قىزمەتكەرلەر مەملەكەتتىك ناگرادالارمەن ماراپاتتالدى
پرەزيدەنت قاسىم-جومارت توقايەۆ ۇلتتىق قاۋىپسىزدىك كوميتەتىنىڭ 30 جىلدىعىنا ارنالعان سالتاناتتى جيىندا ۇقك ورگاندارىنىڭ ارداگەرلەرىن، وفيسەرلەرى مەن قىزمەتكەرلەرىن قۇتتىقتاپ، ولاردىڭ قازاقستان مەملەكەتتىگىن نىعايتۋعا قوسقان ۇلەسىن اتاپ ءوتتى، دەپ حابارلايدى Almaty-akshamy.kz اقورداعا سىلتەمە جاساپ.
«ۇلتتىق قاۋىپسىزدىك جۇيەسى – مەملەكەتتىگىمىزدىڭ باستى تۇعىرى. سونداي-اق، دەربەس دامۋىمىزدىڭ مىزعىماس تىرەگى. وتان ءۇشىن ايانباي ەڭبەك ەتىپ جۇرگەن ازاماتتاردىڭ ارقاسىندا ەلىمىز وسىپ-وركەندەۋدە. سىزدەر ىشكى جانە سىرتقى قاۋىپ-قاتەرلەرگە دەر كەزىندە تويتارىس بەرىپ كەلەسىزدەر. بۇگىندە مەملەكەتتىڭ نەگىزى جانە كونستيتۋسيالىق قۇرىلىمى بەرىك قورعالعان. تاۋەلسىزدىگىمىزدىڭ قۇندىلىقتارى بىرنەشە رەت ەلەۋلى سىن-قاتەرلەرگە تاپ كەلدى. سىزدەر بەيبىتشىلىك پەن كەلىسىمدى ساقتاۋ ءۇشىن تاباندى ەڭبەك ەتتىڭىزدەر»، - دەدى پرەزيدەنت.
مەملەكەت باسشىسى ۇلتتىق قاۋىپسىزدىك ورگاندارىنىڭ ەكى مىڭىنشى جىلدارى تەرروريزم مەن راديكالدى ءدىني ەكسترەميزمگە قارسى كۇرەسكە قوسقان ۇلەسىنە توقتالدى. سونداي-اق سىرتقى بارلاۋ قىزمەتىنىڭ ۇلتتىق مۇددەنى قورعاۋ جولىندا ءوز مىندەتىن تابىستى ورىنداپ كەلە جاتقانى جانە كوميتەتتىڭ «ا» ارناۋلى قىزمەتى مەن شەكارا قىزمەتىنىڭ جۇمىستارى تۋرالى ايتتى.
«جىل باسىنان بەرى كوميتەت قىزمەتكەرلەرىنىڭ ءتيىمدى جۇمىسىنىڭ ارقاسىندا ەكسترەميستىك ارەكەتتەرگە قاتىسقان جانە تەرروريزمدى ناسيحاتتاعان 42 ادام ۇستالدى. ەكى تەررولىق اكتىنىڭ الدىن الدى. ۇيىمداسقان قىلمىسقا قارسى كۇرەس قارقىندى جۇرگىزىلۋدە. ۇلتتىق قاۋىپسىزدىك ورگاندارى پوليسيامەن بىرلەسىپ، ءبىرقاتار اسا ءقاۋىپتى قىلمىستىق توپتى قۇرىقتادى، بانديتتىك ۇيىمداردىڭ 22 مۇشەسى تۇتقىندالدى. ناتيجەسىندە 700-گە جۋىق قارۋ-جاراق، 54 گراناتا، 17 مىڭنان استام ءوق-دارى تاركىلەندى. جارتى جىلدىڭ ىشىندە ەلىمىزدە 15 ەسىرتكى لابوراتورياسى، 23 حالىقارالىق جانە 40 ايماقتىق ەسىرتكى كانالدارى جويىلدى، 3 ەسىرتكى پلانتاسياسى اشكەرەلەندى. شەتەلدىك سەرىكتەستەرمەن بىرلەسىپ، حالىقارالىق ەسىرتكى تاسىمالىنا قارسى كۇرەس اياسىندا 14 حالىقارالىق ارنايى وپەراسيا جۇزەگە اسىرىلدى»، - دەدى قاسىم-جومارت توقايەۆ.
مەملەكەت باسشىسىنىڭ سويلەگەن سوزىندە كەلتىرىلگەن دەرەكتەرگە سايكەس قازاقستان شەكاراشىلارى شەكارا جانە اۋماقتىق سۋلار رەجيمىن بۇزعان 7 مىڭنان استام ادامدى ۇستاعان. جالپى قۇنى 8 ميلليارد تەڭگەدەن اساتىن ۆاليۋتا، التىن جانە باسقا دا تاۋارلاردىڭ زاڭسىز تاسىمالىنىڭ جولى كەسىلگەن. سونىمەن قاتار ارناۋلى قىزمەت ەلىمىزدىڭ اقپاراتتىق قاۋىپسىزدىگىن سەنىمدى قامتاماسىز ەتۋدە. ەلىمىزدىڭ ماڭىزدى ينفراقۇرىلىمدىق نىساندارىنا جاسالعان 1،5 مىڭ DDoS شابۋىلىنا ءساتتى تويتارىس بەرىلدى.
«ۇلتتىق قاۋىپسىزدىكتى قورعاۋ ءىسى كوبىنەسە ەل نازارىنان تىس جۇرگىزىلەدى. ونى كوپشىلىك بىلە بەرمەيدى. دەگەنمەن، سىزدەردىڭ جۇمىستارىڭىزدىڭ ءمان-ماڭىزى ايرىقشا. شىنايى پاتريوتيزم اتاق ءۇشىن ەمەس، وتان ءۇشىن ەلگە ادال قىزمەت ەتۋدەن كورىنەدى. ءبىز ەل مۇددەسىن قورعاۋ جولىندا قۇربان بولعان قاھارمانداردى ەشقاشان ۇمىتپايمىز. ولاردىڭ ەرلىك ىستەرى جۇرتقا جاريالانبايدى. ءبىراق ەسىمدەرى ۇلتتىق قاۋىپسىزدىك قىزمەتىنىڭ جىلناماسىنا التىن ارىپپەن جازىلادى. كوميتەت ارداگەرلەرىنە كوپ جىلعى ەڭبەگى ءۇشىن زور العىس ايتامىن»، - دەدى قاسىم-جومارت توقايەۆ.
پرەزيدەنت كۇشەيىپ كەلە جاتقان گەوساياسي شيەلەنىس، بۇرىن-سوڭدى بولماعان سانكسيالىق تەكەتىرەس، گيبريدتى قاقتىعىستاردىڭ تارالۋى ۇلتتىق قاۋىپسىزدىككە جاڭا سىن-قاتەرلەر ءقاۋپىن توندىرەدى دەپ سانايدى. ونىڭ پىكىرىنشە، قارقىندى جاھاندانۋ مەن جاپپاي تەحنولوگيالىق توڭكەرىس ەلدەر اراسىنداعى شەكارانىڭ اشىق بولۋىنا اكەپ سوقتىردى. مەملەكەتتەردىڭ بىر-بىرىنە تاۋەلدىلىگى ارتادى جانە مۇنداي جاعدايدا قازاقستاننىڭ اقپاراتتىق جانە الەۋمەتتىك-مادەني كەڭىستىگىنە سىرتقى كۇشتەردىڭ ىقپالى كۇشەيە تۇسەدى.
«الدىمىزدا مەملەكەتتىك جانە قوعامدىق ينستيتۋتتاردىڭ ورنىقتى ءارى ءتيىمدى جۇمىس ىستەۋىن، ازاماتتاردىڭ قاۋىپسىزدىگىن قامتاماسىز ەتۋ مىندەتى تۇر. قاڭتارداعى قاسىرەتتى كۇندەردە كوميتەتتىڭ ءبىرقاتار باسشىلارىنىڭ نامىسسىزدىعى مەن ساتقىندىعىنا قاراماستان، كوپتەگەن وفيسەرلەرىمىز ءوز انتتارىنا ادال بولىپ، باتىل ارەكەت ەتتى، ناعىز ەرلىك كورسەتتى. وزگە ەلدەردە جۋىردا بولعان اۋقىمدى قاقتىعىستار تۇراقتىلىق بولماي، ورنىقتى دامۋ مۇمكىن ەمەس ەكەنىن تاعى دا ءبىر كورسەتىپ بەردى. ۇلتتىق قاۋىپسىزدىك – مەملەكەتتەردىڭ باسەكەگە قابىلەتتىلىگىن ارتتىرۋدىڭ شەشۋشى فاكتورى. ارناۋلى قىزمەتتەر جۇمىسىنىڭ تابىستى بولۋى مەملەكەتتەردىڭ ىشكى ساياسي تۇراقتىلىعىنا عانا ەمەس، سونداي-اق ولاردىڭ ورنىقتى ەكونوميكالىق دامۋىنا ايتارلىقتاي دارەجەدە بايلانىستى»، - دەدى مەملەكەت باسشىسى.
قاسىم-جومارت توقايەۆ ەلىمىزدىڭ جاڭا قازاقستاندى قۇرۋعا كىرىسكەنىن، قوعامنىڭ بارلىق سالاسىندا تۇبەگەيلى جاڭعىرتۋلار جۇرگىزىلە باستاعانىن مالىمدەدى. مەملەكەت ازاماتتىق قوعامدى دايەكتى تۇردە دامىتىپ، دەموكراتيالىق قاعيداتتاردى قورعايدى. ونىڭ ايتۋىنشا، بۇل – ەلىمىزدىڭ دامۋى ءۇشىن وتە ماڭىزدى قادام. سوندىقتان ادىلدىك جانە زاڭ ۇستەمدىگى وسى جولدا باستى باعدار بولادى. پرەزيدەنت مامىر ايىندا ۇلتتىق قاۋىپسىزدىك كوميتەتىن رەفورمالاۋ، ياعني ونىڭ قىزمەتىن تۇبەگەيلى ترانسفورماسيالاۋ جانە ۇلتتىق قاۋىپسىزدىك جۇيەسىن باسقارۋ ساپاسىن ارتتىرۋ جونىندەگى جارلىققا قول قويعانىن ەسكە سالدى.
«وزگەرىستەردىڭ ءبارىن تابىستى جۇزەگە اسىرۋ ءۇشىن بىزگە كەز كەلگەن قاۋىپكە ءتيىمدى قارسى تۇرا الاتىن زاماناۋي ارناۋلى قىزمەت كەرەك. ۇلتتىق قاۋىپسىزدىك ورگاندارى ۇلتتىق مۇددەلەردى قورعاۋدا جانە كۇشەيىپ كەلە جاتقان زاماناۋي سىن-قاتەرلەرگە قارسى كۇرەستە الدىڭعى شەپتە بولادى. سوندىقتان اناليتيكالىق جانە اقپاراتتىق بارلاۋ جۇمىستارىنا باسا ءمان بەرە وتىرىپ، پروبلەمالاردى باستاپقى ساتىسىندا جويۋ قاجەت. قازاقستان جاھاندىق جانە وڭىرلىك قاۋىپسىزدىكتى نىعايتۋعا باعىتتالعان تەڭگەرىمدى ءارى سىندارلى سىرتقى ساياسات جۇرگىزەدى. سوندىقتان ەلىمىزدىڭ وداقتاسى جانە ستراتەگيالىق سەرىكتەسى سانالاتىن مەملەكەتتەرمەن اراداعى تابىستى ىنتىماقتاستىقتى ارناۋلى قىزمەتتەر سالاسى بويىنشا دامىتۋ وتە ماڭىزدى. قاۋىپسىزدىك سالاسىنداعى ستراتەگيالىق ماقساتتاردى جۇزەگە اسىرۋ كەزىندە ازاماتتار قۇقىعىنىڭ تاپتالۋىنا جانە ەلىمىزدە ىسكەرلىك كليماتتىڭ بۇزىلۋىنا جول بەرۋگە مۇلدە بولمايدى»، - دەدى پرەزيدەنت.
مەملەكەت باسشىسىنىڭ پىكىرىنشە، ارناۋلى ورگاندا قىزمەت ەتۋ، ەڭ الدىمەن، جان-جاقتى، سان قىرلى ءبىلىم يەسى بولۋدى، كەز كەلگەن جاعدايدى تەرەڭ زەرتتەپ، سالماقتى، پاراساتتى شەشىم قابىلداي ءبىلۋدى تالاپ ەتەدى.
«كوميتەتتىڭ ءاربىر قىزمەتكەرى ءوز ىسىنە ادال جانە ناعىز مامان بولۋعا ءتيىس. قانداي جاعداي بولسىن، مەملەكەت مۇددەسى بارىنەن جوعارى تۇرۋى قاجەت. سىزدەردىڭ كاسىبي قابىلەتتەرىڭىز بەن جەكە ادامي قاسيەتتەرىڭىزدىڭ ارقاسىندا ەل مۇددەسى ءتيىستى دەڭگەيدە قورعالاتىنى انىق. سونداي-اق ازاماتتارىمىزدىڭ بيلىككە دەگەن سەنىمى ارتىپ، مەملەكەتىمىزدىڭ بولاشاعى جارقىن بولماق. سوندىقتان كەز كەلگەن جاعدايدى تەرەڭ زەرتتەپ، سالماقتى، پاراساتتى شەشىم قابىلداي ءبىلۋ – وتە ماڭىزدى مىندەتتەرىڭىز»، - دەدى قاسىم-جومارت توقايەۆ.
جيىن سوڭىندا پرەزيدەنت ۇلتتىق قاۋىپسىزدىك ورگاندارىنىڭ ءبىرقاتار قىزمەتكەرىن مەملەكەتتىك ناگرادالارمەن ماراپاتتادى.