50 جاستاعى پاسيەنت ءوزىنىڭ ميوماسى تۋرالى ءۇش جىل بۇرىن بىلگەن، ءبىراق دارىگەرگە بارۋدان جۇرەكسىنىپ كەلگەن. سالدارىنان، ونىڭ جاعدايى ناشارلاپ، ول تاراز قالالىق كوپبەيىندى اۋرۋحاناسىنا جانە 15 كگ ميوما دياگنوزى قويىلعان كونسۋلتاسيالىق-دياگنوستيكالىق ورتالىققا جۇگىنەدى، دەپ حابارلايدى aqshamnews.kz ق ر دەنساۋلىق ساقتاۋ مينيسترلىگىنە سىلتەمە جاساپ.
گينەكولوگيا بولىمشەسىنىڭ تاجىريبەلى حيرۋرگتارى رىمكەش قوشقاروۆا مەن ءجاميلا مۇسايەۆا ۇلكەن ميومانى الىپ تاستاۋ وپەراسياسىن شەبەر ورىندادى. ميوما الىنعاننان كەيىن ايەلدىڭ جاعدايى ايتارلىقتاي جاقساردى. كوزىنە جاس الىپ، ول دارىگەرلەرگە ونى ازاپتاعان اۋرۋدان قۇتىلعانى ءۇشىن العىس ايتتى جانە بۇرىن مەديسينالىق كومەككە جۇگىنبەگەنىنە وكىنىش ءبىلدىردى.
مۇنداي ۇلكەن ميومالار وتە سيرەك كەزدەسەتىنىن ايتا كەتكەن ءجون. وپەراسيادان كەيىن ميوما گيستولوگيالىق زەرتتەۋگە جىبەرىلدى.
جاتىر ميوماسى - جاتىردىڭ بۇلشىقەت قاباتىندا پايدا بولاتىن جانە رەپرودۋكتيۆتىك جاستاعى ايەلدەردە ءجيى كەزدەسەتىن قاتەرسىز ىسىك. ستاتيستيكاعا سايكەس، ايەلدەردىڭ 40%-ى وسى اۋرۋدان زارداپ شەگەدى.
دارىگەرلەردىڭ ايتۋىنشا، جاتىر ميوماسىنىڭ دامۋى تەك گورمونالدى تەڭگەرىمسىزدىكپەن شەكتەلمەيدى. كەيدە جاتىرداعى ەستروگەن دەڭگەيى جوعارىلاۋى مۇمكىن، ءبىراق بۇل قان تالداۋىنان ءاردايىم كورىنە بەرمەيدى. ميومانىڭ پايدا بولۋىنا قالقانشا بەز، بۇيرەك ءۇستى بەزى، گيپوتالامۋس-گيپوفيز جۇيەسى جانە انالىق بەز اۋرۋلارى دا اسەر ەتەدى. سوندىقتان الدىمەن گورمونالدى وزگەرىستەردى، سودان كەيىن اتالعان اعزالاردى تەكسەرۋ ماڭىزدى.
بۇل كەشەندى زەرتتەۋلەر ءتيىستى ەمدەۋ ادىستەرىن تاڭداۋعا مۇمكىندىك بەرەدى.