مەملەكەت باسشىسى جەتىسۋ وبلىسىنداعى جۇمىس ساپارى بارىسىندا ءوڭىر جۇرتشىلىعىمەن كەزدەستى. قاسىم-جومارت توقايەۆ بۇل ولكەنىڭ وزىنە ەرەكشە ىستىق ەكەنىن اتاپ ءوتتى.
مەملەكەت باسشىسى بۇرىنعى الماتى وبلىسىنىڭ جەر كولەمى ءتىپتى ۇلكەن بولعانىن، جەرگىلىكتى باسقارۋ ءىسىن جەتىلدىرۋ ءۇشىن وبلىستى ەكىگە ءبولۋ تۋرالى شەشىم قابىلدانعانىن جەتكىزدى. پرەزيدەنتتىڭ ايتۋىنشا، بۇل – مۇقيات ويلاستىرىلىپ جاسالعان قادام جانە تۇرعىندار ءۇشىن قولايلى ەكەنى انىق. ءقازىر جەتىسۋدىڭ الەۋمەتتىك-ەكونوميكالىق قۋاتىن ارتتىرۋعا بيۋدجەتتەن قارجى ءبولىنىپ، قولداۋ كورسەتىلىپ جاتىر. بۇل شەشىم ايماققا ينۆەستيسيا تارتۋعا، ينفراقۇرىلىمدى جاقسارتۋعا ىقپال ەتەدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قاسىم-جومارت توقايەۆ ءوز سوزىندە جەتىسۋ ءوڭىرىنىڭ دامۋىنا تىڭ سەرپىن بەرەتىن كەيبىر ماسەلەلەرگە ارنايى توقتالدى. ەڭ الدىمەن، اۋىل شارۋاشىلىعىن دامىتۋدى جانە ازىق-تۇلىك ونىمدەرىن ءوندىرۋدى ءبىرىنشى ماسەلە رەتىندە اتادى. ونىڭ ايتۋىنشا، تابيعاتى جايلى، جەرى قۇنارلى جەتىسۋ ولكەسىنىڭ اۋىل شارۋاشىلىعىنداعى الەۋەتى وتە زور.
«بۇگىندە جەتىسۋ وبلىسى بويىنشا 100 مىڭ گەكتاردان استام پايدالانىلماي جاتقان جەر انىقتالدى. جەر – حالىقتىڭ بايلىعى. ول بارلىق ازاماتتىڭ يگىلىگىنە جاراۋى كەرەك. اكىمدەر بۇل ماسەلەنى قاتاڭ باقىلاۋدا ۇستاۋى قاجەت. وبلىستىڭ سۋارمالى جەرلەردى يگەرۋگە زور مۇمكىندىگى بار. بۇگىندە ايماقتاعى جەر سۋاراتىن جەلىلەردىڭ 70 پايىزى توزىپ تۇر. ونىڭ ءبارىن جاڭعىرتىپ، قالىپقا كەلتىرۋ كەرەك. اقسۋ، الاكول جانە سارقان اۋداندارىندا سۋارمالى جەردىڭ كولەمىن 18 مىڭ گەكتارعا ۇلعايتۋعا بولادى. ەكولوگيا، گەولوگيا جانە تابيعي رەسۋرستار مينيسترلىگى وبلىس اكىمدىگىمەن بىرلەسىپ، وسىعان وراي ناقتى شارالار قابىلداسىن»، – دەدى مەملەكەت باسشىسى.
قاسىم-جومارت توقايەۆ جەتىسۋدىڭ اۋىل شارۋاشىلىعىنداعى باسىم باعىتتىڭ ءبىرى – قانت قىزىلشاسى ەكەنىنە توقتالىپ، ەلىمىزدەگى 4 قانت زاۋىتىنىڭ ەكەۋى وسى جەردە ورنالاسقانىن اتاپ ءوتتى. الايدا شيكىزاتتىڭ جوقتىعىنان ونىڭ بىرەۋى جۇمىس ىستەمەي تۇر.
قانت قىزىلشاسىن وسىرەتىن القاپتار ازايىپ كەتتى. سونىڭ كەسىرىنەن يمپورتقا تاۋەلدىلىك ارتا ءتۇستى. زاۋىتتى ىسكە قوسۋعا 2017 جىلدان باستاپ جەرگىلىكتى بيۋدجەتتەن 12 ميلليارد تەڭگە جۇمسالدى. بيىل جازدا قانت بىردەن قىمباتتاپ، ونىڭ تاپشىلىعى تۋىندادى. ونىڭ ءبارى قۇزىرلى ورگانداردىڭ سالعىرتتىعى مەن بەيقامدىعىنىڭ كەسىرىنەن بولدى، – دەدى پرەزيدەنت.
مەملەكەت باسشىسى بوس تۇرعان زاۋىتتى تەزىرەك تولىق ىسكە قوسۋدى، قاجەت بولسا، باسقا ينۆەستورلار تارتۋدى قاراستىرۋ كەرەك ەكەنىنە نازار اۋداردى. سونىمەن قاتار وبلىستاعى ەكى قانت زاۋىتىنىڭ قۋاتىن 100 پايىزعا جەتكىزىپ، 2026 جىلعا قاراي وندىرىلەتىن قانت كولەمىن 180 مىڭ تونناعا ارتتىرۋ قاجەت ەكەنىن ايتتى. سونداي-اق وبلىستىڭ كوكونىس پەن باۋ-باقشا ءوسىرۋ ىسىندە زور الەۋەتى بار ەكەنىن، وسى ورايدا، زاماناۋي قويمالار سالۋ ماسەلەسىن شەشۋ قاجەت ەكەنىن اتاپ ءوتتى.
بۇدان كەيىن پرەزيدەنت ونەركاسىپتى دامىتۋ جانە كاسىپكەرلىكتى قولداۋ سالالارىنا توقتالدى. وڭىردەگى ونەركاسىپ سالاسىنىڭ ءوسۋ ديناميكاسىن وڭ باعالاپ، جىل باسىنان بەرى 23 نىسان پايدالانۋعا بەرىلگەنىن ايتتى.
«بىرنەشە جىلدان بەرى توقتاپ تۇرعان جوعارى ساپالى كرەمنيي وندىرەتىن Kazsilicon زاۋىتىنىڭ جاڭعىرتىلىپ، ىسكە قوسىلۋىن جانە تەمىردى تىكەلەي توتىقسىزداندىراتىن «ەلەكترومارگانەس» زاۋىتىنىڭ قۇرىلىسىن ەرەكشە اتاپ وتكىم كەلەدى. ەكەۋى دە ەلىمىز ءۇشىن – ماڭىزدى كاسىپورىن. ولار مەتاللۋرگيا سالاسىنداعى وزىق تەحنولوگيالاردى ازىرلەۋ جانە تاراتۋ الاڭىنا اينالۋى كەرەك. سونداي-اق وبلىستا 2026 جىلعا دەيىنگى ينۆەستيسيالىق پورتفەل جاسالعان. وندا 7 مىڭنان استام جۇمىس ورنى اشىلاتىن 162 جوبا قامتىلعان. جوسپاردان ۇلكەن ءۇمىت كۇتەمىز. ەندى جوبالاردىڭ جۇزەگە اسىرىلۋى قالاي بولاتىنىن كورەمىز»، – دەدى مەملەكەت باسشىسى.
قاسىم-جومارت توقايەۆ ساپالى جۇمىس ورىندارىن قۇرۋعا مۇمكىندىك بەرەتىن وڭدەۋ ونەركاسىبىنە جاڭا ينۆەستورلاردى بەلسەندىرەك تارتۋ قاجەتتىگىن اتاپ ءوتتى. سونىمەن قاتار وڭىردەگى اككۋمۋلياتور زاۋىتى پەرسپەكتيۆاسى زور ىرگەلى كاسىپورىننىڭ ءبىرى ەكەنىن ايتتى.
وسى كاسىپورىننىڭ ۇزدىكسىز جۇمىس ىستەۋى شيكىزاتتىڭ كولەمى مەن ونىڭ تۇراقتى جەتكىزىلۋىنە تىكەلەي بايلانىستى. سونداي-اق ونەركاسىپتىك اككۋمۋلياتور شىعاراتىن زاۋىت ىسكە قوسىلادى دەپ جوسپارلانىپ وتىر. بۇل كاسىپورىنداردى قاجەتتى كولەمدە شيكىزاتپەن قامتاماسىز ەتۋ ءۇشىن ەلدەن قورعاسىن سىنىقتارىن شىعارۋعا تولىق تىيىم سالۋ قاجەت، – دەدى پرەزيدەنت.
بۇدان بولەك، مەملەكەت باسشىسى مول ترانزيتتىك مۇمكىندىكتى ەسكەرە وتىرىپ، ايماققا حالىقارالىق كولىك-لوگيستيكالىق كومپانيالاردى تارتۋ ماڭىزدى دەپ ەسەپتەيدى. بۇل ءۇشىن ەلىمىزدە قۇرعاق پورت، لوگيستيكالىق جانە يندۋستريالىق ايماقتاردى قامتيتىن «قورعاس – شىعىس قاقپاسى» ارنايى ەكونوميكالىق ايماعى بار ەكەنىن ەسكە سالدى.
«دوستىق ستانسياسىندا جىلىنا 9 ميلليون توننا جۇك پەن 300 مىڭ كونتەينەر قابىلداپ، جونەلتە الاتىن تەرمينال سالۋ جوسپارلانىپ وتىر. سونىمەن قاتار Hubei Kelison يندۋستريالىق پاركىن سالۋ جونىندە قىتايمەن بىرلەسكەن جوبانى جۇزەگە اسىرۋعا قاتىستى ماسەلەلەردى شەشۋ قاجەت»، – دەدى قاسىم-جومارت توقايەۆ.
پرەزيدەنت شاعىن جانە ورتا بيزنەستىڭ ەكونوميكالىق دامۋدىڭ قارقىنى مەن ءونىمدى جۇمىسپەن قامتۋ دەڭگەيىن ايقىندايتىن جەتەكشى سەكتور ەكەنىنە توقتالىپ، مەملەكەت بۇل سالاعا ودان ءارى قولداۋ كورسەتەتىنىن جەتكىزدى. سونداي-اق ەكونوميكانىڭ قارقىندى دامىپ كەلە جاتقان سالالارىنىڭ ءبىرى سيفرلىق تەحنولوگياعا توقتالىپ، استانا مەن الماتىدا قۋاتتى ءىت كلاستەرلەر قالىپتاسىپ كەلە جاتقانىن ايتتى. ونىڭ ايتۋىنشا، جەتىسۋ وبلىسىنىڭ دا ءىت سەكتورىنداعى الەۋەتى زور. بۇل ايماققا دا بىلىكتى مامانداردى تارتۋعا بولادى. ول ءۇشىن، ەڭ الدىمەن، قاجەتتى ينفراقۇرىلىمدى دامىتقان ءجون.
قاسىم-جومارت توقايەۆ ءتۇرعىن-ۇي كوممۋنالدىق شارۋاشىلىعى ينفراقۇرىلىمىن جاڭعىرتۋ ماسەلەسىنە توقتالدى. ونىڭ ايتۋىنشا، جەتىسۋ حالقىنىڭ 90 پايىزى ورتالىقتاندىرىلعان سۋمەن قامتاماسىز ەتىلگەن. الايدا سۋ قۇبىرى جەلىلەرىنىڭ ەداۋىر بولىگى ابدەن توزىپ، 1،2 مىڭ شاقىرىم قۇبىر جەلىسى كۇردەلى جوندەۋدى قاجەت ەتەدى. سوندىقتان وڭىردەگى قۇبىر جەلىلەرىن كەزەڭ-كەزەڭىمەن جاڭارتۋ اكىمدىكتىڭ باستى مىندەتتەرىنىڭ ءبىرى رەتىندە ايتىلدى.
«تاعى ءبىر ماڭىزدى ماسەلە. بۇل – اۋىز سۋدىڭ ساپالى بولۋىن قامتاماسىز ەتۋ. مىسالى، تەكەلىدە جىلدار بويى جالعاسىپ كەلە جاتقان تۇيتكىلدى ءبارىڭىز جاقسى بىلەسىزدەر. قالا تۇرعىندارى تازا اۋىز سۋسىز وتىر. بۇل ماسەلەنى ۇزاققا سوزباي شەشۋ كەرەك. وبلىس جانە قالا اكىمدەرى اتالعان تاپسىرمانىڭ ورىندالۋىنا تىكەلەي جاۋاپتى. ۇكىمەت رەسپۋبليكا بيۋدجەتىنەن الداعى جىلى قارجى ءبولۋ ماسەلەسىن قاراستىرۋعا ءتيىس»، – دەدى پرەزيدەنت.
كوگىلدىر وتىن وبلىس تۇرعىندارىنىڭ 10 پايىزىنا عانا قولجەتىمدى ەكەنىن ايتقان قاسىم-جومارت توقايەۆ ءبىرقاتار ەلدى مەكەندى گازبەن قامتۋدى تاپسىردى.
«الماتى – تالدىقورعان» ماگيسترالدى گاز قۇبىرى سالىنىپ، وبلىس ورتالىعىنا گاز تولىق بەرىلدى. 2025 جىلعا قاراي كەربۇلاق اۋدانىنان تالدىقورعان قالاسىنىڭ ماڭىنا دەيىن، بارلىق ەلدى مەكەندى گازبەن تولىق قامتاماسىز ەتۋدى تاپسىرامىن. سونىمەن قاتار، «تالدىقورعان – ءۇشارال» باعىتىندا گاز قۇبىرىن تارتۋ كەرەك. بۇل 180 مىڭ ادام تۇراتىن اقسۋ، سارقان، الاكول اۋداندارىنا گاز جەتكىزۋگە مۇمكىندىك بەرەدى. ۇكىمەتكە وسى جوبانى كەزەڭ-كەزەڭىمەن قارجىلاندىرۋدى تاپسىرامىن. جەتىسۋ وبلىسىن گازبەن قامتاماسىز ەتۋ جۇمىسىن تەزدەتۋ كەرەك. سونىمەن بىرگە، گاز جەلىسىنە قوسىلۋ قۇنى ازاماتتار ءۇشىن تىم قىمباتقا تۇسپەۋى قاجەت، – دەدى مەملەكەت باسشىسى.
قاسىم-جومارت توقايەۆ وبلىستاعى جول ماسەلەسىنە دە ارنايى توقتالدى. ونىڭ ايتۋىنشا، «تالدىقورعان – قالباتاۋ – وسكەمەن» جانە «ءۇشارال – دوستىق» تاس جولدارى سالىنىپ جاتىر. قۇزىرلى ورگاندارعا جۇمىس بارىسىن قاتاڭ باقىلاۋعا الىپ، كەلەسى جىلى تولىق پايدالانۋعا بەرۋ تاپسىرىلدى.
«كەربۇلاق جانە پانفيلوۆ اۋداندارى ارقىلى وتەتىن رەسپۋبليكالىق جۇرە جولدى جوندەۋ ماسەلەسى دە وزەكتى بولىپ تۇر. بۇل – وتە ماڭىزدى جول. سوندىقتان، ۇكىمەت پەن اكىمدىككە ونداعى كۇردەلى جوندەۋ جۇمىسىن كەلەسى جىلى اياقتاۋدى تاپسىرامىن. قاجەتتى قاراجاتتى شۇعىل قاراستىرۋ كەرەك. جولدى ساپاسىز سالۋعا بولمايدى جانە قۇرىلىس سوزىلىپ كەتپەۋگە ءتيىس. بۇل جەرگىلىكتى جۇرتتىڭ تۇرمىسى مەن كولىك قوزعالىسىنىڭ قاۋىپسىزدىگىنە تىكەلەي اسەر ەتەدى. وبلىستاعى رەسپۋبليكالىق ماڭىزى بار كۇرە جولداردا بولعان جول اپاتتارىنان 9 ايدا 61 ادام قايتىس بولدى. بۇل – جان تۇرشىگەرلىك كورسەتكىش. ەلىمىزدە جول اپاتتارى، ونىڭ ىشىندە ادام ولىمىنە اكەپ سوقتىرعان وقيعالار كوبەيىپ بارادى. بۇعان ەش جول بەرۋگە بولمايدى. ادام ولىمىنە اكەپ سوقتىرعان ءاربىر جول اپاتىن توتەنشە جاعداي رەتىندە قاراستىرۋ قاجەت. ادام ءومىرى – ءبىزدىڭ باستى بايلىعىمىز»، – دەدى پرەزيدەنت.
مەملەكەت باسشىسى الەۋمەتتىك ينفراقۇرىلىمدار ماسەلەسىنە دە ارنايى توقتالدى. ونىڭ ايتۋىنشا، وبلىستا اپاتتى جاعدايداعى مەكتەپتەر مەن ءۇش اۋىسىمدا وقىتاتىن مەكتەپتەر جوق. ءبىراق، بوساڭسۋعا بولمايدى. مەكتەپ ماسەلەسى اكىمدىكتىڭ ەرەكشە نازارىندا بولۋعا ءتيىس.
قاسىم-جومارت توقايەۆ بۇعان دەيىن قازاقستاندا الەمنىڭ جەتەكشى بەس تەحنيكالىق ۋنيۆەرسيتەتىنىڭ فيليالدارىن اشۋ تۋرالى باستاما كوتەرگەنىن ەسكە سالىپ، ءوزىنىڭ تاپسىرماسىمەن ۇكىمەت وبلىس اكىمدىگىمەن بىرلەسىپ تالدىقورعان قالاسىندا شەتەلدىك ءىرى تەحنولوگيالىق ۋنيۆەرسيتەتتىڭ فيليالىن اشۋ ماسەلەسىن پىسىقتاپ جاتقانىن ايتىپ ءوتتى.
«وبلىستىڭ ەرەكشەلىگىن ەسكەرە وتىرىپ، اتالعان ۋنيۆەرسيتەت اۋىل شارۋاشىلىعى، ونەركاسىپ، تۋريزم جانە سيفرلىق تەحنولوگيالار سالاسى بويىنشا ماماندار دايارلايدى. بۇل وڭىردەن جاستاردىڭ كەتۋىن ازايتىپ، جەرگىلىكتى ەكونوميكانى جوعارى بىلىكتى كادرلارمەن قامتاماسىز ەتۋگە مۇمكىندىك بەرەدى»، – دەدى مەملەكەت باسشىسى.
جيىندا بيىل وبلىستىڭ التى اۋدانىنداعى شالعاي ورنالاسقان شاعىن ەلدى مەكەندەردە مەديسينالىق پۋنكتتەرگە ارنالعان 12 مودۋلدىك كەشەن سالىناتىنى تۋرالى ايتىلدى. ال 2024 جىلعا دەيىن تاعى 40 اۋىلدا وسىنداي نىسان بوي كوتەرەدى. سونىمەن قاتار وڭىردەگى ءبىرقاتار دەنساۋلىق ساقتاۋ ورىندارىنا كۇردەلى جوندەۋ جۇرگىزىلەدى.
پرەزيدەنتتىڭ ايتۋىنشا، ۇلت دەنساۋلىعىن جاقسارتۋ ءۇشىن بالالار مەن بۇقارالىق سپورتتى ناسيحاتتاۋ ماڭىزدى. «دەنى ساۋ ۇلت» ۇلتتىق جوباسىندا 2025 جىلعا قاراي دەنە شىنىقتىرۋ جانە سپورتپەن اينالىساتىن ازاماتتاردى قامتۋ ءىسىن 50 پايىزعا جەتكىزۋ مىندەتى قويىلعان. جەتىسۋ وڭىرىندە بۇل كورسەتكىش – بۇگىندە 34 پايىز.
«كوزدەگەن ماقساتقا جەتۋ ءۇشىن سپورت ينفراقۇرىلىمىن دامىتۋ قاجەت. مۇنى، اسىرەسە، اۋىلدىق جەرلەردە قولعا العان ءجون. اۋىلداردا ءمودۋلدى دەنە شىنىقتىرۋ-ساۋىقتىرۋ كەشەندەرىن سالۋ كەرەك. ولار تەز سالىنادى جانە كوپ قاراجاتتى قاجەت ەتپەيدى. بىلتىر تالدىقورعاندا وليمپيادا تالاپتارىنا ساي كەلەتىن زاماناۋي باسسەين اشىلدى. مۇنداي باسسەين ورتالىق ازيادا جوق. ەندى وبلىستا شاڭعى سپورتى تۇرلەرىن دامىتۋ ماسەلەسى بار. جەتىسۋ تاۋلارى بۇل ءۇشىن وتە قولايلى ەكەنى ءسوزسىز. وسىعان بايلانىستى ۇكىمەتكە وبلىستا زاماناۋي شاڭعى جانە بياتلون كەشەنىن سالۋ ءىسىن قامتاماسىز ەتۋدى تاپسىرامىن»، – دەدى مەملەكەت باسشىسى.
قاسىم-جومارت توقايەۆ جەتىسۋ وبلىسىنىڭ اكىمدىگى تۋريزم سالاسىن دامىتۋعا ايرىقشا ءمان بەرۋى كەرەك ەكەنىن ايتتى.
«الاكول مەن بالقاشتىڭ وراسان زور الەۋەتى بار. «التىنەمەل» جانە «جوڭعار الاتاۋى» ۇلتتىق پاركى – ەكولوگيالىق ءتۋريزمدى دامىتۋ ءۇشىن تاپتىرمايتىن جەر. تەكەلىدەگى ايگىلى شاجا جانە قورا سايلارى كەرەمەت كورىنىستەرگە تولى. مىنە، وسىنىڭ ءبارى – تۇنىپ تۇرعان بايلىق. ارينە، تۋريستەر كوپتەپ كەلۋ ءۇشىن ءتيىستى ينفراقۇرىلىم سالىپ، قولايلى جاعداي جاساۋ كەرەك. بۇل – وڭاي شارۋا ەمەس. سوڭعى جىلدارى بۇل باعىتتا ءبىرشاما جۇمىس اتقارىلدى. ءبىراق، مۇنىمەن شەكتەلۋگە بولمايدى. جەتىسۋداعى ۇلتتىق پاركتەردە قۇنى 3 ميلليارد تەڭگەدەن استام ينۆەستيسيالىق جوبالار جۇزەگە اسىرىلماق. وعان ءىرى ينۆەستورلار تارتىلدى»، – دەدى پرەزيدەنت.
سونىمەن قاتار جيىندا وبلىستىڭ ەكولوگياسى تۋرالى دا ايتىلدى. تەكەلى قالاسىن قورعاسىن-مىرىش كومبيناتىنىڭ قالدىقتارىمەن لاستاۋ ماسەلەسى كوتەرىلىپ، جەردىڭ قۇرعاپ كەتۋىنە جول بەرمەۋ ءۇشىن بالقاش جاعالاۋىن كوگالداندىرۋدى قولعا الۋ ماڭىزدى ەكەنىنە ءمان بەرىلدى. مەملەكەت باسشىسى بۇل جۇمىستاردى ۇيلەستىرۋدى ەكولوگيا مينيسترلىگى جۇزەگە اسىرۋى كەرەك ەكەنىنە توقتالدى. سونداي-اق ۋاكىلەتتى ورگاندار قىتايمەن بىرلەسىپ، ترانسشەكارالىق ىلە وزەنىنە سۋدىڭ جىبەرىلۋىن باقىلاۋعا الۋى قاجەتتىگىن اتاپ ءوتتى.
مەملەكەت باسشىسى بۇگىندە الەم اۋمالى-توكپەلى گەوساياسي جاعدايعا جانە بۇرىن-سوڭدى بولماعان جاھاندىق سىن-قاتەرلەر كەزەڭىنە قادام باسقانىن ايتتى. پرەزيدەنت قاقتىعىستار مەن سوعىستار كوبەيىپ، ەلدەر اراسىنداعى سەنىمسىزدىك كۇشەيە تۇسكەنىن اتاپ ءوتتى. سونداي-اق وسىنداي كۇردەلى جاعدايدا حالقىمىزدىڭ بىرلىگى، قوعامداعى كەلىسىم مەن تۇراقتىلىقتى ساقتاۋ ەرەكشە ماڭىزعا يە ەكەنىن جەتكىزدى. بۇعان قازاقستان حالقى اسسامبلەياسى زور ۇلەس قوسىپ كەلەدى. رەفورمالار كەزىندە ۇلتتىق ديالوگتىڭ امبەباپ الاڭى رەتىندە تانىلعان ۇلتتىق قۇرىلتايدىڭ ماڭىزدى ءرولى تۋرالى دا ءسوز قوزعالدى. بۇل ينستيتۋتتىڭ قىزمەتى بيلىك پەن قوعام اراسىنداعى ىنتىماقتاستىق نەگىزىندە حالقىمىزدىڭ بىرلىگىن نىعايتۋعا مۇمكىندىك بەرەدى.
«مۇنداي جاعدايدا ءار ازامات ءوزىنىڭ ءسوزى مەن ىس-ارەكەتى ءۇشىن جاۋاپكەرشىلىكتى سەزىنۋى كەرەك. بۇل، ەڭ الدىمەن، قوعامدا بەلگىلى تۇلعالارعا، ساياساتكەرلەرگە، جۋرناليستەرگە، بلوگەرلەرگە قاتىستى. اعات ايتىلعان سوزدەر مەن ورىنسىز مالىمدەمەلەردىڭ سالدارى اۋىر بولۋى مۇمكىن. قازاق «ايتىلعان ءسوز – اتىلعان وقپەن تەڭ» دەپ بەكەر ايتپاعان. پىكىرلەردىڭ ءپليۋراليزمىن ساقتاي وتىرىپ، ءبىز راديكاليزمنىڭ، ەكسترەميزمنىڭ جانە سەپاراتيزمنىڭ كەز كەلگەن كورىنىستەرىنە جول بەرمەۋىمىز كەرەك. ءبىزدىڭ قوعامعا ىرىتكى سالۋ ارەكەتتەرىنە زاڭ اياسىندا قاتاڭ توسقاۋىل قويىلادى. ەلىمىزدە زاڭ مەن ءتارتىپ ءبىرىنشى ورىندا تۇرۋى كەرەك»، – دەدى مەملەكەت باسشىسى.
پرەزيدەنت ەلىمىزدە ساياسي رەفورمالاردىڭ جۇرگىزىلىپ جاتقانىن ايتىپ، ونىڭ ءمان-ماعىناسىن ءتۇسىندىردى.
«شىن مانىندە، ادىلدىك بولماسا، ەشبىر سالا دامىمايدى. حالقىمىز «ءادىل ءىستىڭ – ءبارى يگى» دەپ بەكەر ايتپاعان. قۇزىرلى ورگاندار، لاۋازىمدى تۇلعالار شەشىم قابىلداعاندا وسىنى ءاردايىم ەستە ۇستاۋعا ءتيىس. ادىلەتسىز شىعارىلعان شەشىم بيلىكتىڭ بەدەلىن تۇسىرەدى. قوعامعا ىرىتكى سالىپ، حالىقتىڭ نارازىلىعىن تۋدىرادى. سوندىقتان ەشقاشان ادىلدىكتەن اتتاۋعا بولمايدى»، – دەدى مەملەكەت باسشىسى.
بۇدان كەيىن قاسىم-جومارت توقايەۆ ءوزىنىڭ جارلىعىمەن ءوڭىردىڭ ءبىرقاتار ازاماتىن مەملەكەتتىك ناگرادامەن ماراپاتتادى. «جەتىسۋ» اۋە كومپانياسىنىڭ پرەزيدەنتى دوڭسەبايەۆ قالمۇحامەت پەن ەڭبەك ارداگەرى ماجاي اۋەسحان «پاراسات» وردەنىمەن، ەڭبەك ارداگەرى ءارىنوۆ امىرە «قۇرمەت» وردەنىمەن، «جازىلبەكوۆ جانە ك» شارۋاشىلىق قوجالىعىنىڭ شوپانى بەكچوينوۆ ارداق ءىىى دارەجەلى «ەڭبەك داڭقى» وردەنىمەن ماراپاتتالدى. ال «ەرەن ەڭبەگى ءۇشىن» مەدالى «ەسىمجانوۆ» شارۋاشىلىق قوجالىعىنىڭ ءتوراعاسى ەسىمجانوۆ مۇحيتقا، «شاپاعات» مەدالى بەزرودنىح اتىنداعى ورتا مەكتەپتىڭ ءمۇعالىمى مينچەنكو سۆەتلاناعا تابىس ەتىلدى.