«Sezual» قوعامدىق بىرلەستىگىنىڭ نەگىزىن قالاۋشى عالىمجان عابدرەشيەۆتىڭ بۇگىنگە دەيىن ويلاپ تاپقان ازىرلەمەلەرىنىڭ دەنى زاعيپ جانداردى قوعام تىرلىگىنەن شەت قالدىرماي ومىرلەرىن جەڭىلدەتۋگە باعىتتالعان.
برايل ءقارپىن ۇيرەتۋگە ارنالعان جاتىعۋ قۇرىلعىسى مەن بيولوكاسيالىق دىبىستىق اپپارات وسىنى كوزدەيدى. بەس جىل بۇرىن ەر ادام كوزىن اۋىر جاراقاتتاپ العان. كورۋ قابىلەتى قايتقانىمەن دارىگەرلەر كەز-كەلگەن ۋاقىتتا ەر ادام سوقىر بولىپ قالۋى مۇمكىن ەكەنىن ەسكەرتتى. سول كەزدە ونەرتاپقىش كومەكشى قۇرىلعىلاردى ازىرلەۋمەن اينالىسۋعا بەل بۋادى. ونداعى العاشقى تىڭ ويلارىنىڭ ءبىرى - بيولوكاتور، دەپ حابارلايدى Almaty-akshamy.kz.
ونىڭ كومەگىمەن كورۋ قابىلەتىنەن مۇلدەم ايىرىلعان ادامدار اينالانى تانىپ، ساياحاتتاي الادى، ءتىپتى ۆەلوسيپەد تەبۋگە ۇيرەنەدى.
«ادامنىڭ ميى ءتۇرلى دىبىستاردىڭ كومەگىمەن تۇنگى جانۋارلار سياقتى اينالانى تانىپ، كورە الادى. ياعني ءبىز جارىق تولقىندارىنىڭ كومەگىمەن ۆيزۋالدى بەينەلەردى قالىپتاستىرامىز. جاي عانا دىبىستىق جارىق بەرەتىن قوندىرعى قۇرعان جوقپىز. سونىمەن قاتار ميدىڭ كورۋ قىرتىسىن جاتتىقتىرۋعا ارنالعان تەحنولوگيانى ازىرلەدىك. وسىلايشا، ناقتى بەينەلەردى ەلەستەتە الامىز. ءدال وسى وي ءبىزدى ەش جەردە بالاماسى جوق ونەرتابىستى جۇزەگە اسىرۋعا نەگىز بولدى»، - دەيدى قازاقستاندىق عالىم، عىلىم كانديداتى عالىمجان عابدرەشيەۆ.
دۇنيەجۇزىلىك زياتكەرلىك مەنشىك ۇيىمى جانە مۇگەدەكتىگى بار ادامدارعا ارنالعان يننوۆاسيالار سالاسىنداعى ەۋروپالىق عالىمدار كەڭەسى شىعارعان قورىتىندىعا ساي قازاقستاندىق بيولوكاتور زاعيپ جانداردىڭ كورۋ قابىلەتىن تولىقتاي الماستىرۋعا مۇمكىندىك بەرەتىن العاشقى ونەرتابىس دەپ تانىلدى. قازىرگى تاڭدا قۇرىلعى عىلىمي-زەرتتەۋ جانە تاجىريبەلىك-قۇراستىرۋ كەزەڭنەن كوممەرسيالاندىرۋعا كوشۋدە. قازاقستاندىق جوباعا امەريكانىڭ عالىمدارى ۇلكەن قىزىعۋشىلىق تانىتىپ وتىر. عالىمجان عابدرەشيەۆتىڭ ەندى ءبىر بىرەگەي ونەرتابىسى «فيش لوكاموۋشن» دەپ اتالاتىن مونوەسكەكاياق. ول سۋدا ءجۇزۋ ارقىلى ىشىندە تولقىن ءتارىزدى قيمىلدار جاساۋعا مۇمكىندىك بەرەدى. عالىم بۇنداي ءادىس وستەوحوندروز، سكوليوز، ومىرتقاارالىق ديسكىلەردىڭ شىعىپ كەتۋى سىندى اۋرۋلاردان ارىلۋعا جانە جالپى دەنساۋلىقتى جاسارتۋعا سەپتىگىن تيگىزەتىنىن ايتادى. ازىرگە، عالىمجان بارلىق زەرتتەۋلەردى ءوزى سىناپ ءجۇر.
«ءبىز جۇمىسىمىزدى تىرەك-قيمىل جۇيەسى مەن بۋىنداردىڭ قوزعالىسىنا قاتىستى بارلىق قاجەتتى اقپاراتتى جيناۋدان باستادىق. كەيىن جۇرگىزگەن بارلىق زەرتەۋ ناتيجەلەرى وڭ ديناميكانى كورسەتتى. ءبىز بيوحيميالىق ساراپتامالار جۇرگىزۋ ارقىلى اعزاداعى قان قۇرامىنىڭ جاقسارعانىن بايقادىق. ءتىپتى سالماقتىڭ تومەندەۋىنە اسەرى مول بولدى. حيرۋرگيالىق جولمەن ەمدەۋگە بولمايتىن 20-دان استام ومىرتقا، جۇلىن اۋرۋلارىنا شيپاسى ءتيدى»، - دەيدى وڭالتۋ ورتالىعىنىڭ باس دارىگەرى اسقار بايماعامبەتوۆ.
وتاندىق عالىم ءوز الدىنا مۇمكىندىگى شەكتەۋلى جاندار ءۇشىن تۇتاس ەكوجۇيە قۇرۋ مىندەتىن قويىپ وتىر. ونىڭ قولىمەن جاسالعان بىرەگەي ونەرتابىستاردى الەم مويىندادى. شەتەلدىك كومپانيالاردان جوبانىڭ قۇقىقتارىن ساتىپ الۋعا قاتىستى تالاي ۇسىنىس تۇسكەن. الىدە بۇعان نيەتتىلەر از ەمەس دەيدى ول. عالىمجان اۆتورلىقتى يەمدەنۋدى كوزدەيتىن بۇل ۇسىنىستاردىڭ بارىنەن باس تارتىپ، باستامالارىن ەلىمىزدىڭ اتىنان ناسيحاتتاپ ءجۇر. ەندىگى ماقساتى مەملەكەتتىڭ قولداۋىمەن ينۆەستيسيا تاۋىپ جوبالارىن وندىرىستىك جولعا قويۋ.