قازاقستاندىق تۇلەكتەر ەندى 2،5 جىلدىق وقۋعا تۇسە الادى

جاڭا وقۋ جىلىنان باستالادى.

ءبىلىم جانە عىلىم ءمينيسترى اسحات ايماعامبەتوۆ بيىل جاڭا وقۋ جىلىنان باستاپ پيلوتتىق رەجيمدە 2،5 جىلدىق باكالاۆريات ەنگىزەلىتىنىن ايتتى، دەپ حابارلادى Almaty-akshamy.kz Turkystan.kz سىلتەمە جاساپ.

مينيستردىڭ ايتۋىنشا، كوپتەگەن جۇمىس بەرۋشى كادرلاردىڭ وتە ۇزاق – 4 جىل بويى دايارلاناتىنىنا شاعىمدانادى. سول سەبەپتى مينيسترلىك پيلوتتىق رەجيمدە «قولدانبالى باكالاۆرلاردى» دايىنداي باستايدى. ءبىراق 4 جىلدىق باكالاۆريات سول كۇيى قالادى.

«ءبىز مۇنى بيىل جاڭا وقۋ جىلىنان باستاۋدى جوسپارلاپ وتىرمىز. ءبىرقاتار جوعارى وقۋ ورنىندا پيلوتتىق جوبا بولادى. ازىرگە ەلوردا مەن الماتى قالالارىنىڭ جوعارى وقۋ ورىندارىنا ەنگىزەمىز»، – دەدى اسحات ايماعامبەتوۆ ۇكىمەت ۇيىندە وتكەن باسپا ءسوز ءماسليحاتىندا.

بۇل رەتتە مينيستر «قولدانبالى باكالاۆرياتتىڭ» ەڭبەك نارىعىنا نە بەرەتىنىن ءتۇسىندىردى.

«قىسقا ۋاقىت ىشىندە، ياعني 2-2،5 جىل ىشىندە پراكتيكاعا باعدارلانعان مامان ەڭبەك نارىعىنا شىعادى. ەگەر ول 2 نەمەسە 5 جىلدان كەيىن ءبىلىمىن شىڭداپ، ءارى قاراي وقىعىسى كەلسە، ۋنيۆەرسيتەتكە بارىپ، تولىق باكالاۆر دارەجەسىن الۋعا مۇمكىندىگى بار. ۋنيۆەرسيتەتكە ءتۇسىپ، ءارى قاراي وقۋىن جالعاستىرا الادى»، – دەدى ول.