ساتۋشىلار 5 ميلليون تەڭگە بەرمەسەك، بازاردان كەتىرەدى دەپ وتىر.
الماتىداعى «كەنجەحان» بازارىنىڭ 1،5 مىڭ ساتۋشىسى شۋ شىعاردى، دەپ حابارلايدى Almaty-akshamy.kz
بۇل تۋرالى حابارلاعان كتك ارناسىنىڭ مالىمەتىنشە، جازدا ساۋدا نىسانى كۇردەلى جوندەۋدەن وتەدى. ال ونىڭ اقشاسىن بازار باسشىسى وسىنداعى كاسىپكەرلەردەن ءبىر ايدىڭ ىشىندە ءوندىرىپ الماقشى ەكەن.
«تاقالعان كەزدە تاعى «10 مىڭ دوللار كەرەك» دەيدى. راسىندا ءبىر ايدا 10 مىڭ دوللاردى ءىس جۇزىندە ەشكىم شىعارا المايدى. ول كەپىل. ءبۇيتۋ كەرەك قوي، ءبىرىنشى، مەن ءوزىم زاڭدى وقىعانمىن، شارت اكەلۋى كەرەك، اكىمدىكتىڭ رۇقساتى كەرەك. قىزىل سىزىقتا بار ما، جوق پا؟» - دەيدى ساۋداگەر ءقادىرالى ءجۇمادۇردى.
كەزىندە كونتەينەردى ساتىپ العان كاسىپكەرلەر تاعى دا شىعىنعا باتايىن دەپ تۇر. ال ءبىر جىل بۇرىن اۋىسقان بازار باسشىلىعى بۇعان باس قاتىرمايدى دەيدى.
«2014 جىلى 12 500 دوللاردان ءبارىمىز ساتىپ العانبىز. ەندى بۇگىن كونتەينەرلەرىمىزدى كەرى ساتىپ الۋىمىز كەرەك ەكەن. مىسالى، مەنىڭ ەكى ورنىم بار، 20 مىڭ دوللاردى ءبىر ايدىڭ ىشىندە اياقاستى تاۋىپ بەرە المايمىن. ويتكەنى الدىمىزدا ماۋسىم كەلە جاتىر»، - دەيدى ساۋداگەر انۋزا ءداۋىتوۆا.
«كەنجەحان» بازارى 2014 جىلى اشىلعان. نەگىزىنەن اياق-كيىم، كيىم-كەشەك جانە قۇرىلىس ماتەريالدارىن ساتادى. ەكى قاباتتى كونتەينەرلەردەن سوعىلعان.
ساۋداگەرلەر بازار اكىمشىلىگىنە شامامەن 50 مىڭ، ال ونى ساتىپ العان قوجايىنعا 150 مىڭ تەڭگە تولەيدى. سوندا اي سايىنعى تولەم ورتاشا 200 مىڭ تەڭگەدەن اسادى.
بىلتىر كەلگەن جاڭا باسشىنى ەشكىم كورمەگەن. تەگىن عانا بىلەدى. ونىڭ ورنىنا ءوزىن اتقارۋشى ديرەكتورمىن دەگەن بازار وكىلى كەلگەن. كۇردەلى جوندەۋگە 1 600 ساۋداگەردەن 5 ميلليون تەڭگەدەن اقشا جينالاتىنىن ايتىپ وتىر. بۇل – 8 ميلليارد تەڭگە. ال مودەرنيزاسيانىڭ وزىنە 10 ميلليارد جۇمسالسا، سونىڭ 80 پايىزى كاسىپكەرلەردىڭ قالتاسىنان شىققالى تۇر.
«ۇكىمەت اقشا بەرەدى، بالەنباي ميلليارد مودەرنيزاسياعا، قارىزعا دەگەن، ءبىراق نەسيەنى ازىرگە بەرمەي جاتىر. وعان سول ءۇشىن حالىق ءوزى اقشاسىن شىعارادى. ءبىراق ءار اداممەن كەلىسىمشارت جاسايمىز»، – دەدى «كەنجەحان» بازارىنىڭ اتقارۋشى ديرەكتورى ارداق تاجييەۆ.