اۋىل شارۋاشىلىعى ءمينيسترى ايداربەك ساپاروۆ ۇكىمەت وتىرىسىندا 2025 جىلعى ەگىن جيناۋ جۇمىستارىنىڭ قورىتىندىلارى تۋرالى باياندادى.
ول اياقتالعان ماۋسىم اۋىل شارۋاشىلىعى ءوندىرىسىنىڭ تۇراقتى ءوسىمىن كورسەتكەنىن اتاپ ءوتتى، - دەپ حابارلايدى Aqshamnews.kz.
«بيىل تەك ءداندى داقىلدار بويىنشا عانا ەمەس، سونىمەن قاتار بۇرشاقتى جانە مايلى داقىلدار سياقتى جوعارى رەنتابەلدى ءارى سۇرانىسقا يە داقىلدار تۇرعىسىنان دا رەكوردتىق جىل بولدى. بۇل داقىلدارعا ەگىس القاپتارىن ءارتاراپتاندىرۋ شەڭبەرىندە ەرەكشە نازار اۋدارىلدى»،— دەدى ايداربەك ساپاروۆ.مينيستر بۇگىنگى كۇنى رەسپۋبليكا بويىنشا استىق جيناۋ اياقتالعانىن، 16 ملن گەكتار القاپتان گەكتارىنا 17 سەنتنەر ورتاشا ونىمدىلىكپەن 27 ملن توننا استىق قامباعا قۇيىلعانىن اتاپ ءوتتى. بيداي 12،2 ملن گەكتاردان جينالىپ، 20،3 ملن تونناسى باستىرىلدى – بۇل وتكەن جىلمەن سالىستىرعاندا جارتى ملن تونناعا كوپ. ەگىس القاپتارىن ءارتاراپتاندىرۋ ناتيجەسىندە بيدايدىڭ ەگىس كولەمى شامامەن 900 مىڭ گەكتارعا قىسقارعانىمەن، ءوندىرىس كولەمى ازايماي، كەرىسىنشە ارتتى. بۇل وزىق اگروتەحنولوگيالاردىڭ تيىمدىلىگىن دالەلدەيدى. ءمينيستردىڭ سوزىنشە 4 ملن تونناعا جۋىق ارپا جينالعان. بۇرشاق داقىلدارىنىڭ ءتۇسىمى العاش رەت 1 ملن تونناعا جەتتى. مايلى داقىلدار بويىنشا بۇگىنگى كۇننىڭ وزىندە رەكوردتىق 4،3 ملن توننا جينالدى جانە ەگىن جيناۋ جۇمىستارى جالعاسىپ جاتىر. سونىمەن قاتار 2،9 ملن توننا كارتوپ، 3،8 ملن توننا كوكونىس، 2،6 ملن توننا باقشا داقىلدارى جينالدى. ماقتا جيناۋ جۇمىستارى اياقتالدى. تامشىلاتىپ سۋارۋدى قولدانۋ ناتيجەسىندە كەيبىر شارۋاشىلىقتار گەكتارىنان 50 سەنتنەرگە دەيىن ءونىم الدى. جالپى العاندا، ورتاشا ونىمدىلىك 30 س/گا دەڭگەيىندە قالىپتاسىپ، 428 مىڭ توننا ءشيتتى ماقتا جينالدى – بۇل وتكەن جىلمەن سالىستىرعاندا 42%-عا كوپ.