قازاقستاننىڭ فۋتزالدان ۇلتتىق قۇراماسىنىڭ باس جاتتىقتىرۋشىسى ريكاردو كاكا ەۆرو-2026 ىرىكتەۋ كەزەڭىندە ارمەنيامەن تەڭ ويىن (4:4) تۋرالى ءوز پىكىرىن ءبىلدىردى، دەپ حابارلايدى aqshamnews.kz
— بۇل ويىن وسى كەزەڭدەگى سوڭعى ءساتسىز ماچىمىز بولادى دەپ ۇمىتتەنەمىن. الەم چەمپيوناتىنان كەيىن ءبىز ەموسيالىق تۇرعىدا قالپىنا كەلە المادىق. بۇل تۋرنير الەم چەمپيوناتى ەمەس، سوندىقتان موتيۆاسيانى ءوزىمىز تابۋىمىز كەرەك ەكەنىن تۇسىنە المادىق. بۇل ماسەلەنى شەشۋ ءۇشىن جۇمىس جاساۋىمىز قاجەت، — دەدى كاكا.
كاكا قۇرامانىڭ ەموسيالارى البانيا مەن ارمەنيا ويىنشىلارىنان الدەقايدا تومەن بولعانىن اتاپ ءوتتى:
— ەموسياسىز جاقسى ناتيجە كورسەتۋ مۇمكىن ەمەس. جاڭا جىلدان كەيىن ءبىز بۇدان دا كۇشتىرەك بولامىز دەپ سەنەمىن.
سونىمەن قاتار، كاكا كوماندانىڭ بىرنەشە ماڭىزدى ويىنشىسىنان ايىرىلعانىن ايتتى:
— كناۋب پەن اقباليكوۆ جاراقاتىنا بايلانىستى الاڭعا شىعا المادى. لەو دا وتباسىلىق جاعدايعا بايلانىستى تەز ارادا ۇيىنە قايتۋعا ءماجبۇر بولدى. وتباسى بارىنەن ماڭىزدى، سوندىقتان ونى بوساتتىم.
كاكانىڭ ايتۋىنشا، قازاقستان قۇراماسى ءۇشىن جاعداي ءالى دە قولايلى:
— بارلىق كوماندانىڭ ءوز قولىندا مۇمكىندىگى بار. ەگەر قازاقستان مەن ارمەنيا قالعان ماچتارىن جەڭسە، تىكەلەي ەۆرو-2026-عا جولداما الادى.
ول جانكۇيەرلەرگە جەڭىس سىيلاي الماعانىنا ىشتەي وكىنەدى.