«اقجايىق» فۋتبول كلۋبىنىڭ باس باپكەرى قىزمەتىنەن كەتتى

كەلىسىمشارت رەسمي تۇردە ءۇزىلدى

«اقجايىق» فۋتبول كلۋبىنىڭ باس باپكەرى، ۋكراينالىق مامان ۆلاديمير مازيار قىزمەتىنەن كەتتى، دەپ حابارلايدى Almaty-akshamy.kz «اقجايىق» فۋتبول كلۋبىنىڭ باسپا ءسوز قىزمەتىنە سىلتەمە جاساپ. ۆ.مازيارمەن كەلىسىمشارت رەسمي تۇردە ءۇزىلدى. ورالدىق كوماندا ۆ.مازيارعا العىسىن ءبىلدىرىپ، الداعى قىزمەتىنە ساتتىلىك تىلەدى. قازىرگى كەزدە ويىنشىلاردى ۋاقىتشا قازاقستاندىق مامان الەكسەي تۋگۋشيەۆ جاتتىقتىرۋدا. ول ۆ.مازياردىڭ جاتتىقتىرۋشىلار شتابىندا قىزمەت ەتتى. ەسكە سالا كەتەيىك، بۇدان بۇرىن «اقجايىق» فۋتبول كلۋبىنىڭ باس باپكەرى ورنىندا قالاتىن بولعانىن جازعان ەدىك. ەل بىرىنشىلىگىندە الماتىدا «قايراتتان» 0:2 ەسەبىمەن جەڭىلىپ قالعاننان كەيىن ۋكراينالىق مامان كوماندادان كەتەتىنىن مالىمدەگەن ەدى. ايتسە دە فۋتبولشىلارمەن كەزدەسكەن سوڭ شەشىمىن وزگەرتىپ، قالاتىن بولعان. ونىمەن ءىس وڭالمادى. 8 شىلدە كۇنى ورالدىقتار قازاقستان كۋبوگى ءۇشىن قىزىلوردا قالاسىندا وتكەن ويىندا ءبىرىنشى ليگادا ونەر كورسەتەتىن «قايساردان» تاعى ۇتىلدى. «اقجايىق» ەل كۋبوگى ءۇشىن كەزدەسۋدە 17 شىلدە كۇنى ءوز الاڭىندا اقتاۋدىڭ «كاسپييىن» قابىلدايدى.