قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ ليۋكسەمبۋرگ ۇلى گەرسوگتىگىنە رەسمي ساپار جاسادى.
ساپار بارىسىندا قازاقستاننىڭ سىرتقى ساياسي ۆەدومستۆوسىنىڭ باسشىسى ليۋكسەمبۋرگ پرەمەر-مينيسترى ليۋك فريدەنمەن جانە ليۋكسەمبۋرگ پرەمەر-مينيسترىنىڭ ورىنباسارى – سىرتقى ىستەر جانە سىرتقى ساۋدا ءمينيسترى كساۆە بەتتەلمەن كەزدەستى، دەپ حابارلايدى aqshamnews.kz سىرتقى ىستەر مينيسترلىگىنە سىلتەمە جاساپ.
تاراپتار قازاقستان مەن ليۋكسەمبۋرگ اراسىنداعى ىنتىماقتاستىقتىڭ نەگىزگى ماسەلەلەرىمەن قاتار قارجى تەحنولوگيالارى، «جاسىل» ەنەرگەتيكا ارقىلى تۇراقتى دامۋ، فارماسيەۆتيكا جانە كولىك ينفراقۇرىلىمى جوبالارى سياقتى كەلەشەگى بار باعىتتاردى تالقىلادى. ەكى ەلدىڭ ىسكەرلىك قوعامداستىقتارى ءۇشىن مۇمكىندىكتەردى كەڭەيتۋ جانە ەكونوميكالىق بايلانىستاردى نىعايتۋ قاجەتتىلىگى راستالدى.
پرەمەر-مينيستر ليۋك فريدەن «ليۋكسەمبۋرگ قازاقستاندى ورتالىق ازياداعى سەنىمدى سەرىكتەس رەتىندە قاراستىراتىنىن جانە ەلدەرىمىز اراسىنداعى ساۋدا-ەكونوميكالىق ىنتىماقتاستىقتى ودان ءارى تەرەڭدەتۋ ءۇشىن ۇلكەن الەۋەت بار ەكەنىن» اتاپ ءوتتى. ول قازاق تاراپىنىڭ ەكونوميكانىڭ نەگىزگى سالالارىن جاڭعىرتۋ جانە وزىق تەحنولوگيالاردى ەنگىزۋ جونىندەگى ۇمتىلىستارىن قولداۋعا دايىن ەكەنىن ءبىلدىردى.
ءوز كەزەگىندە، قازاقستان ءسىم باسشىسى ليۋكسەمبۋرگتى قازاقستاننىڭ ەۋروپالىق وداقتاعى ماڭىزدى سەرىكتەسى رەتىندە اتاپ ءوتتى. 2005 جىلدان باستاپ ليۋكسەمبۋرگتەن قازاقستانعا تىكەلەي ينۆەستيسيالاردىڭ جالپى اعىنى 2،9 ملرد اقش دوللارىن قۇرادى.
تاراپتار قازاقستان مەن ەۋروپالىق وداق اراسىنداعى ءوزارا ءىس-قيمىل ماسەلەلەرىنە دە نازار اۋدارىپ، ساۋدا-ەكونوميكالىق بايلانىستاردى كەڭەيتۋگە، سونداي-اق ورتالىق ازياداعى قاۋىپسىزدىك پەن تۇراقتىلىق ماسەلەلەرى بويىنشا ىنتىماقتاستىققا ەرەكشە كوڭىل ءبولدى. سونىمەن قاتار تاراپتار حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.
ليۋكسەمبۋرگ سىرتقى ىستەر ءمينيسترى ك. بەتتەل قازاقستاننىڭ وڭىرلىك قاۋىپسىزدىكتى نىعايتۋداعى كۇش-جىگەرىن جوعارى باعالايتىنىن اتاپ ءوتتى. ەلدەرىمىزدى جاھاندىق سىن-قاتەرلەرگە قاتىستى ورتاق كوزقاراستار بىرىكتىرەتىنى ايتىلدى. ليۋكسەمبۋرگ قازاقستانمەن حالىقارالىق قاۋىپسىزدىك جانە ورنىقتى دامۋ ماسەلەلەرى بويىنشا ىنتىماقتاستىقتى كەڭەيتۋگە دايىن، ويتكەنى بۇۇ جانە باسقا دا حالىقارالىق ۇيىمدار شەڭبەرىندە بەيبىتشىلىك پەن تۇراقتىلىقتى نىعايتۋ باعىتىندا بىرلەسكەن جۇمىس ءۇشىن ۇلكەن مۇمكىندىكتەر بار دەپ سانايدى.
كەزدەسۋلەر سوڭىندا تاراپتار ەكىجاقتى قارىم-قاتىناستاردى بارلىق دەڭگەيدە نىعايتۋعا جانە وڭىرلىك پەن جاھاندىق ماڭىزدى ماسەلەلەردى شەشۋدە حالىقارالىق ۇيىمدار اياسىندا بەلسەندى ىنتىماقتاستىق ورناتۋعا نيەتتى ەكەنىن راستادى.