ساتىپ الۋدىڭ ەلەكتروندى پلاتفورماسى قارالۋدا
مەديسينالىق ۇيىمدار حالىققا تەگىن قىزمەت كورسەتۋ ءۇشىن قاجەتتى دارى-دارمەكتى ساتىپ الا الماي جاتىر. وعان ساتىپ الۋدى جۇزەگە اسىرۋى ءتيىس ۆەب-پورتالدىڭ جۇمىس ىستەمەۋى سەبەپ بولىپ وتىر، دەپ حابارلايدى Almaty-akshamy.kz «اتامەكەن» ۇكپ-گە سىلتەمە جاساپ.
مامىر ايىندا ۇكىمەت تەگىن مەديسينالىق كومەكتىڭ كەپىلدىك بەرىلگەن كولەمى جانە ءمامس جۇيەسى شەڭبەرىندە دارى-دارمەكتەر مەن مەديسينالىق بۇيىمداردى ساتىپ الۋدى رەتتەيتىن قاعيدالارعا ەنگىزىلەتىن وزگەرىستەردى قابىلدادى. قۇجاتتىڭ جاڭا رەداكسياسىندا ءداستۇرلى تاسىلمەن ساتىپ الۋ پروسەدۋرالارىن وتكىزۋ مۇمكىندىگى تولىعىمەن الىنىپ تاستالدى. ەندى اۋرۋحانالار بەلگىلى ءبىر دارى-دارمەك «سك-فارماسيا» ءبىرىڭعاي ديستريبۋسيا جۇيەسى ارقىلى ساتىپ الىناتىن پرەپاراتتار تىزىمىنە ەنبەسە دە، ولاردى ەلەكتروندى تاسىلمەن عانا ساتىپ الۋى ءتيىس. «اتامەكەن» ۇكپ اتقارۋشى حاتشىسى، باسقارما مۇشەسى نۇرلان ساقۋوۆتىڭ ايتۋىنشا، ساتىپ الۋدى ەلەكتروندى فورماتقا اۋىستىرۋ – قيسىندى ءارى بولجامدى پروسەسس. الايدا، ساتىپ الۋدىڭ ەلەكتروندى پلاتفورماسىن تولىعىمەن جولعا قويماي جاتىپ، ءداستۇرلى ساتىپ الۋدى الىپ تاستاۋ ارقىلى دەنساۋلىق ساقتاۋ مينيسترلىگى مەديسينالىق ۇيىمداردى دا، مەديسينالىق زاتتار مەن تەحنيكانى جەتكىزۋشىلەردى دە تىعىرىققا تىرەدى.
«مەديسينالىق قىزمەتتەردى كورسەتۋگە قاجەتتى بارلىق پرەپارات پەن مەديسينالىق بۇيىمداردىڭ بارلىعى «سك-فارماسيا» ارقىلى ساتىلا بەرمەيدى. اۋرۋحانالار دارى-دارمەكتىڭ كوپتەگەن اتالىمىن ىزدەپ، ساتىپ الادى. قازىرگى كەزدە پورتالدىڭ دايىن بولماۋى سالدارىنان ءونىمنىڭ وسى تۇرلەرىن ساتىپ الۋ تولىعىمەن توقتاپ تۇر. فارماسيەۆتيكالىق ونىمدەردىڭ وندىرۋشىلەرى مەن جەتكىزۋشىلەرى پورتالعا كىرە الماي وتىر. وسىدان پاسيەنتتەر – قاتارداعى قازاقستاندىقتار زارداپ شەگىپ جاتىر. دەنساۋلىق ساقتاۋ مينيسترلىگى ازاماتتاردىڭ مۇددەسىن ويلاۋى ءتيىس»، - دەدى نۇرلان ساقۋوۆ.
«اتامەكەن» ۇكپ ماماندارى وسى ماسەلە بويىنشا بيزنەس وكىلدەرىممەن ءبىرقاتار كەزدەسۋ وتكىزگەن. دەنساۋلىق ساقتاۋ ءمينيسترى اتىنا پورتال جۇمىسى جولعا قويىلعانعا دەيىن بۇرىنعى نورمالاردى قايتارۋ قاجەتتىگىنە قاتىستى حات جولدانعان.