ۋنيۆەرسيتەتتە 650-دەن استام ءبىلىم بەرۋ باعدارلامسى ىسكە اسىرىلۋدا.
ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما ءتوراعاسى – رەكتورى جانسەيىت تۇيمەبايەۆ 2020-202 وقۋ جىلىنىڭ ءبىلىم بەرۋ، الەۋمەتتىك-تاربيەلىك قىزمەتتەرىنىڭ قورىتىندىلارىن جاساپ ونلاين جانە وفلاين فورماتتا ەسەپتىك كەزدەسۋ وتكىزدى، دەپ حابارلايدى Almaty-akshamy.kz.
رەكتوردىڭ حالىق الدىنداعى ەسەبىندە ۋنيۆەرسيتەت قىزمەتىنە تولىق جانە جان-جاقتى شولۋ جاساپ، ەسەپتى جىلداعى نەگىزگى ناتيجەلەردى تالدادى جانە ودان ءارى دامۋ باعدارلاماسىن قامتىدى.
رەكتور «ۋنيۆەرسيتەت تاريحىنىڭ، وقىتۋشىلاردىڭ، عالىمداردىڭ جانە ستۋدەنتتەردىڭ كاسىبي دەڭگەيىنىڭ جوعارىلىعىنىڭ ارقاسىندا ۋنيۆەرسيتەت جاھاندىق باسەكەگە قابىلەتتى» دەپ اتاپ ءوتتى.
پوستكەڭەستىك كەڭىستىكتە تەك ەكى ۋنيۆەرسيتەت الەمنىڭ توپ-200 ۇزدىك ۋنيۆەرسيتەتتەرىنىڭ قاتارىنا كىرەدى، ولار – م.ۆ.لومونوسوۆ اتىنداعى ممۋ (78-ورىن) جانە ءال-فارابي اتىنداعى قازۇۋ (175-ورىن). سونداي-اق ۋنيۆەرسيتەت QS Stars Rating System حالىقارالىق رەيتينگىسىندە «بەس جۇلدىز» ارتىقشىلىعىنا يە بولعان ورتالىق ازيا وڭىرىندەگى العاشقى جانە جالعىز جوعارى وقۋ ورنى.
ۋنيۆەرسيتەتتە كادرلىق الەۋەتتىڭ دامۋىنا ەرەكشە نازار اۋدارىلادى. وقىتۋشى-پروفەسسورلار قۇرامىنىڭ شتات سانى شامامەن 2،9 مىڭدى قۇرايدى، ونىڭ ىشىندە 1،2 مىڭنان استام دوكتورلار مەن عىلىم كانديداتتارى جانە 350-گە جۋىق PhD دوكتورلارى بار. ۋنيۆەرسيتەت پروفەسسورلارىنىڭ اراسىندا ق ر ۇلتتىق عىلىم اكادەمياسىنىڭ 10 اكادەميگى مەن 7 كوررەسپوندەنت-مۇشەسى، عىلىم مەن تەحنيكا سالاسىنداعى مەملەكەتتىك سىيلىقتىڭ 14 لاۋرەاتى بار. ءبىلىم ورداسىنداعى 400-دەن اسا وقىتۋشى «جوو-نىڭ ۇزدىك وقىتۋشىسى» گرانتىن يەلەنگەن، بۇل جالپى ەلىمىز بويىنشا 20% كورسەتكىشكە سايكەس كەلەدى.
«وقىتۋشىلاردى ماتەريالدىق ىنتالاندىرۋ ماقساتىندا بيىل ەڭبەك اقىسى ەكى ەسە كوبەيدى. ناتيجەسىندە، وقىتۋشىلاردىڭ ەڭ تومەنگى جالاقىسى – 285 مىڭ، اعا وقىتۋشى – 312 مىڭ، دوسەنت – 389 مىڭ، پروفەسسور – 500 مىڭ تەڭگەنى قۇرادى»، - دەپ حابارلايدى ءال-فارابي اتىنداعى قازۇۋ-دىڭ باسپا ءسوز قىزمەتى.
جالپى العاندا، ۋنيۆەرسيتەتكە ەلدەگى گرانت يەگەرلەرىنىڭ جالپى سانىنىڭ شامامەن 7 پايىزىن قابىلداندى. الەمنىڭ 50 ەلىنەن 2،4 مىڭعا جۋىق شەتەلدىك ستۋدەنتتەر ءبىلىم الۋدا. شەتەلدىك ستۋدەنتتەردىڭ قاتارىن 2025 جىلعا دەيىن 25 پايىزعا دەيىن ارتتىرۋ مىندەتى قويىلىپ وتىر. بۇل ماقساتقا جەتۋ ءۇشىن تۇركيا، قىرعىزستان، وزبەكستان، ارمەنيا ەلدەرىندە قازۇۋ فيليالدارىن اشۋ جۇزەگە اسادى. وتكەن جىلمەن سالىستىرعاندا تالانتتى جاستاردى تارتۋ 2،2 ەسەگە ارتقان. ماسەلەن، وتكەن جىلى «التىن بەلگى» يەگەرلەرىنىڭ سانى 508 بولسا، وسى جىلى – 1058، ياعني ەكى ەسەگە كوبەيدى.
قازۇۋ تۇلەكتەرى ەلىمىزدە جانە شەتەلدە سۇرانىسقا يە، تۇلەكتەردىڭ جۇمىسقا ورنالاسۋى ورتا ەسەپپەن 94 پايىزدى قۇرايدى. 2021 جىلى ۋنيۆەرسيتەت الەمدەگى ەڭ ۇزدىك ۋنيۆەرسيتەتتەردىڭ QS رەيتينگىسىندە تۇلەكتەردىڭ جۇمىسقا ورنالاسۋ قابىلەتتىلىگى بويىنشا ۇزدىك 201-250-گە كىردى. «جۇمىسپەن قامتىلعان تۇلەكتەردىڭ ۇلەسى» كورسەتكىشى بويىنشا ۋنيۆەرسيتەت الەمدە 55-ورىندا.
ۋنيۆەرسيتەتتە 650-دەن استام ءبىلىم بەرۋ باعدارلامالارى ىسكە اسىرىلۋدا، ولاردىڭ 120-سى الەمنىڭ جەتەكشى ۋنيۆەرسيتەتتەرىمەن بىرلەسىپ قوس ديپلوم باعدارلاماسى بويىنشا جۇرگىزىلەدى، 92 ءبىلىم باعدارلاماسى اعىلشىن تىلىندە جۇزەگە اسىرىلادى. اعىمداعى جىلى 100-دەن استام جاڭا ءبىلىم بەرۋ باعدارلاماسى ىسكە قوسىلدى.
بۇگىندە قازۇۋ عىلىمي جوبالار جانە عىلىمي جاريالانىمدار سانى بويىنشا ەلىمىزدە كوش باستاپ تۇر. رەيتينگتىك باسىلىمدارداعى ءاربىر بەسىنشى قازاقستاندىق جاريالانىم ۋنيۆەرسيتەتكە تيەسىلى. ۋنيۆەرسيتەتتىڭ بەس عىلىمي جۋرنالى حالىقارالىق دەرەكتەر قورىنا كىرەدى. ءبىزدىڭ عالىمدار 400-دەن استام پاتەنتتەر مەن اۆتورلىق كۋالىكتەرگە يە بولدى.
ءبىلىم الۋشىلاردى الەۋمەتتىك قولداۋ – ۋنيۆەرسيتەت باسىمدىقتارىنىڭ ءبىرى. الەۋمەتتىك وسال ساناتتاعى مىڭنان استام «وتە جاقسى» جانە «جاقسىعا» وقيتىن ستۋدەنتتەر وقۋ اقىسىنا 10-نان 25 پايىزعا دەيىن جەڭىلدىك الادى.
ءال-فارابي اتىنداعى قازۇۋ ستۋدەنتتەرى قازاقستاندىق جانە حالىقارالىق سپورت ارەناسىنا بەلسەندى قاتىسۋدا. توكيو وليمپياداسى قورىتىندىسىندا ەل قورجىنىنا ستۋدەنتتەر مەن تۇلەكتەر ءتورت قولا مەدال الىپ كەلدى.
قازىرگى ۋاقىتتا جەتى وقۋ كورپۋسىندا سىرتقى مەردىگەرلەردى تارتپاي، ۋنيۆەرسيتەت قىزمەتكەرلەرى تاراپىنان جوندەۋ جۇرگىزدى. ءتورت وقۋ كورپۋسىندا كۇردەلى جوندەۋ جۇمىستارى اياقتالۋدا. بۇعان دەيىن جاسالعان تەحنيكالىق قولداۋلارعا قاراماستان وقۋ كورپۋستارى مەن جاڭا قۇرىلىس عيماراتتارىنا تۇبەگەيلى جاڭارتۋلار قاجەت. 2،5 مىڭنان استام وقىتۋشى مەن قىزمەتكەر تۇرعىن ۇيگە مۇقتاج.
جوعارىدا اتالعان ماسەلەلەردى شەشۋ ماقساتىندا كامپۋستى دامىتۋ جونىندەگى 2021-2025 جىلدارعا ارنالعان جۇمىس جوسپارى ازىرلەندى، وندا جاتاقحانالاردى جانە، وقۋ كورپۋستارىن قايتا قۇرۋ جانە سالۋ؛ قىزمەتتىك تۇرعىن ءۇي سالۋ كوزدەلگەن. ۋنيۆەرسيتەت ق ر بعم «قارجى ورتالىعى» اق-مەن بىرلەسىپ، جاتاقحانالار سالۋ ءۇشىن الەۋەتتى ينۆەستورلاردى تارتۋ بويىنشا جۇمىس جۇرگىزۋدە. سونداي-اق قارجىلاندىرۋدىڭ ءتۇرلى تەتىكتەرى قاراستىرىلۋدا جانە سىرتقى ينۆەستيسيالاردى تارتۋ جوسپارلانۋدا.
«قازىرگى ۋاقىتتا ۋنيۆەرسيتەت ۇجىمى جوعارى ءبىلىم مەن عىلىمنىڭ ساپاسىن ارتتىرۋ بويىنشا ستراتەگيالىق مىندەتتەردى شەشۋگە ۇمتىلۋدا. قازۇۋ-دىڭ ودان ءارى دامۋى ەلىمىزدىڭ ادامي كاپيتالى مەن عىلىمي-تەحنولوگيالىق الەۋەتىن كۇشەيتۋگە ىقپال ەتەتىن بولادى»، – دەدى، بايانداماسىن قورىتىندىلاعان قازۇۋ باسقارما ءتوراعاسى – رەكتورى جانسەيىت تۇيمەبايەۆ.
ۋنيۆەرسيتەت باسشىسىنىڭ بايانداماسىنان سوڭ، ستۋدەنتتەر، وقىتۋشىلار مەن ب ا ق وكىلدەرى وزدەرىن تولعاندىرعان ساۋالدارىنا جاۋاپ الدى. كەزدەسۋ قورىتىندىسى بويىنشا ءبىرقاتار ماسەلەلەردى باسشىلىق باقىلاۋىنا الدى جانە كەلىپ تۇسكەن بارلىق ۇسىنىستار ءوز دەڭگەيىندە قارالاتىن بولادى.
ەسەپتى كەزدەسۋىندە رەكتور وقىتۋشىلار، ستۋدەنتتەر جانە قوعام مۇشەلەرى تاراپىنان قويىلعان سۇراقتارعا جاۋاپ بەردى. كەزدەسۋ قورىتىندىسى بويىنشا ءبىرقاتار ماسەلەلەر باسشىلىق باقىلاۋىنا الىندى جانە كەلىپ تۇسكەن بارلىق ۇسىنىستار ءوز دەڭگەيىندە قارالاتىن بولادى.