىنە سايكەس كەلتىرۋگە باعىتتالعان. پالاتانىڭ جالپى وتىرىسىندا «اكىمشىلىك قۇقىق بۇزۋشىلىق تۋرالى كودەكسكە قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ جوباسى دا ەكىنشى وقىلىمدا ماقۇلداندى.