قازاقستان عالىمدارى ءسۇت سارىسۋىنان ەمدىك سۋسىن جاسادى

قازاقستاندىق عالىمدار ەمدىك قاسيەتى بار سۋسىن ءوندىرۋ تەحنولوگياسىن ويلاپ تاپتى. ول ءسۇت سارىسۋىنان جاسالادى.

ەلىمىزدە ءدال قازىرگى ۋاقىتتا توقتاۋسىز جۇمىس ىستەپ تۇرعان 200-گە تارتا ءسۇت زاۋىتى بار. ولاردىڭ ءارقايسىسى كۇنىنە 7 تونناعا دەيىن قالدىق شىعارادى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ. 

ەندى ازىرلەنگەن تەحنولوگيا قورشاعان ورتاعا زيان كەلتىرمەي، ءسۇت قالدىقتارىن قايتا پايدالانۋعا مۇمكىندىك بەرەدى. ونىڭ ۇستىنە ادام اعزاسىنا دا شيپاسى مول. اتالعان نوۋحاۋمەن ەلىمىزىدىڭ ميكروبيولوگيا جانە ۆيرۋسولوگيا عىلىمي-وندىرىستىك ورتالىعىنىڭ عالىمدارى 6 جىلعا جۋىق ۋاقىت اينالىسقان.

«مىنا شارتتى پاتوگەندى ورگانيزمدى ولتىرەتىن ميكروبتاردى تاپتىق. ونى ولتىردىك. ەندى سول قالعان نارسەسىنىڭ  ىشىندە ادامعا ورگانيزمگە پايدالى ميكروورگانيزمدى قوستىق. سويتتىك تە، ونى اشىتىپ، ادام اعزاسى ءۇشىن پايدالى ناعىزدىڭ سۋسىن جاساپ شىعاردىق. ونىڭ تەحنولوگياسى بىزدىكى. اشىتقىسى دا بىزدىكى. تەك ولاردان قۇبىرمەن اعىپ كەلەدى دە، ۇلكەن ىدىسقا سالادى 2، 3، 5 توننا. سونىمەن ءبىز اشىتۋ جۇرگىزەمىز. ميكروبيولوگيالىق پروسەستەردىڭ ءبارىن جۇرگىزىپ، سودان كەيىن ىدىستارعا ءبولىپ قۇيىپ، قالاعا ساتىپ جاتىر»، - دەدى بيولوگيا عىلىمدارىنىڭ دوكتورى، پروفەسسور، اكادەميك امانگەلدى سادانوۆ.

تازا بيولوگيالىق ءونىمدى تۇراقتى تۇردە ءىشىپ تۇرعان جاعدايدا اسقازان، ىشەك جولدارى اۋرۋلارىنىڭ الدىن الادى دەيدى ماماندار. سارىسۋدان جاسالعان سۋسىننىڭ تاعى 4 ءتۇرىن وندىرىسكە قويۋ قولعا الىنىپ جاتىر.