Netflix-تەگى «جوعالعان بالالار» دەرەكتى ءفيلمى 2023 جىلى امازون نۋ ورمانىندا ورىن العان شىنايى وقيعا نەگىزىندە تۇسىرىلگەن. بۇل فيلمدە ءبىر وتباسىنىڭ امان قالۋ جولىنداعى كەرەمەت وقيعاسى باياندالادى، دەپ حابارلايدى aqshamnews.kz
2023 جىلدىڭ 1 مامىرىندا ماگدالەنا مۋكۋتۋي ءتورت بالاسىمەن بىرگە كولۋمبيانىڭ وڭتۇستىك-شىعىسىنداعى سان-حوسە-دەل-گاۆيارە قالاسىنا ۇشىپ بارۋ ءۇشىن ءبىر موتورلى Cessna ۇشاعىنا وتىرادى. ۇشاقتا ءۇش ەرەسەك پەن ءتورت بالا بولعان. بالالاردىڭ ەڭ ۇلكەنى – 13 جاستاعى لەسلي، ال ەڭ كىشىسى – نەبارى 11 ايلىق ءسابي.
امازونيا ۇستىمەن ۇشىپ بارا جاتقان ۇشاق ورماننىڭ ءبىر بولىگىنە قۇلاپ، اپاتقا ۇشىرايدى. قۇتقارۋ جۇمىستارىنا كولۋمبيانىڭ ارنايى اسكەري كۇشتەرى مەن جەرگىلىكتى تايپالاردىڭ وكىلدەرى جۇمىلدىرىلادى. الايدا العاشقى 15 كۇندە ىزدەۋشىلەر ەشقانداي دەرەك تاپپاي، نۋ ورماندى كەزۋمەن ۋاقىت وتكىزەدى.
تەك 16-كۇنى قۇتقارۋشىلار ورماندا ون ءتورت جاستاعى الەحاندرومەن كەزدەسەدى. ورماننان ەشقاشان شىقپاعان بۇل بالا ولارعا ۇشاقتىڭ قۇلاعان ورنىن كورسەتىپ، «كوك ءۇي» دەپ اتاعان سىنىقتاردى نۇسقايدى. ۇشاقتا تەك ەرەسەكتەردىڭ دەنەسى تابىلعانىمەن، بالالاردىڭ ءىز-تۇزسىز جوعالعانى انىقتالادى.
بالالار ءتىرى بولۋى مۇمكىن دەگەن ۇمىتپەن قۇتقارۋشىلار ىزدەۋدى جالعاستىرا بەرەدى. ۇشاق قۇلاعان جەردەن ءبىر شاقىرىم قاشىقتىقتان بالانىڭ ءسۇت ىشەتىن بوتەلكەسى، ال تاعى ءبىر شاقىرىمنان جابايى جەمىستەردىڭ جارتىلاي تىستەلگەن قابىعى تابىلادى.
40 كۇن وتكەننەن كەيىن قۇتقارۋشىلار 13 جاسار لەسليدى ءۇش باۋىرىمەن السىرەگەن كۇيىندە، ورماننىڭ سۋ جاعاسىندا تاۋىپ الادى. ءتورت باۋىردىڭ ورمانداعى ءبىر ايلىق عاجايىپ امان قالۋى – لەسليدىڭ ەرلىگىنىڭ ايقىن دالەلى.
لەسلي اپاتتان كەيىن باۋىرلارىن ورماننىڭ ءقاۋىپتى ورتاسىندا ءتىرى قالدىرۋ ءۇشىن جاپىراقتارمەن، جابايى جەمىستەرمەن تاماقتاندىرىپ، ءبىر اي بويىنا قامقورلىق جاساعان. قۇتقارۋشىلار لەسليدەن: «قالاي جول تاۋىپ وتىردىڭدار؟» – دەپ سۇراعاندا، ول:
"كۇن سايىن العا قاراي ءجۇرىپ وتىردىق. قۇتقارۋشىلار ءبىزدى بايقاسىن دەپ، جولعا كەيبىر زاتتارىمىزدى قالدىرىپ كەتتىك،" – دەپ جاۋاپ بەرگەن.
بۇل وقيعا تەك بالالاردىڭ امان قالۋى تۋرالى ەمەس، سونىمەن بىرگە ادامنىڭ العا ۇمتىلۋ، قايسارلىق پەن تاباندىلىق ارقىلى قانداي قيىندىقتى دا جەڭە الاتىنىن دالەلدەيدى. 13 جاسار لەسليدىڭ ەرلىگى – ومىردە تەك العا قاراي ءجۇرۋ، ماقساتقا ۇمتىلۋدىڭ شىنايى ۇلگىسى.