وتاندىق ۆاكسينانىڭ قاۋقارى وزگەلەرمەن تەڭ دارەجەدە
قازاقتىڭ QazVac ۆاكسيناسى «دەلتا» شتامىنان ءتيىمدى قورعايدى، دەپ حابارلايدى Almaty-akshamy.kz.
مۇنداي ناتيجەلەردى ق ر بعم بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىنىڭ عالىمدارى جۇرگىزگەن زەرتتەۋلەر كورسەتتى. عالىمدار بەيتاراپتاندىرۋ رەاكسياسىنا تەست وتكىزدى، ناتيجەسىندە وتاندىق QazVac ۆاكسيناسىمەن ەگىلگەندەر انتيدەنەلەردىڭ جوعارى دەڭگەيىن كورسەتتى.
ۆيرۋستى بەيتاراپتاندىراتىن انتيدەنەلەر كلينيكالىق زەرتتەۋلەرگە قاتىسقان ەرىكتىلەردىڭ 90%-نان استامىندا انىقتالدى.
سونداي-اق زەرتحانالىق جانۋارلارعا تاجىريبەلەر جۇرگىزىلدى. QazVac ۆاكسيناسياسىنان كەيىن حومياكتاردا پايدا بولعان انتيدەنەلەر كوروناۆيرۋستىڭ «ءۇندى» شتامىن بەيتاراپتاندىرۋعا قابىلەتتى ەكەندىگى انىقتالدى.
«ءبىز QazVac ۆاكسيناسى قۇرعان انتيدەنەلەردىڭ «ۋحان»، «بريتاندىق الفا»، «ۇندىلىك دەلتا» سياقتى كوروناۆيرۋستىڭ جاڭا شتامدارىن بەيتاراپتاندىرۋ قابىلەتىن انىقتاۋ ماقساتىندا زەرتتەۋ جۇرگىزدىك. ناتيجەلەر ۆاكسينالاۋدان كەيىنگى انتيدەنەلەردىڭ يممۋنيتەتتى قالىپتاستىراتىنىن جانە ۆيرۋستىڭ ءۇش ءتۇرىن دە بەيتاراپتاندىرۋعا قابىلەتتى ەكەنىن كورسەتتى. سونداي-اق ءبىز زەرتحانالىق جانۋارلارعا تاجىريبەلەر جۇرگىزدىك. «QazVac» ۆاكسيناسىن العان جانە ۆاكسينالانباعان زەرتحانالىق حومياكتاردى الدىق. ءبىراز ۋاقىتتان كەيىن ولارعا "دەلتا" شتامىن جۇقتىردىق. ناتيجەسىندە ۆاكسينالانباعان حومياكتار كوروناۆيرۋستىڭ دەلتا شتامىن جۇقتىردى. ال «QazVac» ۆاكسيناسىمەن ەگىلگەن جانۋارلار اۋىرماي، «دەلتا» ۆيرۋسىنىڭ شتامىنان قورعالعان بولىپ شىقتى»، – دەپ اتاپ ءوتتى ق ر بعم عك بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا.
الىنعان مالىمەتتەر QazVac-تىڭ كوروناۆيرۋستىڭ بار شتامدارىنا قارسى تيىمدىلىگىن، ونىڭ ىشىندە وتاندىق ۆاكسينانىڭ "دەلتا" شتامىنان قورعاۋ قابىلەتىن راستادى.
سونىمەن قاتار، كوروناۆيرۋسىنا قارسى QazVac ۆاكسيناسىن ق ر بعم عىلىم كوميتەتىنىڭ بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ عالىمدارى ازىرلەگەن. 60 جىلدان استام تاريحى بار بقپعزي-دا بيولوگيالىق قاۋىپسىزدىك، ۆيرۋسولوگيا، ميكروبيولوگيا، يممۋنولوگيا سالاسىندا جۇمىس تاجىريبەسى مول.
ينستيتۋت عالىمدارى پرەپاراتتاردىڭ 60-تان استام ءتۇرىن، سونىڭ ىشىندە 30 ۆاكسينانى، 16 تەست-جۇيەنى جانە 15-تەن استام ءتۇرلى بيوپرەپاراتتاردى ازىرلەپ، ەنگىزدى. سوڭعى 10 جىلدا ينستيتۋت قۇس جانە شوشقا تۇماۋىنا قارسى وتاندىق ۆاكسينالاردى دايىنداۋ تەحنولوگياسىن جاسادى.