ەلىمىزدە اۋانىڭ لاستانۋىنا سەبەپشى بولىپ وتىرعان ءىرى 16 كاسىپورىن بار.
بۇل تۋرالى ەكولوگيا، گەولوگيا جانە تابيعي رەسۋرستار ۆيسە-مينيسترى ءزۇلفيا سۇلەيمەنوۆا ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازاقستاننىڭ 45 ونەركاسىپتىك ايماعىنداعى اۋانىڭ لاستانۋ دەڭگەيىنە مونيتورينگ جۇرگىزىلدى. ناتيجەسىندە 10 ايماقتا اۋا ساپاسى ناشار ەكەنى انىقتالدى.نۇر-سۇلتان، الماتى، قاراعاندى، تەمىرتاۋ، اتىراۋ، اقتوبە، بالقاش، وسكەمەن، جەزقازعان جانە شىمكەنت قالالارىندا اۋانىڭ لاستانۋ دەڭگەيى وتە جوعارى. وعان ءۇش نەگىزگى فاكتور اسەر ەتەدى. ماسەلەن، نۇر-سۇلتان مەن الماتىدا جىلىتۋ ەلەكتروستانسيالارى اۋاعا زياندى قالدىقتاردى كوپ مولشەردە بولەدى. تەمىرتاۋ مەن وسكەمەندە ەكولوگياعا ءىرى كولەمدە زيان كەلتىرەتىن – ول ونەركاسىپ. ال باتىس وڭىرلەردە ەسكىرگەن كارىز جۇيەلەرى اۋانى لاستاپ وتىر»، – دەدى ۆيسە-مينيستر.
ءزۇلفيا سۇلەيمەنوۆانىڭ دەرەگىنشە، وڭىرلەردەگى ەكولوگيا احۋالىن جاقساترۋ ءۇشىن 16 جول كارتاسى ازىرلەنگەن.
«جول كارتاسىنا سايكەس، 485 ءىس-شارا ۇيىمداستىرۋ جوسپارلانعان. 2020 جىلدان 2022 جىلدىڭ ءبىرىنشى توقسانىنا دەيىن بەلگىلەنگەن جۇمىستار 50%-عا اياقتالدى. وسى شارالاردىڭ ناتيجەسىندە 2025 جىلعا قاراي 10 ايماقتاعى ەكولوگيانىڭ لاستانۋ دەڭگەيى تومەندەيدى دەپ بولجاپ وتىرمىز»، - دەپ اتاپ ءوتتى ءزۇلفيا سۇلەيمەنوۆا.
ۆيسە-مينيستردىڭ ايتۋىنشا، اتالعان كومپانيالار ءوز قاراجاتتارى ەسەبىنەن زياندى قالدىقتار مولشەرىن 20-30%-عا دەيىن ازايتۋعا مىندەتتەلدى.