سۋبسيديا بەرۋ جۇيەسى وتە كۇردەلى. بۇل تۋرالى ەلدىڭ الەۋمەتتىك-ەكونوميكالىق ماسەلەلەرى جونىندەگى كەڭەيتىلگەن كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2019-2021 جىلدارى ءونىم وڭدەۋگە بەرىلگەن سۋبسيديانى الايىق. بۇل قاراجاتتىڭ تەڭ جارتىسى سۋبسيديا الام دەۋشىلەردىڭ 10 پايىزىنىڭ عانا قولىنا تيگەن. سۋبسيديا العان كەيبىر پىسىقايلار ءوندىرىستى وركەندەتۋدىڭ ورنىنا بيۋدجەت قارجىسىن قالتاسىنا باسىپ، شالقىپ ءومىر سۇرگەن. ال قاراپايىم شارۋالار ءۇشىن سۋبسيديا الۋ – قيامەتتىڭ قيىنى»، – دەدى مەملەكەت باسشىسى.
وسى ورايدا پرەزيدەنت بۇل سالاداعى جۇيە تىم كۇردەلى ەكەنىن ايتتى.
«ونىڭ ۇستىنە، سۋبسيديا بەرۋ جۇيەسى وتە كۇردەلى جانە قاجەتتى مالىمەت كوپشىلىككە قولجەتىمدى ەمەس. سۋبسيديا ءبولۋدى رەتتەيتىن جاڭا سيفرلىق جۇيە بۇل تۇيتكىلدى شەشە الماي تۇر. ارينە، ءبىرشاما جۇمىس اتقارىلدى. مۇنى جوققا شىعارۋعا بولمايدى. ءبىراق بۇل باعىتتاعى جۇمىستى اياعىنا دەيىن جەتكىزۋ كەرەك»، – دەدى قاسىم-جومارت توقايەۆ.