گوندۋراستىڭ سولتۇستىگىندەگى يورو قالاسىندا جىل سايىن مامىر مەن شىلدە ايلارى اراسىندا ەرەكشە تابيعي قۇبىلىس – بالىق جاۋۋ بايقالادى، دەپ حابارلايدى aqshamnews.kz
قاتتى جاڭبىر مەن داۋىلدان كەيىن جەرگە جۇزدەگەن ۇساق بالىقتار تۇسەدى. بۇل قۇبىلىس عاسىردان استام ۋاقىتتان بەرى جالعاسىپ كەلەدى جانە ءوڭىر تۇرعىندارىنىڭ مادەنيەتى مەن ءومىرىنىڭ ءبىر بولىگىنە اينالعان.
جەرگىلىكتى اڭىزدار بۇل قۇبىلىستى XIX عاسىردا ءومىر سۇرگەن يسپاندىق ميسسيونەر حوسە مانۋەل دە حەسۋس سۋبيرانامەن بايلانىستىرادى. اڭىزعا سايكەس، ميسسيونەر ءۇش كۇن، ءۇش ءتۇن بويى جەرگىلىكتى حالىقتىڭ اۋىر جاعدايىن جەڭىلدەتۋ ءۇشىن دۇعا ەتكەن. ونىڭ دۇعاسىنان كەيىن بالىق جاۋعان جاڭبىر باستالىپ، سول كەزدەن بەرى جىل سايىن قايتالانىپ كەلەدى.
عالىمدار بۇل ەرەكشە قۇبىلىستى تۇسىندىرۋگە تىرىسىپ، بىرنەشە تەوريانى ۇسىنادى. ءبىر بولجام بويىنشا، سۋ تورنادوسى نەمەسە داۋىلدار سۋداعى ۇساق بالىقتاردى كوتەرىپ، ولاردى الىس قاشىقتىققا جەتكىزىپ، جاۋىنمەن بىرگە جەرگە تۇسىرەدى. دەگەنمەن، يورو قالاسى اتلانت مۇحيتىنان 70 شاقىرىم قاشىقتىقتا ورنالاسقاندىقتان، بۇل تەوريا تولىق دالەلدەنبەگەن. باسقا تەوريادا بالىقتار جەراستى وزەندەرى مەن كولدەرىندە مەكەندەيدى دەپ ايتىلادى. قاتتى جاۋىن-شاشىن كەزىندە جەراستى سۋلارىنىڭ تاسۋى ولاردىڭ جەر بەتىنە شىعۋىنا سەبەپ بولۋى مۇمكىن. تابىلعان بالىقتاردىڭ تۇششى سۋدا تىرشىلىك ەتەتىنى جانە كورۋ قابىلەتىنىڭ ناشارلىعى بۇل بولجامدى راستايدى.
يورو تۇرعىندارى بۇل قۇبىلىستى قۇدايدىڭ ەرەكشە سىيى رەتىندە قابىلداپ، جىل سايىن فەستيۆال ۇيىمداستىرادى. قۇبىلىستىڭ ناقتى سەبەبى ءالى تولىق زەرتتەلمەسە دە، بۇل وقيعا كوپتەگەن تۋريستەر مەن عالىمداردى قىزىقتىرىپ كەلەدى.