تابىستىڭ ماردىمسىزدانۋىنا ينفلياسيانىڭ ءوسۋى اسەر ەتىپ وتىر.
بۇل تۋرالى ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ينفلياسيا وسكەن سايىن حالىقتىڭ ناقتى تابىسى قۇنسىزدانىپ جاتىر. جۇرتتىڭ تابىسىن الەۋمەتتىك سالانىڭ شىعىسى ەسەبىنەن ارتتىرۋدىڭ دا شەگى بار. ءبىز وسى شەككە جەتكەن سياقتىمىز. بۇعان قوسا، تۇتىنۋ نەسيەلەرىنىڭ كولەمى ارتىپ بارادى. بۇل ارەكەت – ينفلياسيا كەزىندە جان باعۋدىڭ امالى. ءبىراق مۇنداي احۋالدىڭ الەۋمەتتىك جانە ساياسي سالدارى وتە اۋىر بولۋى مۇمكىن. ءتىپتى، بانكتەردىڭ وزىنە ءقاۋىپ ءتوندىرۋى ىقتيمال»، – دەدى مەملەكەت باسشىسى.
پرەزيدەنت نەسيەنى ەڭ الدىمەن، پايدا اكەلەتىن بيزنەسكە، ياعني ءتيىمدى جوبالارعا بەرۋ كەرەكتىگىن باسا ايتتى.
«سوندا جالاقىسى جوعارى جۇمىس ورىندارى پايدا بولادى. جۇرتتىڭ كاسىپكەرلىكپەن اينالىسۋعا ىنتاسى ارتادى. ءبىر سوزبەن ايتساق، ازاماتتاردىڭ تابىسىن كوبەيتۋگە مۇمكىندىك تۋادى»، – دەدى قاسىم-جومارت توقايەۆ.